Salāmo 150 - Revised Samoan Catholic Bible

‘Ia Matuā vivi‘i atu i le Atua

1‘Ia ‘outou vivi‘i atu i le ALI‘I.

‘Ia ‘outou vivi‘i atu i le Atua i lona malumalu;

‘ia vivi‘i atu ‘outou ‘iā te ia i le vā nimonimo o i ai lona malosi.

2‘Ia ‘outou vivi‘i atu ‘iā te ia ‘ona o ana mea mamana;

vivi‘i atu ‘iā te ia e tusa ma lona silisili ‘ese.

3‘Ia ‘outou vivi‘i atu ‘iā te ia i le leo o le pū;

vivi‘i atu ‘iā te ia i le napeli ‘atoa ma le kitara.

4‘Ia ‘outou vivi‘i atu ‘iā te ia i le topa ma le siva;

vivi‘i atu ‘iā te ia i le menima ma le fa‘aili.

5‘Ia ‘outou vivi‘i atu ‘iā te ia i sumepalo ta‘alili;

vivi‘i atu ‘iā te ia i sumepalo leo tetele.

6‘Ia vivi‘i atu i le ALI‘I o mea uma lava e mānava.

‘Ia ‘outou vivi‘i atu i le ALI‘I.