Salāmo 43 - Revised Samoan Catholic Bible

O le Tatalo ‘ia Lavea‘iina i ē ita Mai

1Le Atua e,

‘ia e fa‘amasino ‘iā te a‘u,

ma ‘ia e faia la‘u finauga i le nu‘u fa‘alealofa.

‘Ia e lavea‘i mai ‘iā te a‘u,

a‘i le tagata fa‘a‘ole‘ole ma le amio leaga.

2Auā o oe o le Atua ‘ou te malosi ai;

se a le mea ‘ua e lafoa‘i mai ai ‘iā te a‘u?

Se a le mea ‘ou te fealua‘i ai ma le ‘ele‘elea,

‘ona o le sauā o lē ‘ua ita mai?

3‘Ia e ‘a‘auina lou malamalama ma lau ‘upu moni,

‘ia la ta‘ita‘i mai ‘iā te a‘u,

‘ia la fa‘ao‘o ‘iā te a‘u i lou mauga pa‘ia

ma lou malumalu.

4‘Ona ‘ou alu atu ai lea i le fatafaitaulaga o le Atua,

o le Atua ‘ou te matuā fiafia i ai.

Le Atua e, lo‘u Atua,

‘ou te vivi‘i atu ‘iā te oe i le kitara.

5Lo‘u agaga e,

se a ‘ea le mea ‘ua e fa‘anoanoa ai?

‘Ua atuatuvale fo‘i oe i totonu ‘iā te a‘u i se a?

‘Ia e fa‘amoemoe i le Atua,

auā ‘ou te toe vivi‘i ‘iā te ia,

o lo‘u fa‘aolataga ia ma lo‘u Atua.