Pese 5 - Revised Samoan Catholic Bible

Ali‘i.

1Lo‘u tuafafine e, la‘u avā e,

‘ua ‘ou sau i la‘u fa‘ato‘aga.

‘Ua ‘ou tau lo‘u muro ‘atoa ma la‘u mea manogi;

‘ua ‘ou ‘aina la‘u meli ‘ua sisina ifo ma la‘u meli;

‘ua ‘ou inu la‘u uaina ma la‘u suāsusu.

O Fafine.

A‘u uō e, ‘inā taumamafa ia;

a‘u uō pele e, ‘inā feinu ia ‘outou,

feinu ia, ‘ia malilie.

O le Fa o PeseTama‘ita‘i.

2‘Ua ‘ou moe a‘u, ‘ae ala lo‘u loto.

O le leo o lo‘u manamea o lo‘o tu‘itu‘i mai o ia.

Ali‘i

‘Ua fa‘apea mai, “Lo‘u tuafafine e, la‘u uō e, la‘u lupe e,

lē ‘ua sao ‘ona lelei, tatala mai ia le faitoto‘a ‘iā te a‘u,

auā ‘ua susū lo‘u ulu i le sau, ‘ou lauulu fo‘i i le ma‘ulu o le sau i le po.”

Tama‘ita‘i.

3‘Ua ‘ou tō ‘ese lo‘u ‘ofu,

pe fa‘apefea ‘ona ‘ou toe ‘ofu ai?

‘Ua ‘ou mulumulu i o‘u vae,

pe fa‘apefea ‘ona ‘ou toe fa‘a‘ele‘elea ai?

4Na tu‘uina mai e lo‘u manamea lona lima i le pū o le faitoto‘a,

‘ona mutimutivale lea o lo‘u loto ‘iā te ia.

5Na ‘ou tula‘i e tatala le faitoto‘a i lo‘u manamea.

Na sisina ifo fo‘i le muro ai o‘u lima,

ma le muro sisina nai ‘ou tamatama‘i lima i le ‘au o le fa‘amau.

6‘Ua ‘ou tatala le faitoto‘a i lo‘u manamea,

a ‘ua liliu lo‘u manamea, ‘ua alu ‘ese.

Na segia lo‘u mauli ‘ina o tautala mai o ia.

‘Ua ‘ou sā‘ili ‘iā te ia, ‘ae le‘i maua;

na ‘ou vala‘au atu ‘iā te ia, ‘ae le‘i tali mai o ia ‘iā te a‘u.

7Na maua a‘u e leoleo o ē na feoa‘i i le ‘a‘ai,

na latou fasi ‘iā te a‘u ‘ua ‘ou manu‘a ‘iā te i latou,

na faoa e leoleo ‘aupā lo‘u ‘ie e ufita‘i ai lo‘u tino.

8Tama fafine a Ierusalema e,

‘ou te fai atu ‘iā te ‘outou

‘ia tautō mai, ‘āfai tou te iloa lo‘u manamea,

tou te ta‘u atu ‘iā te ia, ‘ua ‘ou vaivai i lo‘u alofa atu.

O Fafine.

9O oe na, lē sili ‘ona lālelei i fafine,

se a se mea e sili ai lou manamea i se isi manamea?

Se a se mea e tāua ai lou manamea i isi manamea,

‘ina ‘ua e fai mai, matou te tautō?

Tama‘ita‘i.

10O lo‘u manamea,

e ‘aulelei ma malosi,

e silisili ‘ese o ia i le to‘atele.

11O lona ulu ‘ua pei o le auro ‘ua fa‘amamāina;

o ona lauulu ‘ua fa‘apuloulou,

‘ua uliuli e pei o se oreva.

12O ona mata e pei ni mata o se lupe e latalata ane i vaitafe,

o lo‘o tā‘e‘ele i le suāsusu ma nonofo i le ‘auvai.

13O ona alafau ‘ua pei o se topasama,

ma mea maupu‘epu‘e o i ai la‘au manogi.

O ona laugutu o susana ia,

‘ua sisina ifo ai le muro sisina.

14O ona lima ‘ua pei o mama auro ‘ua tu‘uina i ai tasesa;

o lona manava ‘ua pei o nifo o elefane ‘ua fa‘apupulaina,

ma ‘ua ufitia i safaira.

15O ona vae o pou sesa ia,

‘ua fa‘atūina i luga o lago auro lelei;

‘ua foliga o ia i Lepanona,

‘ua sili ‘ona lelei e pei o arasi.

16O lona fofoga ‘ua matuā leo malie,

‘ua ‘ato‘atoa ‘ona lelei o ia.

Tama fafine a Ierusalema e,

o lo‘u manamea lava lea, o la‘u uō fo‘i lea.