Sirako Fa‘atomuaga - Revised Samoan Catholic Bible
Fa‘atomuagaO Peni Sira (fa‘aumi Sirako) o se tagata poto ma o se faia‘oga taualoa i le tulafono i Ierusalema, sa fai lana tusi e fa‘atatau i mea tāua na fiafia o ia i ai. O le Tulafono ma Sauniga lotu o nisi ia o mea tāua ‘iā Sirako auā o mea ia sa sāvavali ma olaina e ona tua‘ā anamuā o Isaraelu. E tāua tele ‘iā Sirako le poto, le amiopulea, galuega lelei, le fa‘autauta auā o nisi ia o ta‘iala o le olaga. O le talitonuga a Sirako o le Atua o le puna‘oa lea o le poto ma e maua lea poto e ala i le tausi lelei i le tulafono. O le Tusi a Sirako sa tusia lava i le gagana Eperu e se tagata e igoa ‘iā Iesu e ui e lē maua i le Tusi Pa‘ia fa‘a-Eperu; a o le atali‘i o lona atali‘i sa ia fa‘aliliuina i le gagana Eleni. O le talitonuga sa tusia lenei tusi po o le 132-117 T.L.M. O le tusi lenei sa talia ma fa‘aaogāina e le Ekalesia i le amataga ma fa‘aigoa o le Ekelesiatiko (tusi aloa‘ia o le Ekalesia) i le gagana Latina.O le Fa‘asologa o Matā‘upu:O le vi‘ia o le poto (Vaega 1) 1.1—23.38a. O galuega ma fautuaga 1.1—16.23e. O le poto o le Atua i le Natura 16.24—23.38O le vi‘ia o le poto (Vaega 2) 24.1—50.28a. O le poto ma amioga lelei 24.1—32.17e. O le poto o le Atua ma galuega a tagata 32.18—42.14i. O le mamalu o le Atua i ana galuega 42.15—43.37o. O le vi‘ia o tua‘ā anamuā 44.1—50.23O Fa‘ane‘ene‘ega i le Atua 50.24—51.38O LE ‘UPU TOMUA A IESU, LE ATALI‘I O SIRAKO‘Ua tu‘ufa‘asolo mai i le tulafono ma le ‘au perofeta ma ē na mulimuli mai ‘iā te i latou, ni a‘oa‘oga e tele ma le aogā lava; o le mea lea ‘ua tatau ai ‘ona vi‘ia o Isaraelu i lona a‘oa‘oina ma lona poto, auā ‘ua lē na ‘ona aliali mai ai le poto o ē ‘ua latou a‘oa‘o mai, a ‘ua mafai ai fo‘i ‘ona matuā popoto ai o tagata ‘ese, ‘ia a‘oa‘o ma tusitusi fo‘i i latou.O le tamā o lo‘u tamā, o Iesu lona igoa, na matuā fa‘asaga atu ma le filigā i le faitau i le tulafono ma le ‘au perofeta ma ni isi fo‘i tusi na tu‘ufa‘asoloina mai e o matou tua‘ā, ‘ona osofia fo‘i lea o ia e tusitusi sana tusi e uiga i le a‘oa‘oga ma le poto, mo i latou e fia a‘oa‘oina, ‘ina ‘ia latou poto ai, ma ‘ia tupu atili ai lo latou to‘aga ma la latou alualu i luma i le olaga fa‘aletulafono.O le mea lea ‘ua ‘ou apoapoa‘i atu ai ‘iā te ‘outou, ‘ia ō mai ma le loto lelei ma faitau i lenei tusi ma le matuā to‘aga ma ‘ia ‘outou fa‘amāgalo mai pe a i ai nisi fuai‘upu na matou fia tusi ai le foliga o le poto, a ‘ua matou le lavātia le liliuga tonu o nisi ‘upu. Auā e lē tusa ‘ona ‘a‘ano o ‘upu fa‘a-Eperu pe ‘āfai ‘ua liliuina i se tasi gagana.E lē gata lenā mea i le tusi lenei, a o le tulafono ma le ‘au perofeta ma isi tusi pa‘ia, ‘ua aliali ai lava le ‘ese‘esega pe a fa‘atatauina le liliuga ma le mea na liliuina mai ai.Na ‘ou alu atu i Aikupito i lona tolusefulu ma le valu o tausaga o le nofoa‘iga a le tupu o Urikete le Amiolelei, na ‘ou mau ai i tausaga e tele ma ‘ua ‘ou maua ai o lenei tusi sa tu‘uina ai, e lē o itiiti pe fa‘atauva‘a le a‘oa‘oga ‘ua i ai. O le mea lea na ‘ou manatu ai o le mea lelei ma le mea tatau o la‘u fa‘asaga atu ma le to‘aga ma le filigā i le liliuga o lenei tusi. E i ai ‘ona ‘ou fa‘aaogāina o si ‘ou poto, o mataala i ni aso e tele, ‘ina ‘ia taulau ai o lo‘u fa‘amoemoe, o le tu‘u atu lenei tusi ‘iā te i latou e fia fa‘asaga o latou loto i le a‘oa‘o i le ala e fa‘atonuina a‘i le aga a i latou ‘ua loto e fa‘atatau lo latou olaga i le tulafono a le Ali‘i.
