Fa‘ata‘oto 2 - Revised Samoan Catholic Bible

O le Aogā o le Poto

1Lo‘u atali‘i e,

‘āfai ‘e te talia a‘u ‘upu ma e teu i lou loto a‘u poloa‘iga,

2e ua‘i atu ai ou taliga i le poto,

e fa‘asaga atu ai lou loto i le fa‘autauta.

3‘Āfai lava ‘e te vala‘au atu i le atamai ma e leo tele atu i le fa‘autauta;

4‘āfai ‘e te sā‘ili‘ili ‘iā te ia, e pei ‘ona sā‘ili‘ili i le ario;

‘āfai ‘e te su‘esu‘e i ai, pei ‘ona su‘esu‘e i le ‘oloa lilo;

5‘ona e lagona ai lea o le mata‘u i le ALI‘I

ma e maua ai le poto i le Atua.

6Auā o le ALI‘I na te foa‘i mai le poto mai lona fofoga le poto ma le fa‘autauta;

7na te teua le poto mo e amio sa‘o;

o le talitā o ia i ē ‘ua tonu lo latou savali,

8‘ina ‘ia leoleo i ala o le amiotonu;

e tausi fo‘i e ia le ala o ona tagata amio Atua.

9‘Ona e lagona ai lea o le amiotonu ma le fa‘amasinoga

ma le amio sa‘o, o ala lelei uma lava.

10A o‘o le poto i lou loto ma ‘ua mālie ‘iā te oe le atamai;

11e fa‘afeao le mafaufau ‘iā te oe;

e leoleo ‘iā te oe le fa‘autauta;

12‘ina ‘ia lavea‘i ‘iā te oe a‘i le ala leaga;

a‘i le tagata ‘ua tautala i mea fa‘api‘opi‘o.

13O ē tu‘ua ala tonu, ‘ae ui atu i ala pogisā;

14o ē fiafia e fai mea leaga;

‘ua latou ‘oli‘oli i le fa‘api‘opi‘o e leaga;

15o ē fa‘api‘opi‘o i o latou ala ma vaogatatā ‘iā latou amio.

16E lavea‘i ‘iā te oe a‘i le fafine ‘ese,

o le fafine ‘ese na te fa‘a‘ole‘ole i ana ‘upu.

17O lē na te tu‘ua lē na tausi ‘iā te ia a o teine muli;

‘ua galo fo‘i ‘iā te ia le feagaiga a lona Atua.

18Auā e taunu‘u atu lona fale i le oti ma ona ala i agaga o ē ‘ua oti;

19o i latou uma o ē ō atu ‘iā te ia, e lē fo‘i mai i latou;

latou te lē maua ala o le ola.

20‘Ina ‘ia e savali i le ala o ē lelei ma e tausiusi i ala o ē amiotonu.

21Auā o ē amio sa‘o, latou te mau i le nu‘u;

ma ē ‘ua sao a latou amio, e fa‘atotoeina ai i latou;

22‘ae vavae‘eseina o ē amio leaga ai le lau‘ele‘ele,

e lia‘iina ai fo‘i o ē amio pepelo.