Iopu Fa‘atomuaga - Revised Samoan Catholic Bible

Fa‘atomuagaO le tusi a Iopu o le tala i le tagata amio lelei ma le fa‘atuatua moni i le Atua ‘ua maua i tigā ma mala faigatā. ‘Ua maliliu uma lana fānau, ‘ua ‘ave‘esea uma ana ‘oloa, o lona tamao‘āiga ‘ae maise le ma‘i faigatā sa maua ai o ia. O lo‘o fa‘aali mai e le tusitala le taumafai o Iopu ma ana uō e tali atu i nei faigatā. E tolu ni vaega o talatalanoaga o lo‘o tusi fa‘atauloto ‘ua fa‘aaogāina e le tusitala e talanoaina pea o le tala o le feso‘ota‘iga a le Atua ma tagata. E fa‘apenā fo‘i ‘ona feso‘ota‘i mai le Atua ‘iā Iopu e ala i lona fa‘aali mai ‘iā te ia i le fa‘ai‘uga o lenei tala.‘Ua fa‘amatalaina puapuagā o Iopu e ana uō i lagona fa‘atapua‘iga i nā ona po. Sa i ai se manatu na agasala Iopu ‘ona o le tele o mafatiaga na o‘o ‘iā te ia. O se manatu lea sa tupu ‘ona o se talitonuga masani, e tauia e le Atua le amio lelei ‘ae fa‘asala e ia le amio leaga. ‘Ua faigofie tele lea manatu pe ‘āfai e fa‘atatau ‘iā Iopu. E lē tatau ‘ona tigāina Iopu fa‘apenei ‘ona e foliga mai sa tulaga ‘ese lona lelei ma le amiotonu. ‘Ua lē mafai ‘ona malamalama Iopu pe fa‘apefea ‘ona fa‘ataga e le Atua nei mea leaga e tele e o‘o mai ‘iā te ia. ‘Ua fa‘apenā ai ‘ona loto tele Iopu e tautala atu. E le‘i ‘ave‘esea le fa‘atuatua o Iopu ‘ae ‘ua naunau pea lona loto ‘ia ta‘uamiotonuina i luma o le Atua. ‘Ua ia toe maua lona mamalu o ia o se tagata amio lelei.E le‘i tali le Atua i fesili a Iopu ‘ae ‘ua tali mai i le fa‘atuatua o Iopu e ala i lona fa‘atumuina o ia i le mamalu o lona mana ma lona poto. ‘Ona ‘avea lea ma mea na talia ai e Iopu i le loto maulalo le atamai ma le silisili ‘ese o le Atua ma ia salamō ai i ‘upu leaga, ‘upu o le ita sa ia tautala ai.O lo‘o tusia i le fa‘ai‘uga o le tala le toe o‘o o Iopu i le tulaga muamua sa i ai muamua lona olaga ma ‘ua fa‘ateleina lona tamao‘āiga i lo le mea sa i ai muamua. ‘Ua a‘oa‘i atu fo‘i le Atua i uō a Iopu ‘ona o lo latou le malamalama i le uiga o puapuagā o Iopu. E na o Iopu lava na malamalama i le silisili ‘ese o le Atua ma manatu sa taotaomia ai le ola tapua‘i o tagata.O le Fa‘asologa o Matā‘upu:Fa‘atomuaga 1.1—2.13O Iopu ma ana uō 3.1—31.40a. O le faitioga a Iopu 3.1-26e. O le talanoaga muamua 4.1—14.22i. O le talanoaga lona lua 15.1—21.34o. O le talanoaga lona tolu 22.1—27.23u. ‘Ua vi‘ia le poto 28.1-28f. O le toe ‘upu a Iopu 29.1—31.40O ‘upu a Eliu 32.1—37.24‘Ua tali mai le Ali‘i ‘iā Iopu 38.1—42.6O le fa‘ai‘uga 42.7-17