Poto 12 - Revised Samoan Catholic Bible

E Agalelei le Atua

1Le Ali‘i e, o lou agaga ‘ua matuā agaalofa ma le agalelei i mea uma!

2O le mea lava lea ‘ua faifaimālie ai lau fa‘asala atu i ē ‘ua sesē;

‘ua e lapata‘i ma a‘oa‘i ‘iā te i latou ‘ua agasala,

‘ina ‘ia latou tu‘u lo latou loto leaga ma fa‘atuatua ‘iā te oe, le Ali‘i e! O le Agasala a Kanana

3Sa e ‘ino‘ino i ē na mua‘i nonofo i lou lau‘ele‘ele pa‘ia,

4auā sa latou faia ni amioga ‘ua ‘inosia i ou luma,

o mea fa‘ataulāitu ma sauniga matagā;

5sa latou lē alolofa, a ‘ua fasioti i la latou fānau,

sa latou ‘a‘ai o tōtōga o tagata ma inu i lo latou toto,

o soli ai au poloa‘iga pa‘ia.

6O mātua ia na latou fasiotia le fānau vaivai,

‘ua e finagalo fo‘i ‘ia fa‘aumatia i latou i luma o o matou mātua,

7‘ina ‘ia talia ai le ‘au malaga mamalu o le fānauga a le Atua i lenā ‘ele‘ele ‘ua sili ‘ona pele ‘iā te oe.

8A ‘ua e agaalofa fo‘i i ai, auā o tagata lava i latou ma ‘ua e ‘auina atu o lagomumu e muamua atu i lau itūtau‘a,

‘ina ‘ia fa‘aumatia lemū ai i latou.

9E lē ‘ona ‘ua e lē mafaia o le fa‘ato‘ilaloina o tagata amio leaga i le tau‘a i lima o tagata amiotonu,

po o le fa‘aumatia fa‘atasi uma i manu fe‘ai po o sau poloa‘iga mamafa;

10a ‘ua e tu‘uina ai ‘iā te i latou se ala ‘ina ‘ia salamō ai,

‘ona ‘ua faifaimālie lau fa‘asala atu,

e ui ‘ina lē lilo ‘iā te oe o le nu‘u leaga lava i latou,

na fānau lava i latou o leaga o latou loto ma ‘ua lē mafai lava ‘ona liua o latou manatu e o‘o i le fa‘avavau.

11Auā o le fānauga malaia i latou talu mai i le amataga;

e lē o sou mata‘u fo‘i i se to‘atasi na e agaalofa ai ‘iā latou agasala. O le Atua e Mamana

12Auā po o ai a fai atu ‘iā te oe, “O ā mea na e faia?”

Po o ai fo‘i na te tete‘e atu i lau fa‘amasinoga?

Po o ai e tu i ou luma e fautua o ia mo tagata amio leaga?

Po o ai fo‘i na te ta‘uleaga ‘iā te oe pe a e fa‘aumatia o nu‘u na e faia?

13Auā e lē o i ai se tasi Atua, ‘ua na o oe ‘ua e tausia mea uma,

‘ina ‘ia e fa‘aalia ai ‘ua e lē faia sau fa‘amasinoga ma le fa‘alētonu.

14E lē o i ai se tupu po o se faipule na te mafaia ‘ona fesili atu i ou luma e uiga ‘iā i latou na e fa‘aumatia.

15O oe o le amiotonu, o lea ‘ua e fa‘atatauina mea uma ma le amiotonu,

ma ‘ua e tāofi ifo ‘ua lē tusa ma lou mana ‘ona e fa‘asalaina lē ‘ua lē sala.

16Auā o lou mana o le fa‘avae lea o le amiotonu;

o oe fo‘i o le Ali‘i o tagata uma, o le mea lea ‘ua e agalelei ai i tagata uma.

17A ‘ua e fa‘aali lou malosi ‘iā te i latou ‘ua lē talitonu ‘ua ‘iā te oe le mana uma

ma ‘ua māsiasi ai le fa‘amaualuga o ē ‘ua latou lē iloa oe.

18‘Ua e pule i lou lava mana ma ‘ua e fa‘amasino ‘iā i matou ma le agamālie.

‘Ua e tausi ‘iā i matou ma le agaalofa tele,

auā ‘e te mafaia pea ‘ona fa‘aaogā lou mana pe a e finagalo i ai.

19O āu galuega ia na e a‘oa‘o atu ai i lou nu‘u ‘ua tatau i le tagata amiotonu ‘ona agaalofa fo‘i o ia.

Ma ‘ua e fa‘atupuina i lau fānau le fa‘amoemoe lelei,

auā o lau fa‘amasinoga ‘ua e tu‘uina ai i ē agasala se tulaga ‘ina ‘ia salamō ai.

20Auā, ‘āfai ‘ua fa‘apea o lou fa‘aeteete i le fa‘asalaga o fili o au ‘au‘auna,

e ui ‘ina ‘ua tatau i ai le oti; ma ‘ua e tu‘uina atu ‘iā te i latou o aso

ma ala e taugalemū ai ‘ina ‘ia liliu ‘ese i latou i lo latou leaga;

21pe fa‘apefea la o lou filigā i le fa‘amasinoga o lau lava fānau,

‘ua e tu‘uina mai i o latou mātua o tautoga ma feagaiga fa‘atasi ma folafolaga lelei!

22‘Āfai ‘ua e tu‘u mai sina fa‘asalaga, a ‘ua e sasa lava o matou fili i le sasa sautualasi,

‘ina ‘ia a‘oa‘oina ai i matou, pe a matou fa‘amasino i ni isi.

‘Ia matou manatua ai lou agalelei; ‘ae a fa‘amasinoina i matou,

‘ia matou fa‘alagolago ai i lou agaalofa. O le Fa‘asalaga o Aikupito

23O le mea lea na e matuā fa‘atigāina ai i latou ‘ua fa‘amaumau fa‘avalea o latou olaga i le agasala,

‘ua e fa‘atigāina lava i mea sa latou ifo i ai.

24Auā na fa‘asevasevaloaina i latou i ala sesē,

o tāofi ifo o ni atua o manu e aupito fa‘atauva‘a,

o ola i latou e pei o ni tama valevale.

25O le mea lea na e fa‘asalaina ai i latou i se sala taufa‘a‘ata,

e pei lava o ni tama valevale.

26‘Ae ‘ona ‘ua lē toe fuata‘i a latou amio i ni a‘oa‘iga fa‘atausua,

o lea ‘ua e fa‘asalaina i latou i se sala ‘ua tatau i le Atua.

27Auā na tigā o latou loto ‘ona ‘ua fa‘apuapuagātia o mea sa latou atua i ai.

‘Ua va‘ai atu ‘ua fa‘aumatia ai i latou, ‘ona latou iloa ai fo‘i lea,

o le Atua moni lenā sa latou fa‘afiti ‘ona iloa o ia i aso muamua.

O le mea fo‘i lea ‘ua pa‘ū ai i o latou luga le i‘uga o la latou fa‘asala.