Mika 6 - Revised Samoan Catholic Bible

‘Ua A‘oa‘i atu le Atua ‘iā te i Latou ‘ona o Amio ‘Ese‘ese

1‘Inā fa‘alogo mai ia i le mea o lo‘o fetalai mai ai le ALI‘I:

Tū ia i luga, ‘inā finau atu ia i luma o mauga, ‘ia fa‘alogo fo‘i mauga iti i lou leo.

2‘Outou mauga e, fa‘alogo mai ia i le finauga a le ALI‘I, ‘outou fa‘avae tumau fo‘i o le lalolagi; auā ‘ua i le ALI‘I le finauga ma lona nu‘u e fefinaua‘i o ia ma Isaraelu.

3“A Lo‘u nu‘u e, se a ‘ea sau mea ‘ua ‘ou faia ‘iā te oe ‘ua ‘ou fa‘atigā ‘iā te oe i ni a? ‘inā momoli ia o a‘u.

6“‘Ou te alu atu ma ni a i luma o le ALI‘I, ‘ou te ifo atu ma ni a i le Atua maualuga? ‘Ou te alu atu ‘ea i ona luma ma taulaga mū ma tama‘i povi e tasi lo latou tausaga?

9O lo‘o ‘alaga le si‘ufofoga o le ALI‘I i le ‘a‘ai, (o le ‘ua poto e iloa e ia lou suafa;) ‘Ia ‘outou fa‘alogo i le sasa ma lē ‘ua pule mai ai.

10O lo‘o i ai pea ‘ea i le fale o le tagata amio leaga o le fa‘aputuga ‘oloa e maua i le amio leaga ma le efa faimamago e ‘inosia?

11‘Ou te amio sa‘o ‘ea a o lo‘o i ai fua fa‘atautau fa‘alētatau ma le taga o lo‘o i ai ma‘a faimamago?

12‘Ua tūtūmu ona tagata mau‘oa i le fa‘asauā ‘ua tala pepelo fo‘i i latou o ē mau ai, o latou laulaufaiva fo‘i i o latou gutu ‘ua fa‘a‘ole‘ole ia.