Isaia 55 - Revised Samoan Catholic Bible

‘Ua Vala‘auina Tagata Uma Lava, Latou te Manuia i le Mesia

1E! ‘outou uma o ē fia inu,

ō mai ia i le vai,

‘atoa ma ‘outou ‘ua leai ni tupe,

ō mai ia, ‘inā fa‘atau ma ‘a‘ai.

‘Ia ‘outou ō mai lava,

ma fa‘atau le uaina ma le suāsusu,

‘ae leai se tupe, e leai fo‘i se tau e fa‘atau a‘i.

2Se a le mea tou te avatu ai a ‘outou tupe,

i mea e lē ni mea e ‘ai,

ma avatu mea na tigā ai ‘outou

i mea e le mā‘o‘ona ai?

Se‘i matuā fa‘alogologo mai ia ‘iā te a‘u,

ma ‘outou ‘a‘ai i mea lelei,

e fiafia fo‘i o ‘outou loto i mea lololo.

3Ua‘i mai ia o ‘outou taliga,

ma ‘outou ō mai ‘iā te a‘u;

fa‘alogologo mai ia, e ola ai o ‘outou agaga.

‘Ou te osia fo‘i le feagaiga e fa‘avavau ma ‘outou,

o mea alofa ia na folafolaina ‘iā Tavita e fa‘amaoni lava.

4Fa‘auta, ‘ua ‘ou avatua o ia e fai ma molimau i le nu‘u,

o le ta‘imua ma le pule i le nu‘u.

5Fa‘auta, ‘e te vala‘au i nu‘u ‘ese sa ē lē iloa;

o nu‘u ‘ese fo‘i sa latou lē iloa oe.

Latou te taufetuli mai ‘iā te oe,

‘ona o le ALI‘I lou Atua ma le Pa‘ia o Isaraelu;

auā ‘ua ia ta‘uleleia oe.

6‘Ia ‘outou sā‘ili i le ALI‘I manū o mafai ‘ona maua o ia;

‘ia ‘outou vala‘au ‘iā te ia manū o latalata mai o ia.

7‘Ia lafoa‘i e lē ‘ua amio leaga lona ala,

ma le tagata agasala ‘ia lafoa‘i e ia ona manatu.

A ‘ia fo‘i mai i le ALI‘I,

‘ona alofa mai lea o ia ‘iā te ia.

‘Ia fo‘i mai i lo tatou Atua,

auā na te matuā fa‘amāgaloina.

8Auā o o‘u manatu e lē o ‘outou manatu,

o o‘u ala e lē o ‘outou ala,

‘ua fetalai mai ai le ALI‘I.

9Auā e pei ‘ona sili ‘ona maualuga o le lagi i le lalolagi,

‘ua fa‘apea ‘ona sili ‘ona maualuga o o‘u ala i o ‘outou ala,

ma o‘u manatu e sili i o ‘outou manatu.

10Auā e pei ‘ona totō ifo o le timu ma le kiona mai le lagi,

‘ae lē toe fo‘i atu i ai.

‘Ae peita‘i e fa‘asūsūina ai le lau‘ele‘ele,

ma fua mai ai ma totogo mai ai,

e tupu mai ai saito i lē lūlū saito

ma mea e ‘ai i le ‘ua ‘ai.

11E fa‘apea fo‘i la‘u ‘upu e alu atu a‘i lo‘u gutu,

e lē fo‘i mai fua ‘iā te a‘u.

‘Ae peita‘i e faia le mea ‘ou te loto i ai,

e manuia fo‘i i le mea ‘ou te ‘auina atu ai.

12Auā tou te ō atu ma le fiafia,

e ta‘ita‘iina fo‘i ‘outou ma le manuia.

O atu mauga ma mauga e leo tetele,

ma le ‘alaga fiafia i o ‘outou luma,

e pati lima fo‘i la‘au uma o le vao.

13E tupu a‘e le perosi e sui a‘i le la‘au tuitui,

e tupu a‘e le atasi e sui a‘i le ogogo.

E fai fo‘i ma igoa e vi‘ia ai le ALI‘I,

e fai fo‘i ma fa‘ailoga e fa‘avavau e lē mavae atu lava.