Isaia 30 - Revised Samoan Catholic Bible

‘Ua A‘oa‘iina Isaraelu ‘ina ‘ua Latou Sā‘ili Fesoasoani i Aikupito

1O lo‘o fetalai mai le ALI‘I:

‘Oi talofa i le fānau e fouvale,

o ē faia a latou pule,

‘ae lē fua mai ‘iā te a‘u;

‘ua latou sasa‘a fo‘i le taulaga i mea e inu,

‘ae lē fua mai i lo‘u Agaga;

‘ina ‘ia latou fa‘aopoopo le agasala i le agasala.

2O ē sāvavali e ō ifo i Aikupito,

a ‘ua lē fesili mai ‘iā te a‘u;

‘ina ‘ia fa‘amalolosia i latou i le malosi o Farao

ma ‘ia latou fa‘atuatua i le paolo o Aikupito.

3‘Ae ‘avea le malosi o Farao ma mea tou te mamā ai,

o le fa‘atuatua fo‘i i le paolo o Aikupito,

e fai lea mo ‘outou luma.

4Auā sa i Soana ona ali‘i,

na o‘o fo‘i lana sāvali i Sanesa.

5‘Ua latou mamā uma ‘ona o le nu‘u e le‘i aogā ‘iā te i latou,

e le mafesoasoani, e lē aogā lava, ‘ae fai ma fa‘amā ma luma.

6O le avega a manu i le itū i saute;

o lo‘o ō atu i le nu‘u e i ai puapuagā ma le atuatuvale,

e tutupu mai ai le leona fafine ma le leona,

o le gata ma le gata lele,

latou te ‘ave a latou ‘oloa i tua o asini

ma a latou ‘oa i pona o kamela i le nu‘u e lē aogā ‘iā te i latou.

7Auā o le fesoasoani o Aikupito ‘ua lē aogā,

‘ua leai lava; o le mea lea na a‘u fa‘aigoaina ai o ia,

“O Raava, ‘ua nofonofo i latou.”O le lē Usiusita‘i o Tagata

8O lenei, alu ia ma tusi lenei mea i se papa i o latou luma,

‘ia tusi ai fo‘i i se tusi,

‘ina ‘ia tumau i aso amulī e fa‘avavau fa‘avavau lava.

9Auā o le nu‘u fouvale lenei, o le fānau pepelo,

o le fānau e lē mafafai ‘ona fa‘alogo i le tulafono a le ALI‘I;

10o ē fai atu i tagata va‘ai,

“‘Aua tou te va‘ai;”

latou te fai atu fo‘i i perofeta,

“‘Aua tou te fa‘aali mai ‘iā te i matou mea tonu;

‘inā fai mai ia ‘iā te i matou ‘upu malie,

‘inā fa‘aali mai ia mea pepelo;

11‘alo ‘ese ia ‘outou i le ala;

‘inā ō ‘ese ia i le ala;

‘inā fa‘ate‘a‘eseina ia le Pa‘ia, o Isaraelu i o matou luma.”

12O le mea lea ‘ua fa‘apea ‘ona fetalai mai ai o le Pa‘ia o Isaraelu:

‘Ua ‘outou te‘ena lenei ‘upu

ma ‘ua ‘outou fa‘atuatua i le fa‘asauā

ma le fa‘api‘opi‘o ma ‘ua fa‘alagolago i ai.

13O le mea lea e ‘avea ai lenei amio leaga ‘iā te ‘outou

e pei o se mea ‘ua sofaia o le a pa‘ū,

‘ua oso mai i le pā maualuga,

o lona solo e fa‘afuase‘i mai, ‘ua se ‘emo lava.

14E solo lava ia e pei ‘ona nutilili‘i o le fagu

na faia e le fai ipu ‘omea, ‘ua tu‘inini‘ia;

e lē fa‘asaoina lava;

e lē maua fo‘i se ta‘ega fagu i mea ‘ua nutilili‘ia

e ati a‘e se afi a‘i le avagalafu, pe asu mai ai ni vai ai le vai‘eli.

15Auā o lo‘o fa‘apea ‘ona fetalai mai o le Ali‘i le ATUA, o le Pa‘ia o Isaraelu:

O lē liliu mai ma le filemū e fa‘aolaina ai ‘outou,

o le filemū ma le fa‘atuatua o lo ‘outou malosi lea;

a ‘ua ‘outou lē mafafai.

