Salāmo 98 - Revised Samoan Catholic Bible

‘Ia Vi‘ia le Atua e Tagata uma LavaO le salāmo

1‘Ia ‘outou pepese atu i le ALI‘I i le pese fou;

auā o vāvega na na faia;

o lona ‘a‘ao taumatau, o lona lava ‘a‘ao pa‘ia,

‘ua ia fai ai le olataga.

2‘Ua fa‘ailoa mai e le ALI‘I o lana lava fa‘aolataga;

‘ua ia fa‘aalia lana amiotonu i luma o nu‘u ‘ese.

3Na ia manatua lona alofa ma lona fa‘amaoni i le ‘āiga o Isaraelu;

‘ua iloa e tulu‘iga uma o le lalolagi le olataga mai lo tatou Atua.

4‘Ia ‘alalaga i le ALI‘I le lalolagi uma;

‘ia leo tele lava ma ‘ia ‘alalaga fiafia ma ‘ia fai pesega.

5‘Ia ‘outou fai pesega i le ALI‘I i le kitara;

o le kitara ma le leo o le pese.

6O pū ma le leo o le sofao

‘ia ‘outou ‘alalaga ai i luma o le ALI‘I le Tupu.

7‘Ia ta‘alili le sami ‘atoa ma mea ‘ua tumu ai,

o le atu laulau ‘atoa ma ē o nonofo ai.

8‘Ia pati lima vaitafe,

‘ia ‘alalaga fa‘atasi ai mauga ma le fiafia,

9i luma o le ALI‘I; auā o lo‘o afio mai o ia e fa‘amasino le lalolagi;

na te fa‘amasino le atu laulau ma le amiotonu,

‘atoa ma nu‘u i le tonu.