Isaia 50 - Revised Samoan Catholic Bible

O le Agasala a le Nu‘u na Tigāina ai i Latou

1O lo‘o fa‘apea ‘ona fetalai mai o le ALI‘I:

O fea le tusi alei a lo ‘outou tinā na a‘u fa‘ate‘a ai o ia?

Po o ai le tagata ‘ua ‘ou ‘aitalafu i ai,

na a‘u fa‘atauina atu ai ‘outou ‘iā te ia?

Fa‘auta mai, ‘ona o a ‘outou amio leaga

‘ua fa‘atauina atu ai ‘outou;

‘ona o a ‘outou solitulafono ‘ua fa‘ate‘a ai lo ‘outou tinā.

2Na a‘u sau, o le a lava le mea na leai ai se tasi?

Na a‘u vala‘au, se a le mea ‘ua leai ai sē na tali mai?

‘Ua fa‘apu‘upu‘uina ‘ea lo‘u lima, ‘ou te lē mafa‘aola ai?

Pe leai ‘ea se malosi ‘iā te a‘u e lavea‘i ai?

Fa‘auta, o la‘u a‘oa‘i atu e pa‘umatūina ai le sami,

e fai fo‘i e a‘u o vaitafe ma nu‘u naumati;

e elo i‘a ‘ua i ai ‘ona ‘ua leai se suāvai,

e mamate fo‘i i le fia inu.

3‘Ou te fa‘a‘ofuina le lagi i le fa‘auliuli;

‘ou te faia fo‘i le ‘ie talatala ma mea e ufiufi a‘i.

O le Usita‘i o le ‘Au‘auna a le Ali‘i

4‘Ua foa‘i mai ‘iā te a‘u e le Ali‘i le ATUA

le laulaufaiva o ē ‘ua a‘oa‘oina,

‘ina ‘ia ‘ou iloa ‘ona fa‘amafanafana i se ‘upu i lē ‘ua tigāina.

Na te fāgua a‘u i lea taeao ma lea taeao;

na te fāgua o‘u taliga,

‘ina ‘ia ‘ou fa‘alogologo e pei o ē ‘ua a‘oa‘oina.

5‘Ua tōina le puipui o o‘u taliga e le Ali‘i le ATUA,

a ‘ou te le‘i finau vale;

‘ou te lē fo‘i atu lava.

6Na a‘u tu‘uina atu lo‘u tua i ē sasa mai,

ma o‘u alāfau i ē futi le ‘ava;

‘ou te le‘i ufiufi fo‘i o‘u mata i le mā ma le feanu.

7A o le Ali‘i le ATUA e fesoasoani mai o ia ‘iā te a‘u;

o le mea lea ‘ou te lē mā ai.

O le mea lea ‘ua ‘ou faia o‘u mata ‘ia pei o le papa alā;

‘ua ‘ou iloa fo‘i e lē fa‘amāina a‘u.

8O lo‘o ‘ua latalata mai lē na te ta‘uamiotonuina a‘u.

O ai ‘ea se finau ma a‘u?

se‘i ma tutū fa‘atasi;

O ai se finau mai?

‘ia fa‘alatalata mai o ia ‘iā te a‘u.

9Fa‘auta, o le Ali‘i le ATUA,

na te fesoasoani mai ‘iā te a‘u.

O ai ‘ea se na te fa‘asalaina mai?

Fa‘auta, e pala i latou uma e pei o le ‘ofu;

e ‘aina e le mogamoga.

10O ai ‘ea so ‘outou ‘ua mata‘u i le ALI‘I,

o lo‘o fa‘alogo i le ‘upu a lana ‘au‘auna,

e lē savali i le pouliuli, ‘ae leai sona malamalama?

‘Ia fa‘atuatua o ia i le suafa o le ALI‘I

ma fa‘alagolago i lona Atua.

11Fa‘auta mai ‘outou uma o ē si‘a se afi;

‘ua si‘omia ‘outou e ‘outou i aloiafi.

Sāvavali ia i le malamalama o lo ‘outou afi,

ma aloiafi o lo ‘outou afi;

e o‘o ‘iā te ‘outou lenei mea a‘i lo‘u lima,

tou te ta‘o‘oto i le tigā.