Salāmo 86 - Revised Samoan Catholic Bible

O le Tatalo a Tavita i le Atua ‘ina ‘ia Fa‘aola ‘iā te ia a‘i lē ‘ua Sauā ‘iā te IaO le tatalo a Tavita

1Le ALI‘I e,

‘ia liliu mai ou fofoga,

‘ia e fa‘afofoga mai ‘iā te a‘u,

auā ‘ua puapuagātia ma ‘ua mativa lava a‘u.

2‘Ia e leoleoina lo‘u agaga,

auā ‘ua amio Atua lava a‘u.

O oe na, lo‘u Atua e,

‘ia e fa‘aola mai i lau ‘au‘auna o lē ‘ua fa‘atuatua ‘iā te oe.

3Le ALI‘I e,

‘ia e alofa mai ‘iā te a‘u;

auā ‘ou te vala‘au atu ‘iā te oe i aso uma lava.

4‘Ia e fa‘afiafia mai le loto o lau ‘au‘auna;

auā ‘ua fa‘anaunau atu lo‘u loto ‘iā te oe, le Ali‘i e.

5Auā le Ali‘i e,

o oe e lelei ma ‘ua e fa‘amāgalo sala;

e tele fo‘i lou alofa ‘iā te i latou uma o ē vala‘au atu ‘iā te oe.

6Le ALI‘I e,

‘ia e fa‘afofoga mai i la‘u tatalo;

ma e liliu mai i le leo o la‘u ‘ai‘oi.

7O le aso e puapuagātia ai a‘u,

‘ou te vala‘au atu ai ‘iā te oe;

auā ‘e te tali mai ‘iā te a‘u.

8Le Ali‘i e,

e leai lava so le vao atua e tusa ma oe;

e leai fo‘i se galuega e tusa ma au galuega.

9O nu‘u uma na e faia latou te ō mai,

ma latou ifo atu i ou luma, le Ali‘i e;

ma latou fa‘ane‘ene‘e atu i lou suafa.

10Auā e sili oe, o lo‘o e fai fo‘i vāvega;

o le Atua oe, na o oe lava.

11Le ALI‘I e,

‘ia e fa‘asino mai ‘iā te a‘u lou ala,

‘ou te savali i le mea moni mai ‘iā te oe;

‘ia e faia ‘ina ‘ia tasi lo‘u loto e mata‘u i lou suafa.

12Le Ali‘i e, lo‘u Atua,

‘ou te vivi‘i atu ‘iā te oe i lo‘u loto ‘atoa;

‘ou te fa‘ane‘ene‘e atu lava i lou suafa e fa‘avavau.

13Auā e tele lava lou alofa ‘iā te a‘u;

na e lavea‘i mai lo‘u agaga, a‘i seoli e maulalo lava.

14Le Atua e,

‘ua laga mai ‘iā te a‘u o ē fa‘amaualuga,

o le fa‘apotopotoga, fo‘i o ē sauā na latou sā‘ilia mai a‘u e fasioti;

latou te le‘i tu‘uina atu oe i o latou luma.

15A o oe le Ali‘i e,

o le Atua oe lē alofa mutimutivale ma lē alofa fua,

o lē telegese lona to‘asā, ‘ae tele le alofa ma le fa‘amaoni.

16‘Ia e liuliu alo mai ‘iā te a‘u,

ma ‘ia e alofa mai ‘iā te a‘u;

‘ia e foa‘i mai lou malosi i lau ‘au‘auna,

ma ‘ia e fa‘aola mai i le tama tane a lau ‘au‘auna fafine.

17‘Ia e faia se fa‘ailoga mo a‘u ‘ou te lelei ai;

‘ina ‘ia iloa ai ē o ‘ino‘ino mai ‘iā te a‘u, latou te mamā ai;

auā o oe, le ALI‘I e, ‘ua e fesoasoani mai ‘iā te a‘u,

ma e fa‘amafanafana mai ‘iā te a‘u.