16A ‘ua ‘outou fai mai,

“E leai, ‘ae sōsōla matou i solofanua;”

o le mea lea tou te sōsōla ai lava;

‘ua ‘outou fai mai fo‘i, “Matou te ti‘eti‘e i mea tele vavave;”

o le mea lea e tele vavave ai i latou o ē tuliloa ‘iā te ‘outou.

17E sōsōla le to‘aafe i le a‘oa‘iga a le to‘atasi;

o le a‘oa‘iga a le to‘alima tou te sōsōla ai lava;

‘inā se‘ia fa‘atotoeina ‘outou e pei se fana i le tumutumu o le mauga,

po o se tagāvai i le mea maualuga.

18‘Ae ui lava i lea e fa‘atalitali le ALI‘I

‘ina ‘ia alofa fua mai ‘iā te ‘outou.

O le mea lea e tala‘i ai o ia e alofa ‘iā te ‘outou;

auā o le ALI‘I, o le Atua e fa‘amasino tonu ia;

‘amu‘ia i latou uma o ē fa‘atalitali ‘iā te ia.O le a Fa‘amanuia le Atua i ona Tagata

19Auā e nonofo le nu‘u i Siona i Ierusalema; ‘e te lē toe tagi lava e matuā alofa o ia ‘iā te oe pe a ē ‘alaga atu; e fa‘afofoga o ia, ‘ona tali atu ai lea o ia ‘iā te oe.

20E avatu e le Ali‘i ‘iā te ‘outou le mea e ‘ai o le ma‘osi‘osi ma le vai e maua ma le tigā; e lē toe lalafi o ‘outou a‘oa‘o, ‘ae va‘ai atu o ‘outou mata i o ‘outou a‘oa‘o.

23‘Ona foa‘i lea e ia le timu i au saito, ‘e te lūlūina ai i le ‘ele‘ele; i le ma mea e ‘ai e tutupu mai i le ‘ele‘ele, e tupu tele ma le lelei; o le aso lea e tata‘a ai au manu i le taaga lautele.

24O povi fo‘i ma asini o ē galulue i le lau‘ele‘ele e ‘a‘ai i latou i mea e ‘ai ‘ua fa‘amasimaina, o le mea ‘ua saviligia i le asu ma le ili.

25O atu mauga maualuluga uma ma mauga maualuluga uma, e i ai vai ola ma vaitafe i le aso o le fasi tele, pe a solo i lalo ‘olo.

26E ‘avea fo‘i le malamalama o le masina e pei o le malamalama o le lā; o le malamalama o le lā e sautuafitu ia e pei o le malamalama o aso e fitu, i le aso e fusi ai e le ALI‘I le gau o lona nu‘u ma fofōina ai le manu‘a e manunu‘a ai i latou.O le Fa‘asalaina e le Atua ‘ia Asuria

27Fa‘auta, o lo‘o afio mai le suafa o le ALI‘I mai le mea mamao;

o lo‘o mū lona to‘asā, e tele fo‘i le mū;

‘ua tūtūmu ona laufofoga i le to‘atama‘i;

o lona laulaufaiva fo‘i, ‘ua peiseaī se afi e ‘ai tele.

28O lona mānava fo‘i e pei o se vaitafe ‘ua oso;

e o‘o i le ua, e lūlū ai nu‘u ‘ese i le lūlū e fano ai;

e i ai fo‘i i le gutu o le nu‘u le fa‘agutu e fa‘asesē ai.

29E ‘iā te ‘outou le pese, e pei ‘ona fai i le po e fai ai le tausamiga pa‘ia; e fiafia fo‘i loto e pei o lē ‘ua ili fano lana fagufagu e o‘o atu i le mauga o le ALI‘I, o le Papa o Isaraelu.

30E fa‘afa‘alogoina e le ALI‘I lona si‘ufofoga silisili, e fa‘aali fo‘i e ia le fa‘apa‘ū ifo o lona ‘a‘ao ma le tele o lona to‘asā ma le mū o le afi ‘ai tele, o le lolo, ma le afā ma le uato‘a.