Isaia 17 - Revised Samoan Catholic Bible

O le Malaia o Tamaseko

1O le avega a Tamaseko.

Fa‘auta, ‘ua ‘ave‘eseina Tamaseko,

e lē fai ma ‘a‘ai;

e ‘avea ma faupuegafale ‘ua pa‘u‘ū.

2E tu‘ulafoa‘iina ‘a‘ai o Aroeru;

e fai mo lafu manu,

latou te ta‘o‘oto ai,

e leai fo‘i sē fa‘amata‘u i ai.

3E fa‘aumatia le ‘olo i Efaraima,

ma le mālō i Tamaseko,

‘atoa ma ē o totoe o nu‘u o Suria;

e pei o le mamalu o le fānauga a Isaraelu

e fa‘apea lava i latou,

o lo‘o fetalai mai ai o le ALI‘I o ‘au.

4O lea aso fo‘i e fa‘aitiitia ai le mamalu o Iakopo,

e tino vale fo‘i o ia sa puta.

5E ‘avea ai fo‘i e fa‘apei ‘ona ao o saito o tu e lē ‘ua selesele,

na te selesele fo‘i ‘au saito i lona lima;

e ‘avea lava e fa‘apei o lē ao ‘au saito i le vanu o sa Rafā.

6E totoe fo‘i i ai nai toe fuifui vine,

a fa‘apei ‘ona sasaina ifo o olive e lua

pe tolu nai fua i le tumutumu o le la‘au;

e fa pe lima i la la‘au e fua;

o lo‘o fetalai mai ai le ALI‘I le Atua o Isaraelu.

7O lea aso e fa‘asaga atu ai le tagata i Lē na faia o ia, e va‘ava‘ai atu fo‘i ona mata i le Pa‘ia o Isaraelu.

11o le aso ‘e te totō ai ‘e te si‘o ai i le pā,

o le taeao fo‘i ‘e te fa‘atupuina lau fua ‘ia olaola;

‘ae sola le fuata i le aso na fai a maua mai ai,

e i ai le tigā e tele lava.

E Fa‘ato‘ilaloina Mālō malolosi Uma

12Auē! le vāvāō o nu‘u e tele;

‘ua latou vāvāō e pei o le ta‘alili o le sami;

o le u fo‘i o nu‘u,

‘ua latou u e pei o le u o vai tetele.

13‘Ua u nu‘u e pei ona u o vai tetele,

‘ae a‘oa‘i o ia ‘iā te i latou,

‘ona sōsōla mamao ai lea;

e tuli‘eseina fo‘i i latou

e pei ‘ona lelea o le aputi o saito i mauga i le matagi,

e pei o le mea ta‘avalevale fo‘i i le asiosio.

14A o‘o i le afiafi, fa‘auta, o le mata‘u;

a o le‘i o‘o i le taeao, ‘ua leai lava i latou.

O le tofi lea o ē ‘ua fa‘asauā mai ‘iā te i tatou,

o le tofi fo‘i o ē ‘ua vete a tatou mea.