Salāmo 138 - Revised Samoan Catholic Bible

O le Vi‘iga i le ALI‘I i lona Agalelei MaiO le Salāmo a Tavita

1‘Ou te vivi‘i atu ‘iā te oe ma lo‘u loto ‘atoa;

‘ou te fai pesega ‘iā te oe i luma o atua.

2‘Ou te ifo i lou malumalu pa‘ia,

‘ou te vivi‘i atu fo‘i i lou suafa ‘ona o lou alofa ma lou fa‘amaoni;

auā ‘ua e fa‘asilisili lau afioga i lou suafa uma.

3O le aso na ‘ou vala‘au atu ai ‘iā te oe,

‘ua e tali mai ai ‘iā te a‘u;

na e fa‘ateleina mai le malosi ‘iā te a‘u.

4Le ALI‘I e,

e vivi‘i atu ‘iā te oe o tupu uma lava o le lalolagi,

pe a latou fa‘alogo i afioga a lou fofoga.

5E pepese fo‘i i latou i ala o le ALI‘I;

auā e tele le mamalu o le ALI‘I.

6Auā o lo‘o maualuga le ALI‘I,

e silasila mai o ia i lē ‘ua fa‘amaulalo;

a o lē ‘ua fa‘amaualuga, e silafia mamao mai e ia.

7A a‘u savali i totonu o puapuagā,

‘e te fa‘aolaola mai ‘iā te a‘u;

‘e te fa‘ao‘o atu fo‘i lou ‘a‘ao i le ita o ē ita mai ‘iā te a‘u;

‘e te fa‘aola mai ‘iā te a‘u i lou ‘a‘ao taumatau.

8E fa‘ataunu‘uina e le ALI‘I o mea uma mo a‘u;

le ALI‘I e, e o‘o i le fa‘avavau lou alofa;

‘aua ‘e te tu‘ulafoa‘iina le galuega a ou ‘a‘ao.