Fa‘ata‘oto 14 - Revised Samoan Catholic Bible

1E ta‘itasi uma, fafine popoto ma atiina a‘e lona fale;

a o le fafine valea na te lepetia ai i ona lima.

2O lo‘o savali i lana amiotonu lē ‘ua mata‘u i le ALI‘I;

‘ae fa‘api‘opi‘o ona ala lē ‘ua ‘ino‘ino ‘iā te ia.

3O lo‘o i le gutu o le vale le sasa o le fa‘amaualuga;

a o laugutu o ē popoto e leoleoina ai i latou.

4A leai ni povi, ‘ua mamā le fale povi;

‘ae tele mea e maua mai i le malosi o le povi.

5O le molimau fa‘amaoni, e le pepelo ia;

a o le molimau pepelo, o le tala pepelo ia.

6E sā‘ili le poto e le tagata tauemu,

‘ae lē maua; ‘ae faigofie le poto i lē ‘ua lagona.

7Alu ‘ese ia a‘i luma o le tagata valea,

pe a e lē iloa ‘iā te ia laugutu o le poto.

8O le poto o le tagata mafaufau, o le fa‘autauta lea i lona ala;

a o le valea o ē vālelea, e pepelo lea.

9E tauemu o ē vālelea i le agasala;

a o fealofani ē ‘ua amio sa‘o.

10‘Ua iloa e le loto lona lava tigā;

e le ‘aiā fo‘i le tagata ‘ese i lona ‘oli‘oli.

11E fa‘aumatia le fale o ē amio leaga;

a o le fale ‘ie o ē amio sa‘o, e uluola ia.

12O i ai le ala ‘ua tonu i le manatu o le tagata;

a o lona taunu‘uga, o ala ia e oti ai.

13A o ‘ata‘ata lava, ‘ua fa‘anoanoa le loto;

o le i‘uga fo‘i o le ‘oli‘oli, o le fa‘anoanoa lea.

14O lē ‘ua tu‘umuli i lona loto, e mā‘ona o ia i ona lava ala;

a o le tagata amio lelei, e mā‘ona o ia a‘i ona lava ala.

15O lē ‘ua faigofie, e talia e ia ‘upu uma;

a o le ‘ua mafaufau, ‘ua fa‘autauta o ia i lona ala.

16‘Ua mata‘u le tagata poto ma ‘alo ‘ese i le leaga;

a o le vale ‘ua fa‘amaualuga o ia ma nofo fa‘atalanoa.

17O le itagofie ‘ua amio fa‘avalea o ia;

o le tagata fo‘i ‘ua fai togafiti leaga, ‘ua ‘inosia o ia.

18O ē faigofie, e fai mo latou tofi le valea;

a o ē mafaufau, e fa‘apaleina i latou i le poto.

19‘Ua ifo ē ‘ua amio leaga i luma o ē amio lelei;

ma ē agasala, ‘ua ifo i latou i faitoto‘a o lē amiotonu.

20‘Ua ‘inosia lē ‘ua mativa i lē la te tuā‘oi;

‘ae to‘atele o ē alolofa i le mau‘oa.

21O lē ‘ino‘ino i lē la te tuā‘oi, ‘ua agasala o ia;

a o lē alofa i ē ‘ua tigāina, ‘amu‘ia lava o ia.

22E lē ‘ua sesē ‘ea o ē fai togafiti leaga?

A o i ai le alofa ma le fa‘amaoni i ē fai togafiti lelei.

23O i ai le mau i galuega uma;

a o le ‘upu a laugutu, na o le mativa e i‘u i ai.

24O le pale o ē popoto, o la latou ‘oloa lea;

a o le valea o ē vālelea, o le valea lava lea.

25E lavea‘iina tagata o le molimau fa‘amaoni;

a o le molimau pepelo, e tautala o ia i mea pepelo.

26O lē mata‘u i le ALI‘I, o i ai le fa‘atuatuaga malosi;

o i ai fo‘i le malu mo lana fānau.

27O lē mata‘u i le ALI‘I, o le puna o le ola lea,

e ‘alo ‘ese ai i mailei e oti ai.

28O le to‘atele o le nu‘u, o i ai le mamalu o le tupu;

a o le ausage, e i ai le malaia o le ali‘i.

29O lē ‘ua fa‘ato‘ato‘a, e tele lona mafaufau;

a o le ‘ua itagofie, e fa‘aeaina i luga e ia le valea.

30O le loto lelei, o le ola lea o le tino;

a o le matau‘a, o le mea lea e pala ai ivi.

31O lē ‘ua fa‘asauā, i le tagata mativa, e fa‘alumaina e ia Lē na faia o ia;

a o lē ‘ua āva ‘iā te ia, ‘ua alofa o ia i le tagata mativa.

32‘Ua tulia lē amio leaga i lona lava leaga;

a o lē amiotonu, e ‘iā te ia le fa‘atuatua pe a oti o ia.

33O lo‘o nofo mau le poto i le loto o lē ‘ua mafaufau;

a o mea, ‘ua i totonu o ē vālelea e fa‘ailoaina.

34O le amiotonu e vi‘ia ai le nu‘u; a o le agasala,

o le luma lea o le nu‘u.

35O le alofa o le tupu, o lo‘o i ai i le ‘au‘auna poto;

a o lona to‘asā, o lo‘o i ai lea i lē e tupu ai le mā.