Salāmo 50 - Revised Samoan Catholic Bible

O le A‘oa‘i a le ALI‘I i ē faia Taulaga ma le Amio LeagaO le salāmo a Asafo

1O le Atua o atua, o le ALI‘I,

‘ua fetalai mai o ia, ma ‘ua vala‘au i le lalolagi

a‘i le mea e alu a‘e ai le lā e o‘o lava i le mea e alu ifo ai.

2O lo‘o pupula mai le Atua mai Siona,

o le mea e silisili ‘ese ‘ona matagofie.

3O lo‘o afio mai lo tatou Atua,

‘ua lē tu‘ua lona si‘ufofoga;

‘ua ma‘ama‘ai le afi i ona luma;

o lo‘o si‘osi‘omia fo‘i o ia i le afā tele lava.

4E vala‘au ia i le lagi i lugā,

‘atoa fo‘i ma le lalolagi,

i le fa‘amasinoina o lona nu‘u.

5“‘Inā fa‘apotopoto mai ia ‘iā te a‘u o‘u tagata amio Atua,

o ē ‘ua osia le feagaiga ma a‘u i le taulaga.”

6E ta‘ua fo‘i e le lagi lana amiotonu;

auā o le Atua o ia lava le fa‘amasino. Selā.

7“‘Inā fa‘alogologo mai ia lo‘u nu‘u e, se‘i ‘ou fai atu;

Isaraelu e, se‘i ‘ou ta‘utino atu fo‘i ‘iā te oe;

o a‘u lava o le Atua, o lou Atua lava.

8E lē ‘ona o au taulaga ‘ou te a‘oa‘i atu ai nei ‘iā te oe,

po o au taulaga mū, ‘ua i ai i o‘u luma e lē aunoa.

9‘Ou te lē ‘avea se povi po‘a a‘i lou fale,

po o se ‘oti po‘a a‘i i ou lotoā.

10Auā o ‘iā te a‘u manu uma i le vao matua,

o manu e tata‘a i mauga e afe.

11‘Ua ‘ou iloa manu felelei uma lava o i atu mauga;

o manu tata‘a fo‘i, o ‘iā te a‘u lava ia.

12“‘Ana ‘ou fia ai, ‘ou te lē ta‘u atu ‘iā te oe;

auā o ‘iā te a‘u le lalolagi ma mea ‘ua tumu ai.

13‘Ou te ‘ai ‘ea i tino o povi po‘a,

pe inu i le toto o oti?

14O le vi‘iga, ‘ia e faia lea ma taulaga i le Atua;

‘ia e avatu fo‘i i lē Silisili‘ese mea na e tautō ai.

15‘ia e vala‘au fo‘i ‘iā te a‘u i le aso e i ai le puapuagā;

‘ou te lavea‘iina ai oe, ‘ona e vivi‘i mai ai lea ‘iā te a‘u.”

16A ‘ua fetalai ane le Atua i le tagata amio leaga,

“Se a ‘ea le mea ‘ua e tautala ai i a‘u tulafono,

ma e ta‘u la‘u feagaiga i lou gutu?

17O oe fo‘i, ‘ua e ‘ino‘ino i le a‘oa‘iga,

ma ‘ua e lafoa‘iina a‘u ‘upu i ou tua.

18‘Ua e iloa atu se gaoi, ‘ona e loto gatasi ai lea ma ia;

‘ua fai fo‘i lou tofi fa‘atasi ma ē mulilulua.

19“‘Ua e lafo ‘upu leaga i lou gutu,

‘ua e fatu fo‘i ‘upu fa‘a‘ole‘ole i lou laulaufaiva.

20‘Ua e nofo ma fai ‘upu i lou uso;

‘ua e fatu fua ni tala i le tama a lou tinā.

21‘Ua e faia ia mea, a ‘ua ‘ou fa‘alologo lava a‘u;

‘e te manatu ‘ea ‘ua tutusa lava a‘u ma oe;

‘ou te a‘oa‘i atu ‘iā te oe,

ma laulau atu ia mea i ou luma.

22“‘Inā mafaufau ia i lenei mea,

o ‘outou o ē fa‘agalogalo i le Atua,

‘ina ne‘i ‘ou saeia ‘outou, ‘ae leai sē na te lavea‘i.

23O lē faia le vi‘iga ma taulaga,

o le āva lea ‘iā te a‘u;

ma lē ‘ua mafaufau i lona ala,

‘ou te fa‘ailoa atu ‘iā te ia le fa‘aolataga mai le Atua.”