1‘Ua fetalai mai le ALI‘I:
Alu ifo ia, ‘inā e nofo i le efuefu,
o oe le taupou le tama teine a Papelonia.
‘Inā nofo i le ‘ele‘ele, e leai se nofoāli‘i,
o oe le tama teine a Kaletaia;
Auā e lē toe ta‘ua oe,
O lē ‘ua tino vaivai ma le fa‘apelepeleina.
2Tago ia i ma‘aolo ma e olo falaoa;
su‘esu‘e lou ‘ie ufimata,
agini a‘e ia le ‘ofu la‘ei, fa‘aaliali lou vae,
asa atu i vaitafe.
3E fa‘aalia lou tino, e va‘aia fo‘i lou mā;
‘ou te taui ma sui,
‘ou te lē mafai ‘ona ia tu mai se tagata.
4O lē nā fa‘atauina i tatou,
o le ALI‘I o ‘au lona suafa, o le Pa‘ia o Isaraelu.
5‘Ua fetalai mai le ALI‘I:
Nofo fa‘alologo ia, ma e alu i le pouliuli,
o oe le tama teine a Kaletaia;
auā e lē toe ta‘ua oe,
O le tama‘ita‘i e pule i mālō.
6Na a‘u tigā i lo‘u nu‘u, na ‘ou fa‘atagaina lo‘u tofi;
na ‘ou tu‘uina atu i latou i lou lima,
na o le alofa lava ‘iā i latou,
na e matuā fa‘amamafaina lau amo i luga o toeaina.
7Na e fai ane fo‘i,
“E fai a‘u ma tama‘ita‘i e fa‘avavau;”
o lea na e lē mafaufau ai i nei mea,
‘ua e lē manatua le i‘uga o ia mea.
8O lenei, fa‘alogo mai ia i lenei mea,
o oe lē sa‘oloto i mea a le tino,
o lē nofo fa‘atalanoa, o lē fai ifo i lou lava loto,
“‘Ua na o a‘u; ‘ae leai lava se tasi;
‘ou te lē nofo e pei o le fafine ‘ua oti lana tane,
‘ou te lē iloa ‘ona āufānaua.”
9E o‘o mai lava ‘iā te oe nei mea e lua,
e fa‘afuase‘i i le aso e tasi,
o le āufānaua ma le oti o lau tane.
E ui lava i le tele o au togafiti fa‘ataulāitu,
ma le malosi o au ‘apere e matuā o‘o mai lava ‘iā te oe.
10‘Ua e fa‘atuatua fo‘i i lou leaga;
‘ua e fai ane, “E leai se iloa mai a‘u;” o lou poto ma lou malamalama.
O mea lava ia ‘ua fa‘aliliu‘eseina ai oe;
‘Ua e fa‘apea ifo fo‘i i lou lava loto,
“‘Ua na o a‘u lava, ‘ae leai se tasi.”
11O le mea lea e o‘o mai ai le leaga ‘iā te oe,
‘e te lē iloa ‘ona gafoa o lona ata.
E pa‘ū i ou luga le malaia ‘e te lē mafai ai sona togiola;
e o‘o mai fo‘i ‘iā te oe le fa‘atafunaina,
e fa‘afuase‘i; ‘e te lē iloa.
12‘ia e finau i au ‘apere ma le tele o au togafiti fa‘ataulāitu,
‘ua e lailoa ai talu ‘ina e itiiti.
Ai lava ‘ua aogā ‘iā te oe,
ai lava ‘e te fa‘amata‘u mai ai.
13‘Ua tigāina oe i le tele o au filifiliga;
se‘i tutū mai o ē vaevaea le lagi,
o ē va‘ava‘ai i fetū, o ē ‘i‘ite i ona po o le masina fa‘ato‘ā va‘aia,
ma latou fa‘aolaina oe i mea o le a o‘o ‘iā te oe.
14Fa‘auta, e ‘avea i latou e pei o tagutugutu o saito;
e susunuina i latou i le afi;
E lē lavea‘iina i latou e i latou a‘i le malosi o le mumū o le afi.
E leai se malala ola e mumulu ai,
po o se afi e nofo atu ai i ona luma.
15E fa‘apea lava ‘iā te oe o i latou ‘ua e lailoa ai;
o ē ‘ua fa‘atau ma oe talu ‘ina e teineitiiti.
E ta‘itasi ma alu i lona lava ala;
e leai sē na te fa‘aola ‘iā te oe.
Who We AreWhat We EelieveWhat We Do
2025 by iamachristian.org,Inc All rights reserved.
