Ieremia 46 - Revised Samoan Catholic Bible

O le Valo‘aga i le Malaia a o‘o i Aikupito

1O le afioga a le ALI‘I na o‘o mai ‘iā Ieremia le perofeta i mea a o‘o i nu‘u ‘ese,

2o Aikupito ma le itūtau‘a a Farao Neko le tupu o Aikupito, sa latalata ane i le vaitafe o Eufirate i Karekimisa, o ē na fasia e Nepukanesa le tupu o Papelonia i le fa o tausaga o Ioakima le atali‘i o Iosia le tupu o Iuta:

3‘Inā sauni ia e ‘outou le talitā

ma le talipupuni,

ma fa‘alatalata atu i le tau‘a.

4‘Inā nonoa ia solofanua i kariota ma ‘ia ti‘eti‘e ‘outou i solofanua,

ma tutū atu ma o ‘outou puloutau;

‘Inā fa‘apupula ia o tao

ma ‘ia ‘o‘ofu i ‘ofutau u‘amea.

5O le a ‘ea le mea ‘ua ‘ou iloa atu ai i latou ‘ua mata‘utuia?

‘Ua liutuaina, ‘ua fasia fo‘i o latou toa ma ‘ua alu lo latou tuli,

‘ua latou le tepa i tua; o i ai le mata‘u i itū uma,

‘ua fetalai mai ai le ALI‘I.

6E lē sola le tagata tele vave,

e lē sao fo‘i le toa.

E tausuai i latou ma latou pa‘u‘ū i le itū i matū,

e lata ane i le vaitafe o Eufirate.

7O ai ‘ea lenei ‘ua alu a‘e e pei ‘ona oso o se vaitafe,

‘ua fati tetele mai lona vai e pei o tāfega?

8O lo‘o alu a‘e Aikupito e pei ‘ona oso o se vaitafe,

‘ua fati tetele mai lona vai e pei o tāfega.

‘Ua fa‘apea fo‘i o ia, ‘Ou te alu a‘e,

‘ou te ufitia le lalolagi;

‘ou te fa‘aumatia le ‘a‘ai ma ē o nonofo ai.

9‘Inā ti‘eti‘e ia ‘outou i solofanua ma ‘ia matuā feosofa‘i kariota;

‘inā ō atu ia o toa; o tagata Aitiope ma Futu.

O ē masani ma le talitā ma Luti,

o ē masani ‘ona lolo‘u o le ‘aufana.

10Auā o le aso lenei o le Ali‘i le ATUA o ‘au,

o le aso o le taui ma sui,

e taui atu ai i ē ‘ua ita ‘iā te ia.

E ‘ai fo‘i le pelu ma mā‘ona ma ‘onā i o latou toto;

auā o lo‘o i le Ali‘i le ATUA o ‘au

‘ona fai o le taulaga i le nu‘u i le itū i matū

e lata ane i le vaitafe o Eufirate.

11Le taupou e, le tama teine a Aikupito,

‘inā alu a‘e ia oe i Kiliata ma ‘aumai pulu pasama.

‘Ua e fa‘ateleina vaila‘au ‘ae fai fua;

e leai se togafiti e mālōlō ai oe.

12‘Ua lagona e nu‘u ‘ese lou fa‘amāina,

‘ua tumu fo‘i le lalolagi i lau ‘alaga.

Auā ‘ua tausuai le toa i le toa,

‘ua pa‘u‘ū fa‘atasi i lā‘ua.

‘Ua Si‘i Tau‘a o Nepukanesa

13O le afioga na fetalai mai ai le ALI‘I ‘iā Ieremia le perofeta, ‘ina ‘ua sau o Nepukanesa le tupu o Papelonia e fasi le nu‘u o Aikupito:

14‘Ia ‘outou ta‘u atu i Aikupito,

ma fa‘ailoa atu i Mekatala ma fa‘ailoa atu i Nafi ma Tapanesa.

