Kenese 50 - Revised Samoan Catholic Bible

‘Ua Tanumia o Iakopo

1‘Ona fa‘apa‘ū atu lea o Iosefa i fofoga o lona tamā, ‘ua tagi ai i ona luga ma sogi ‘iā te ia.

2‘Ona poloa‘i lea o Iosefa i ana ‘au‘auna foma‘i ‘ia latou atualala i lona tamā; ona atualalaina lea o Isaraelu e foma‘i.

3‘Ua ‘atoa ona aso e fagafulu, auā o lo‘o fa‘apea ‘ona fa‘a‘atoa o aso o ē ‘ua atualalaina. ‘Ua tagi fo‘i Aikupito ‘iā te ia e fitugafulu ona aso.

4‘Ua mavae aso na taufaitagi ai, ‘ona fai atu lea o Iosefa i le ‘āiga o Farao, o lo‘o fa‘apea atu, “‘Āfai ‘ua ‘outou alofa mai ‘iā te a‘u, ‘ia fa‘apea ‘ona ‘outou fetalai ane ‘iā Farao;

5Na fai mai lo‘u tamā ‘iā te a‘u ‘ou te tautō atu ‘iā te ia, ‘ua fa‘apea mai, ‘Fa‘auta, o a‘u nei o le a a‘u oti; o le tu‘ugamau na ‘ou ‘elia mo‘u i le nu‘u o Kanana, o le mea lava lea ‘e te tanumia ai a‘u; o lenei, se‘i tu‘u mai ‘ia a ‘ou alu a‘e o tanu i lo‘u tamā, ‘ona ‘ou fo‘i mai lava lea.’”

6‘Ona fai mai lea o Farao, “‘Inā alu a‘e ia ma tanu lou tama, pei ‘ona e tautō atu ‘iā te ia.”

7‘Ona alu a‘e lea o Iosefa ‘ina ‘ia tanu lona tamā; na ō a‘e fo‘i fa‘atasi ma ia o ‘au‘auna uma a Farao, o toeaina o lona ‘āiga ma toeaina uma lava o le nu‘u o Aikupito;

8‘atoa ma le ‘āiga uma o Iosefa, ma ona uso, ma le ‘āiga o lona tamā, ‘ina o tamaiti ma lafu mamoe ma povi, na tu‘ua ia e i latou i le nu‘u o Kosena.

9Na ō a‘e fo‘i fa‘atasi ma ia o nofoa fa‘ata‘avalevale ma ē ti‘eti‘e i solofanua, sa matuā to‘atele lava.

10‘Ua latou o‘o i le fale e soli ai saito o Atatu, o lo‘o i tala atu i Ioritana; ‘ona latou taufaitagitu‘i ai lea i le tagitu‘i ‘ua matuā tele lava; ‘ua fai ai le fa‘anoanoa ‘ona o lona tamā e fitu ona aso. o lo‘o i tala atu o Ioritana.

12‘Ua faia e ona atali‘i ‘iā te ia, e fa‘apei ‘ona ia fetalai atu ‘iā i latou.

13Auā ‘ua ‘ave ia e ona atali‘i i le nu‘u o Kanana ma latou tanumia o ia i le ana i le fanua o Makapelu, na fa‘atauina mai e Aperaamo, ‘atoa ma le fanua, e fai ma tu‘ugamau mai ‘iā Eferona o le sa Hetī, o lo‘o i luma o Mamere.Galu 7.16

14‘Ona fo‘i atu lea o Iosefa i Aikupito, o ia ma ona uso ma i latou uma o ē na ō a‘e ma ‘ia e tanu i lona tamā, ‘ina ‘ua uma ‘ona tanu o lona tamā.

‘Ua Fa‘amafanafana o Iosefa i ona Uso

15‘Ua iloa e uso o Iosefa ‘ua oti lo latou tamā, ‘ona fa‘apea ai lea, “‘Anei e fa‘alotoloto mai Iosefa ‘iā i tatou ma na matuā taui mai ‘iā te i tatou o mea leaga uma na tatou faia ‘iā te ia.”

16‘Ona latou avatu lea o le fe‘au ‘iā te ia, ‘ua fa‘apea atu:

“Na poloa‘i mai lou tamā, ‘ina o le‘i maliu o ia, na fa‘apea mai,

17‘‘Ia fa‘apea ‘ona ‘outou fai atu ‘iā Iosefa,’ ‘Ou te ‘ai‘oi atu ‘iā te oe, ‘ia e fa‘amāgaloina le agaleaga a ou uso ma la latou agasala, auā na latou agaleaga atu lava ‘iā te oe. O lenei, matou te ‘ai‘oi atu, ‘ia e fa‘amāgaloina le agaleaga a ‘au‘auna nei a le Atua o lou tamā.”

‘Ona tagi lea o Iosefa ‘iā latou ‘upu ‘iā te ia.

18‘Ua ō atu fo‘i ona uso ma fa‘apa‘u‘ū i ona luma ma fai atu i latou ‘iā te ia, “Fa‘auta, o au ‘au‘auna i matou nei.”

19‘Ona fai mai lea o Iosefa ‘iā te i latou, “‘Aua ne‘i ‘outou matata‘u pe la o a‘u o le sui o le Atua.Kene 30.2; 2 Tu 5.7

20A o ‘outou na fai togafiti e ‘outou ‘ia leaga ai a‘u; a o le Atua, na finagalo ia ‘ia i‘u i le lelei, ‘ina ‘ia o‘o ‘ina fa‘aolaina o le nu‘u e to‘atele, pei ‘ona taunu‘u ai i ona po nei.

21O lenei, ‘aua ne‘i matata‘u ‘outou; o a‘u nei ‘ou te tausi lava ‘iā te ‘outou ma a ‘outou fānau;” ‘ona fa‘amatalaloto mai lea o ia ‘iā te i latou ma tautala lelei mai ‘iā te i latou.

O le Oti o Iosefa

22Sa nofo fo‘i Iosefa i Aikupito, o ia ‘atoa ma le ‘āiga o lona tamā; o le ola o Iosefa ‘ua selau ma le sefulu o tausaga;

23sa iloa fo‘i e Iosefa le fānau a Efaraima ‘ua o‘o i le tupulaga e tolu; o le fānau fo‘i a Makiro o le atali‘i lea o Manase na sapasapaia i luga o tulivae o Iosefa.Kene 30.3; Nume 32.39; Iopu 42.16

24‘Ona fai atu lea o Iosefa i ona uso, “O a‘u nei o le a a‘u oti; a o le Atua, e asiasi mai lava o ia ‘iā te ‘outou ma ‘aveina a‘e ‘outou a‘i le nu‘u nei i le nu‘u na tautō ai o ia ‘iā Aperaamo ma Isaako, ‘atoa ma Iakopo.”

25‘Ona fai atu ai lea o Iosefa ‘ia tautō mai le fānauga a Isaraelu, ‘ua fa‘apea atu, “E asiasi mai lava le Atua ‘iā te ‘outou; tou te ‘ava‘e fo‘i o‘u ivi a‘i le mea nei.”Eso 13.19; Iosu 24.32; Epe 11.22

26‘Ona oti lea o Iosefa ‘ina ‘ua ‘atoa ona tausaga e selau ma le sefulu; na atualalaina fo‘i o ia e i latou ma tu‘u i le ‘atola‘au i Aikupito.