1 Tupu Fa‘atomuaga - Revised Samoan Catholic Bible

Fa‘atomuaga O le Ulua‘i Tusi i Tupu, o le fa‘aauauga o tala‘aga o nofoa‘iga o tupu o Isaraelu, lea sa fa‘amatalaina muamua i le tusi a Samuelu. E mafai ‘ona vaevaeina le tusi i vaega se tolu: (1) O le ‘avea o Solomona ma tupu o Isaraelu ma Iuta; ma le oti a Tavita lona tamā. (2) O le vaitaimi na tupu ai Solomona ma galuega sa ia faia ‘ae maise le fausia o le malumalu i Ierusalema. (3) O le vaeluaina o le mālō i le itū i matū (Isaraelu) ma le itū i saute (Iuta); ma tala i tupu sa latou pulea ia mālō se‘ia o‘o mai i le iva o seneturi T.L.M.I le muamua ma le lua tusi o Tupu e maitauina ai o ta‘ita‘i uma sa latou fa‘afoeina nei mālō e lua, e fa‘amasinoina e tusa ma lo latou olaga tautua i le Atua; a o le manuia ma le lelei o le mālō e fuafua lea i lē lelei o lenā tautua. O le ifo i tupua ma le lē usita‘i o nisi ia o mea sa ‘avea ma mala ma malaia ai le pulega a ta‘ita‘i. E maitauina o tupu uma o le mālō i matū (Isaraelu) sa tele ‘ina pa‘u‘ū i le malaia ma ‘ua fa‘apenā atu ai ma le mālō; ‘ae o tupu o le mālō i saute (Iuta) sa i ai nisi sa lelei lo latou ta‘ita‘iga a o nisi fo‘i sa lē manuia.O se tasi o matā‘upu ‘autū i le muamua Tupu, o perofeta a le Atua, o latou ia sa ‘avea ma fofoga taumolimoli a le Atua e lapata‘i tagata ‘ina ‘ia ‘aua nei ifo atu i tupua ma tauānau tagata ‘ia latou fa‘alogo i le Atua. O se tasi o tagata tāua i lenei tusi o le tala ‘iā Elia ma lana tete‘e atu i ositaulaga a Paala (matā‘upu 18).O le Fa‘asologa o Matā‘upu:O le fa‘ai‘uga o le nofoa‘iga a Tavita 1.1—2.12O le ‘avea o Solomona ma tupu 2.13-46O le nofoa‘iga a Solomona 3.1—11.43a. Tausaga muamua 3.1—4.34e. O le fausia o le Malumalu 5.1—8.66i. Tausaga mulimuli 9.1—11.43O le vaeluaina o le mālō 12.1—22.53a. O le tete‘e o itū‘āiga o le itū i matū 12.1—14.20e. O tupu o Iuta ma Isaraelu 14.21—16.34i. O le perofeta o Elia 17.1—19.21o. O le tupu o Aapo o Isaraelu 20.1—22.40u. O Iosefatu o Iuta ma Aasaia o Isaraelu 22.41-53