Mareko 16 - Revised Samoan Catholic Bible

O le Toetū A‘e o Iesu mai le Oti(Mata 28.1-8; Luka 24.1-12; Ioane 20.1-10)

1‘Ua mavae le sapati, ‘ona fa‘atau lea e Maria le Makatala, ma Maria le tinā o Iakopo mo Salome, o mea manogi, ‘ina ‘ia latou ō atu e fa‘au‘u ai ‘iā te ia.

2O le taeao lava, o le aso muamua o le vaisapati, ‘ua latou ō atu ai i le tu‘ugamau i le alu a‘e o le lā.

3Na fetautalatala‘i fo‘i i latou, ‘ua fa‘apea ane, “O ai ‘ea sē na te fuli‘eseina le ma‘a mo i tatou i le gutu o le tu‘ugamau?”

4‘Ua latou va‘ava‘ai atu, ‘ona iloa lea, ‘ua uma ‘ona fuli‘eseina o le ma‘a; auā ‘ua matuā telē ia.

5‘Ua ulu atu i latou i le tu‘ugamau, ‘ona latou iloa lea o le taule‘ale‘a e nofo i le itū taumatau, ‘ua ‘ofu o ia i le ‘ofu pa‘epa‘e tātapuvae; ‘ona latou matata‘u ai lea.

6A ‘ua fai atu o ia ‘iā te i latou, “‘Aua tou te matata‘u; o lo‘o ‘outou sā‘ili ‘iā Iesu le Nasareta o lē na fa‘asatauroina; ‘ua tu o ia; e lē o ‘i‘inei; ‘inā matamata ia i le mea na latou tu‘uina ai o ia.

7A ‘ia ‘outou ō atu, ‘inā ta‘u atu i ona so‘o ‘atoa ma Peteru, e muamua atu o ia ‘iā te ‘outou i Kalilaia; tou te iloa ai o ia i lea mea, fa‘apei ‘ona fetalai atu ai o ia ‘iā te ‘outou.”

8‘Ona latou vave ō atu ai lea i fafo, ma sōsōla ‘ese i le tu‘ugamau. ‘Ua maua fo‘i i latou i le gatete, ma le ofo tele lava; ‘ua latou lē fai atu fo‘i se ‘upu i se tasi, auā ‘ua matata‘u.

‘Ua Fa‘aali Iesu ‘iā Maria le Makatala(Mata 28.9-10; Ioane 20.11-18)

9‘Ua tu mai o ia i le taeao lava o le ulua‘i aso o le vaisapati, ‘ona lua‘i fa‘aali lea o ia ‘iā Maria le Makatala, o lē na ia tuli ‘ese ‘iā te ia temoni e to‘afitu.

10‘Ua alu atu ia, ma na ta‘u atu ai ‘iā te i latou o ē sa ‘iā te ia, o latou o fa‘anoanoa ma fētāgisi.

11O i latou fo‘i, ‘ua latou fa‘alogo i le tala ‘ua soifua o ia, ma ‘ua iloa o ia e ia, e le‘i talitonu ai i latou.

‘Ua Fa‘aali Iesu i So‘o e To‘alua(Luka 24.13-35)

12‘Ua mavae atu ia mea, ‘ona fa‘aali mai lea o ia, ‘ua ‘ese mai lona tino, i le isi to‘alua o i latou, o lo‘o la sāvavali atu i le faoa ‘a‘ai.

13‘Ona ō lea o i lā‘ua, ma ta‘u atu ‘iā te i latou uma ‘ae le‘i talitonu i latou ‘iā i lā‘ua.

‘Ua Fa‘aali Iesu i le To‘asefulu ma le To‘atasi(Mata 28.16-20; Luka 24.36-49; Ioane 20.19-23; Galu 1.6-8)

14Mulimuli ane ‘ua fa‘aali mai o ia i le to‘atinoagafulu ma le to‘atasi o ta‘o‘oto i latou e ‘a‘ai; ‘ona a‘oa‘i atu lea o ia ‘iā te i latou ‘ina ‘ua lē fa‘atuatua i latou ma ‘ua loto ma‘a‘a. Auā ‘ua latou lē talitonu ‘iā te i latou o ē na iloa o ia ‘ina ‘ua toetū mai.

15‘Ua fetalai atu fo‘i o ia ‘iā te i latou, “Ō atu ia ‘outou i le lalolagi uma, ‘inā tala‘i atu ai le tala lelei i tagata uma lava.Galu 1.8

16O lē fa‘atuatua ma papatisoina, e fa‘aolaina o ia; a o lē e lē fa‘atuatua, e fa‘asalaina o ia.

17E mulimuli atu fo‘i nei fa‘ailoga i ē fa‘atuatua; e tutuli e i latou temoni i lo‘u igoa; e tautalatala i latou i gagana fou;

18e fetāgofi i latou i gata; ‘āfai fo‘i latou te inu i se mea e oti ai, latou te lē afaina ai lava; e fa‘ae‘e atu fo‘i o latou lima i luga o ē mama‘i, ma fa‘amālōlōina i latou.”

O le Afio A‘e o Iesu i le Lagi(Luka 24.50-53; Galu 1.9-11)

19‘Ua mavae fo‘i ‘ona fetalai atu o le Ali‘i o Iesu ‘iā te i latou, ‘ona ‘aveina a‘e lea o ia i le lagi, ‘ona nofo ai lea o ia i le itū taumatau o le Atua.Galu 1.9-11

20‘Ona latou ō atu lea ma tala‘i atu i mea uma ‘ua galue fa‘atasi le Ali‘i ma i latou, ma ‘ua fa‘amaonia le ‘upu i fa‘ailoga ‘ua mulimuli ane ai.