Iopu 17 - Revised Samoan Catholic Bible

O isi ‘Upu a le Tali a Iopu ‘iā Elifasa

1‘Ua itiiti la‘u mānava, ‘ua mavae o‘u aso, ‘ua saunia le tu‘ugamau mo a‘u.

2E lē o ‘iā te a‘u ‘ea o ē ‘ua tauemu?

E lē ‘ua ‘ou va‘ai pea ‘ea i lo latou finau vale.

3“‘Ia e tu‘u mai se fa‘amaoni,

‘inā e tu‘u mai ia se fa‘amaoni ‘iā te a‘u i la tā finauga ma oe;

o ai sē ma te fetāgofi o ma lima?

4Auā ‘ua e punitia o latou loto ‘ia lē mafaufau;

o le mea lea ‘e te lē fa‘asilisiliina ai i latou.

5O lē na te fa‘asinoina ana uō i ē vetea mea, e ‘avea mata o ana fānau.

6“‘Ua ia faia fo‘i a‘u ma ‘upu fa‘atusa i le nu‘u;

‘ua ‘inosia fo‘i a‘u i o latou luma.

7‘Ua puaoa fo‘i o‘u mata ‘ona o le fa‘anoanoaga,

ma o‘u itū tino uma e pei o le ata ia.

8E femēmēa‘i tagata amiotonu i lenei mea,

e tula‘i atu fo‘i lē ‘ua lē sala i le tagata fa‘alēmata‘u.

9O lē ‘ua amiotonu e tumau pea o ia i lona ala,

o ia fo‘i ‘ua mamā ona lima e fa‘aopoopoina pea lona malosi.

10A o ‘outou uma, ‘inā fo‘i mai ia, ‘inā ō mai ia;

‘ou te lē iloa lava se tagata poto ‘iā te ‘outou.

11‘Ua mavae atu o‘u aso, ‘ua fa‘alēi‘uina o‘u mafaufauga,

o manatu lava o lo‘u loto.

12‘Ua latou faia le po ma ao;

‘ua latou fa‘apea mai, ‘‘ua latalata le malamalama i le pouliuli.’

13E moni ‘ou te fa‘atalitali atu i le tu‘ugamau e fai mo‘u fale;

‘ou te fofolaina lo‘u moega i le pouliuli.

14‘Ua ‘ou vala‘au i le pala, ‘O lo‘u tamā oe;’ i le ilo fo‘i,

‘O lo‘u tinā’ po o ‘lo‘u tuafafine lea.’

15O i fea o i ai nei fo‘i lo‘u fa‘amoemoe?

O lo‘u fa‘amoemoe fo‘i, po o ai ‘ea na te va‘ai i ai?

16E ō ifo ia i fa‘amau o le tu‘ugamau,

e mapu lava fa‘atasi i le ‘ele‘ele.”