Isaia 61 - Revised Samoan Catholic Bible

O le Manuia e Maua mai le Mesia e lona Nu‘u

1‘Ua i o‘u luga le Agaga o le Ali‘i le ATUA;

Auā ‘ua fa‘au‘uina a‘u e le ALI‘I e tala‘i le tala lelei i ē ‘ua tigāina,

‘Ua ia ‘auina mai a‘u e fufusi i ē loto momomo,

E tala‘i le sa‘olotoga i le tāfeaga ma le matuā tatalaina o ē ‘ua fusifusia.

2E tala‘i le tausaga e talileleia mai ai e le ALI‘I,

Ma le aso e taui ai ma sui e lo tatou Atua;

E fa‘amatalaloto i ē fa‘anoanoa uma lava.

3E avatu le fiafia i ē fa‘anoanoa i Siona,

E foa‘iina atu ‘iā i latou le matagofie e sui a‘i le lefulefu,

O le u‘u o le ‘oli‘oli e sui a‘i le fa‘anoanoa,

O le ‘ofu e fai a‘i vi‘iga e sui a‘i le loto fa‘avaivai;

E igoa i latou, O la‘au o le amiotonu,

O le fa‘ato‘aga a le ALI‘I, e fai mōna vi‘iga.

4Latou te atiina a‘e fo‘i mea na fa‘atafunaina mai le vavau;

Latou te fa‘atūina mea na fa‘atu‘ufuaina anamua;

Latou te toe faia ‘a‘ai sa fa‘atafunaina,

O mea sa tu‘ufua i lea tupulaga ma lea tupulaga.

5E tutū tagata ‘ese ma latou leoleo ‘iā ‘outou lafu mamoe,

O tagata o nu‘u ‘ese e fai i latou ma a ‘outou galuefanua ma a ‘outou galuevine.

6A o ‘outou, e igoa ‘outou, O ositaulaga a le ALI‘I;

E ta‘ua ‘outou, O ‘au‘auna o lo tatou Atua;

Tou te ‘a‘ai mea lelei a nu‘u ‘ese,

E fai fo‘i ma ‘outou o a latou ‘oa.

7E ta‘ilua ni mea e sui a‘i lo ‘outou māsiasi;

Latou te ‘oli‘oli fo‘i i lo latou vaega e sui a‘i le mā;

Auā e fai mo latou tofi le ta‘ilua i lo latou nu‘u;

E ‘iā te i latou le ‘oli‘oli e fa‘avavau.

8Auā o a‘u o le ALI‘I:

‘Ou te fiafia i le fa‘amasinoga,

‘Ou te ‘ino‘ino i mea ‘ua faoa fa‘alētaupulea;

‘Ou te avatua lo latou taui ma le fa‘amaoni;

‘Ou te osia le feagaiga e fa‘avavau ma i latou.

9E ‘iloga la latou fānau i nu‘u ‘ese,

E ‘iloga fo‘i ē tutupu ‘iā te i latou i totonu o nu‘u;

E iloa i latou e i latou uma o ē va‘ai i ai,

O i latou lava o le fānau ‘ua fa‘amanuia e le ALI‘I.

10‘Ou te matuā, fiafia i le ALI‘I,

E ‘oli‘oli lo‘u loto i lo‘u Atua;

Auā ‘ua na fa‘a‘ofuina a‘u i ‘ofu o le olataga,

‘Ua na fa‘apulupuluina a‘u i le ‘ofu o le amiotonu;

E pei o le fa‘ato‘āfaiavā ‘ua pulou o ia pei se ositaulaga;

E pei o le fa‘ato‘ānofotane fo‘i ‘ua teuteu o ia i ana teuga.

11Auā e pei ‘ona fa‘atupuina e le lau‘ele‘ele lona fua,

E pei ‘ona fa‘atupuina fo‘i e le fa‘ato‘aga mea ‘ua totō ai,

E fa‘apea lava ‘ona fa‘atupuina e le Ali‘i le ATUA,

O le amiotonu ma le vi‘iga i luma o nu‘u uma.