Salāmo 82 - Revised Samoan Catholic Bible

O le A‘oa‘iga o Faipule o le Nu‘uO le salāmo a Asafo

1O lo‘o tu le Atua i le fa‘apotopotoga a le Atua;

o lo‘o fa‘amasino ia i luma o atua.

2“Tou te fa‘amasino ma le lē tonu se‘ia afea?

ma ‘outou fa‘ailogaina ē ‘ua amio leaga se‘ia afea? Selā.

3‘Ia ‘outou fa‘amasinoina ē ‘ua vaivai ma ē mātuaoti;

‘ia ‘outou ta‘uamiotonuina ē ‘ua puapuagā ma ē matitiva.

4‘Ia ‘outou fa‘aola i ē vaivai ma ē matitiva;

‘ia ‘outou lavea‘iina i latou a‘i le lima o ē amio leaga.”

5Latou te lē iloa, e le mafaufau fo‘i i latou;

e sāvavali pea i latou i le pouliuli;

e fa‘agae‘etia fa‘avae uma o le lalolagi.

6O a‘u, na ‘ou fa‘apea ane,

“O atua ‘outou; o fānau fo‘i ‘outou uma a lē Silisili‘ese.

7‘Ae moni, tou te oti lava e pei o tagata,

e pa‘u‘ū fo‘i ‘outou e pei o se tasi ali‘i.”

8Le Atua e,

‘ia e tula‘i mai, ‘ia e fa‘amasino le lalolagi;

auā o oe, ‘e te faia nu‘u uma lava mou tofi.