“‘Ia ‘outou fa‘apea atu, ‘Inā tu mai ia ma ‘ia e sauni;

auā e ‘ai e le pelu i ou itū uma.”

15O le a ‘ea le mea ‘ua ta‘atitia ai ē ‘ua malolosi ‘ua ‘iā te oe?

e le‘i tutū i latou, auā ‘ua tuleia i latou e le ALI‘I.

16‘Ua fa‘ato‘ateleina e ia o ē ‘ua tausuai,

‘ua pa‘u‘ū lava i latou le tasi i luga o le tasi;

‘ona latou fa‘apea ai lea.

“‘Inā tula‘i ia, se‘i tatou fo‘i atu i lo tā tou nu‘u

ma le lau‘ele‘ele na fānanau ai i tatou,

‘ona o le pelu sauā.”

17Na latou ‘alalaga i lea mea,

O Farao le tupu o Aikupito,

“‘ua malaia, ‘ua mavae ona po na ‘atofaina.”

18O lo‘o fetalai mai le Tupu, o le ALI‘I o ‘au lona suafa,

‘Ou te ola a‘u, e sau ia,

e pei o Tapora i le atu mauga ma Karamelu i tai.

19O oe na le tama fafine ‘ua nofo i Aikupito,

‘inā sauni ia o mea e alu ma oe i le tāfeaga.

Auā e gaogao Nafi ma fa‘atafunaina,

e leai sē nofo ai.

20O Aikupito o le povi fafine e matuā tino lelei,

‘ae o‘o mai lava le malaia mai le itū i matū.

21O ona tagata fo‘i na fa‘a‘oloatau‘aina,

o lo‘o i totonu ‘iā te ia e pei ni povi a‘i le fale povi.

A ‘ua liutuaina lava i latou,

‘ua latou sōsōla fa‘atasi, ‘ua latou le tutū.

Auā ‘ua o‘o mai ‘iā te i latou le aso o lo latou malaia,

o ona po e asia mai ai i latou.

22E alu atu lona leo e pei se gata;

auā latou te ō mai ma ‘au

ma latou ō mai ‘iā te ia ma matau,

e pei o tagata ta la‘au.

23Latou te ta lona vao,

‘ua fetalai mai ai le ALI‘I,

Auā e lē masu‘esu‘eina;

auā e sili ‘ona tele i latou i sē akerise,

e lē mafaitaulia fo‘i i latou.

24‘Ua fa‘amāina le tama fafine a Aikupito;

e tu‘uina atu fo‘i o ia i lima o tagata mai le itū i matū.

25O lo‘o fetalai mai le ALI‘I o ‘au, le Atua o Isaraelu: Fa‘auta, ‘ou te taui atu ‘iā Amoni i No, ma Farao ma Aikupito ma ona atua ma ‘ona tupu; o Farao lava ma i latou o ē fa‘atuatua ‘iā te ia;O le a Toe Lavea‘i e le Ali‘i ona Tagata

27A o oe; Iakopo e, la‘u ‘au‘auna,

‘aua ‘e te fefe;

‘aua fo‘i ‘e te mata‘u o oe Isaraelu e,

Auā fa‘auta, ‘ou te fa‘aola ‘iā te oe a‘i le nu‘u mamao,

ma lau fānau a‘i le nu‘u ‘ua tāfea i ai i latou.

E fo‘i mai lava Iakopo, e toto‘a fo‘i o ia ma nofo filemū,

e leai fo‘i se tasi e fa‘amata‘u ‘iā te ia.

28O oe Iakopo e, la‘u ‘au‘auna,

‘ua fetalai mai le ALI‘I,

‘aua ‘e te fefe; auā ‘ou te ‘iā te oe.

E ui lava ‘ina ‘ou matuā fa‘aumatia nu‘u uma ‘ua ‘ou tulia ai oe,

‘ae ‘ou te lē matuā fa‘aumatia oe;

‘ou te a‘oa‘i fa‘atatau fo‘i ‘iā te oe,

‘ae ‘ou te lē matuā fa‘asaoina oe.