Isaia 48 - Revised Samoan Catholic Bible

‘Ua A‘oa‘iina Isaraelu ‘ona o le Pepelo ma le Ifo i Tupua

1Fa‘alogo mai ia i lenei mea ‘outou le ‘āiga o Iakopo,

o ē ‘ua igoa i le igoa o Isaraelu,

ma ‘ua latou ō atu nai le vai o Iuta

o ē tautō i le suafa o le ALI‘I,

ma ta‘uta‘u atu i le Atua o Isaraelu,

‘ae lē o le fa‘amaoni ma le amiotonu.

2Auā e igoa ai i latou i le ‘a‘ai pa‘ia,

ma latou fa‘alagolago i le Atua o Isaraelu;

o le ALI‘I o ‘au lona suafa.

3Na a‘u fa‘aalia mea muamua talu anamua;

‘ua o‘o atu ia mea a‘i lo‘u gutu.

Na ‘ou fa‘ailoa atu ai;

‘ua fa‘afuase‘i ‘ona ‘ou faia ma ‘ua taunu‘u lava.

4Auā ‘ua ‘ou iloa ‘ua finau vale lava oe,

ma lou ua o le ua u‘amea lea,

ma lou muaulu o le ‘apamemea lea.

5O le mea lea na a‘u fa‘aali atu ai ia mea ‘iā te oe talu anamua;

na ‘ou fa‘ailoa ‘iā te oe a o le‘i o‘o mai;

‘ina ne‘i e fai ane.

“‘Ua faia ia mea e la‘u tupua;

‘ua pule ai fo‘i la‘u tupua ‘ua ta ma la‘u tupua u‘amea.”

6‘Ua e fa‘alogo ai; ‘inā va‘ai ia i na mea uma;

a o ‘outou, tou te lē fa‘aalia ‘ea?

E āfua mai i nei ona po,

‘ou te fa‘ailoa ai ‘iā te oe o mea fou,

o mea lilo fo‘i sa ē lē iloa.

7‘Ua fai nei lava ia mea,

‘ae lē o anamua;

a o le‘i o‘o i le aso nei ‘e te le‘i fa‘alogo ai;

‘ina ne‘i e fai ane, “Fa‘auta, na e iloa lava ia mea.”

8E moni, ‘ua e lē fa‘alogo;

e moni, ‘ua e lē iloa;

e moni talu anamua ‘ua lē ua‘i mai ou taliga.

Auā na ‘ou iloa ‘e te matuā amio fa‘a‘ole‘ole;

na igoa oe, o le fouvale, talu ‘ina fānau mai.

9‘Ou te fa‘ato‘ato‘a ‘ona o lo‘u igoa;

‘ou te tāofi fo‘i lo‘u ita ‘iā te oe ‘ona o lo‘u vi‘iga,

‘ina ne‘i ‘ou fa‘aumatia oe.

10Fa‘auta, ‘ua ‘ou fa‘ate‘a le otaota ‘iā te oe,

‘ae lē pei o le ario;

‘ua ‘ou filifilia oe i le ‘ogāumu o i ai le puapuagā.

11‘Ona o a‘u, ‘ona o a‘u lava, ‘ou te faia;

auā pe fa‘apefea ‘ona fa‘agafuaina lo‘u igoa?

o lo‘u mamalu fo‘i, ‘ou te lē avatua lea i se tasi.

12Fa‘alogo mai ia ‘iā te a‘u, Iakopo e,

o oe fo‘i Isaraelu lē na ‘ou vala‘auina;

o a‘u lava ia, o a‘u lava lē muamua,

o a‘u fo‘i lē mulimuli.

13O lo‘u lima fo‘i na fa‘avaeina ai le lalolagi,

ma lo‘u lima taumatau na folasia ai le lagi;

‘ou te vala‘au ‘iā te i latou, ‘ona latou tutū fa‘atasi mai lea.

14‘Ia fa‘apotopoto mai ‘outou uma lava,

ma ‘ia ‘outou fa‘alogo mai.

O ai ‘ea so latou na ia fa‘aalia mai nei mea?

‘Ua alofa le ALI‘I ‘iā te ia;

na te faia lona finagalo i Papelonia,

e o‘o fo‘i lona lima i Kaletaia.

15O a‘u, a‘u lava, na a‘u fai atu;

na ‘ou vala‘auina fo‘i o ia;

na ‘ou ‘aumaia o ia, e manuia fo‘i lona ala.

16Fa‘alatalata mai ia ‘iā te a‘u;

‘ia ‘outou fa‘alogo mai i lenei mea.

Talu mai le amataga ‘ou te le‘i tautala fa‘alilolilo;

talu ‘ona i ai o lea mea, na ‘ou i ai o a‘u.

O lenei fo‘i, o le Ali‘i le ATUA,

na ia ‘auina mai a‘u, ma lona Agaga.

O Fuafuaga a le Ali‘i i ona Tagata

17O lo‘o fa‘apea ‘ona fetalai mai o le ALI‘I,

o lē na fa‘atauina oe,

o le Pa‘ia o Isaraelu.

O a‘u o le ALI‘I, o lou Atua,

o lo‘o a‘oa‘o ‘iā te oe i mea e aogā,

o lo‘o ta‘ita‘iina oe i le ala ‘e te ui ai.

18E! ‘ana ua‘i mai ou taliga i a‘u poloa‘iga,

po ‘ua tusa ma se vaitafe lou manuia

ma lau amiotonu o tusa lea ma peau o le sami.

19Po ‘ua pei o le oneone lau fānau;

ma ē tutupu mai i lou manava,

e pei o lona manava; e le vavae‘eseina,

ma le fanoia lona igoa ai o‘u luma.

20‘Ia ‘outou ō ‘ese i Papelonia;

‘ia sōsōla ‘ese ia Kaletaia ma le ta‘alili o le ‘alaga fiafia.

‘Ia ‘outou fa‘aali atu, ‘ia fa‘ailoa atu lenei mea,

‘ia fa‘ao‘o atu ai i le tulu‘iga o le lalolagi;

‘Ia ‘outou fai atu ai,

“‘Ua fa‘atauina e le ALI‘I o lana ‘au‘auna o Iakopo.”

21Sa latou le fia inu i nu‘u naumati na ia ‘avea ai i latou;

na ia fa‘atafe mai le vai mai le papa mo i latou;

na ia vāea le papa, ‘ona tafe mai ai lea o le vai.

22“E leai se filemū,” ‘ua fetalai mai le ALI‘I, “i ē amio leaga.”