Salāmo 57 - Revised Samoan Catholic Bible

‘Ua Vivi‘i atu Tavita i le Atua lē Fa‘aola ‘iā te ia a‘i le Sauā o TagataMa le usu pese. Ne‘i e fa‘aumatia. O le salāmo a Tavita, ‘ina ‘ua sola ia i le ana mai ‘iā Saulo

1Le Atua e,

‘ia e alofa mai ‘iā te a‘u,

‘ia e alofa mai ‘iā te a‘u;

auā ‘ua ‘ou fa‘atuatua lava ‘iā te oe;

‘ou te fa‘atuatua, fo‘i i le paolo o ou ‘apa‘au,

se‘ia mavae atu nei mea leaga.

2‘Ou te vala‘au atu i le Atua silisili ‘ese;

o le Atua lava na te fa‘ataunu‘uina mea uma mo a‘u.

3E ‘auina mai e ia mai le lagi,

ma fa‘aola mai ‘iā te a‘u,

a o ‘upu leaga mai lē ‘ua naunau i le fia maua o a‘u.

E ‘auina mai e le Atua o lona alofa ma lona fa‘amaoni.

4‘Ua i le vā o leona lava a‘u;

e ta‘oto lava a‘u i le vā o ē o mumū mai o latou ita,

o le fānau a tagata i latou,

o latou nifo o tao ma ū fanafana ia,

o pelu ma‘ai fo‘i o latou laulaufaiva.

5Le Atua e,

‘ia fa‘asilisiliina oe i le lagi;

‘ia i ai i le lalolagi uma lou mamalu.

6‘Ua latou saunia se ‘upega i le mea ‘ou te ui ai;

‘ua fa‘avaivai ai lo‘u loto;

‘ua latou ‘elia se lua ‘ou lumana‘i,

‘ua pa‘u‘ū i ai i latou. Selā.

7Le Atua e,

‘ua mau lo‘u loto,

‘ua mau lava lo‘u loto;

‘ou te pese lava ma ‘ou fai pesega.

8Ala mai ia lo‘u mamalu,

ala mai ia le napeli ma le kitara;

‘ou te ala i le taeao lava.

9Le ALI‘I e,

‘ou te vivi‘i atu ‘iā te oe i luma o le nu‘u;

‘ou te fai pesega ‘iā te oe i luma o tagata.

10Auā e tele lou alofa ‘ua o‘o i le lagi,

e tele fo‘i lou fa‘amaoni ‘ua o‘o i ao.

11Le Atua e,

‘ia fa‘asilisiliina oe i le lagi;

‘ia i ai i le lalolagi uma lou mamalu.