Sirako 23 - Revised Samoan Catholic Bible

‘Ia Fa‘aeteete le Tagata i ana ‘Upu

1Le Ali‘i e,

le Tamā ma le Pule sili oe o lo‘u ola,

‘aua ‘e te tu‘ulafoa‘i ‘iā te a‘u i le pule a o‘u laugutu,

‘aua ‘e te lafoa‘i ‘iā te a‘u, ‘ina ne‘i ‘ou pa‘ū ai.

2E! tā fia maua se tasi na te tāofia i le sasa o ‘ou manatuga ma le a‘oa‘oga o le poto,

i totonu o lo‘u loto; ‘aua ne‘i fa‘apelepele lava ‘iā te a‘u i lo‘u fa‘avalevalea,

‘ina ‘ia ‘aua le aliali mai o agasala e tutupu mai ai.

3‘Ina ne‘i fa‘ateleina lo‘u fa‘avalevalea ma fa‘atupuina le tele o a‘u soligātulafono ma fa‘afaula‘i a‘u lava agasala,

ne‘i ‘ou pa‘ū ai i luma o o‘u fili, ne‘i mitamita mai ai ‘iā te a‘u o lē ita mai ‘iā te a‘u.

4Le Ali‘i e,

le Tamā ma le Atua o lo‘u olaga,

‘aua ‘e te tu‘ulafoa‘i ‘iā te a‘u i la latou pulega.

5‘Ave ‘ese ‘iā te a‘u le mataitu ma fa‘ate‘a ‘ese ma a‘u o tu‘inanau leaga.

6‘Ia e fa‘amamao ma a‘u o tu‘inanau leaga o le tino,

‘aua ne‘i o‘otia lo‘u loto i tu‘inanau i fafine;

‘aua ‘e te tu‘ulafoa‘i ‘iā te a‘u i se loto gaoia ma le ulavale.

O le Tautoga

7Le fānau e,

‘ia ‘outou fa‘alogo i tulafono o laugutu;

‘ai sē tausi i ai, e lē fano o ia i ana ‘upu,

e lē pa‘ū lava o ia i amioga aupito leaga.

8E lavea ai le tagata agasala i lona loto noa,

e pa‘u‘ū ai fo‘i le tagata fa‘amaualuga ma le tagata agatele.

9‘Aua le fa‘amasani lou gutu i tautoga, auā e tutupu ai ni agasala e tele.

10‘Aua le ta‘u so‘o i lou gutu le suafa o le Atua,

‘aua fo‘i ‘e te filo i au tala o suafa o le ‘au pa‘ia,

auā e lē aunoa ai oe ma se fa‘asalaga.

11Auā e pei ‘ona lē aunoa ma se fa‘alavalava le pologa ‘ua su‘esu‘eina i aso faiso‘o,

e fa‘apea ‘ona lē mamā i agasala o lē tautō so‘o o ta‘u ai le suafa o le Atua.

12O le tagata ‘ua tautō i aso faiso‘o, e fa‘ateleina lava e ia ana agasala,

e lē ‘alo ‘ese fo‘i le fa‘asalaga i lona ‘āiga.

13‘Āfai ‘ua na solia, e pa‘ū lava ‘iā te ia lana solitulafono;

‘āfai fo‘i ‘ua tautō ma le fa‘a‘ole‘ole, e fa‘aluaina ai lana agasala.

14‘Āfai fo‘i ‘ua tautō pepelo, e lē fa‘amāgaloina o ia;

auā e fa‘afaula‘i ai le fa‘asalaga i lona ‘āiga.

O le Tautala lē Taupulea

15E i ai ni ‘upu ‘ua tatau i ai le oti; a ‘ua lē maua ‘upu ia i le fānauga a Iakopo.

16Auā e mamao mea uma ia ma tagata amiotonu,

e lē felavei i latou i agasala ia.

17‘Aua le fa‘amasani lou gutu i le tautala e lē taupulea,

auā e i ai pea lava le agasala.

18‘Ia e manatua lou tamā ma lou tinā pe a e saofa‘i fa‘atasi ma ali‘i mamalu;

19‘ina ne‘i fa‘agalogalo fo‘i le Atua ‘iā te oe i o latou luma,

‘ona aliali ai lea le fa‘avalevalea ‘ua e masani i ai,

‘ona latou fa‘amasiasi ai lea ‘iā te oe,

‘ona sili lea ‘iā te oe pe ana le fānau mai o oe, ‘e te fetu‘u ai i lou aso fānau.

20O le tagata ‘ua masani i ‘upu leaga,

e lē maua lava e ia le poto e o‘o i le aso e oti ai.

O Tu‘inanau o le Tino

21E lua itū‘āiga tagata ‘ua latou agasala so‘o,

a o lona tolu na te fa‘atupu le to‘asā ma le fanoga.

22O le tagata ‘ua mū ona tu‘inanau, e pei se afi ‘a‘asa,

e lē tineia se‘ia o‘o ‘ina foloina ai o ia.

23Ma le tagata ‘ua amio leaga i lona lava tino,

na te faia pea lava se‘ia o‘o ‘ina mū ai se afi.

24E suamalie areto uma lava i le tagata mulilua;

e fa‘ato‘ā tu‘u lana agasala pe a oti ai o ia.

25O le tagata ‘ua tu‘u lona ia moega, ‘ua ta‘ufa‘atauva‘a o ia i lona lava agaga,

‘ua fa‘apea ifo o ia: “Po o ai ‘ea se a va‘ai mai ‘iā te a‘u?

26O le pouliuli ‘ua si‘omia ai a‘u, ‘ua ufitia a‘u i pavali,

‘ua leai se to‘atasi e iloa mai a‘u; a ‘ou fefe ‘iā te ai?

E lē manatua e le Silisili‘ese a‘u soligātulafono.”

27Ma ‘ua lē lagona e ia ‘ua silasila mai i mea uma lava o fofoga o le Ali‘i;

auā o le mata‘u i tagata e fa‘ate‘a‘eseina ai le mata‘u i le Atua ‘ua matata‘u i ai o mata o tagata.

28Ma ‘ua lē iloa e ia o fofoga o le Ali‘i ‘ua sili mamao i le lā le fepulafi,

‘ua ia silafia ai o ala uma lava o tagata, o va‘ai atu i o latou manatu lilo.

29Auā na silafia e le Ali‘i le Atua o mea uma lava a o le‘i faia;

e fa‘apea fo‘i ‘ona ia silasila pea i mea uma lava na faia.

30E fa‘asalaina lea tagata i ala o le ‘a‘ai, e tausōsōla o ia e pei o le tama‘i solofanua,

‘ae pu‘eina o ia i le itūlā ‘ua lē manatu i ai o ia.

31E ‘avea o ia ma luma i tagata, auā ‘ua lē lagona ifo e ia le mata‘u i le Ali‘i.

O le Mulilua

32E fa‘apea fo‘i so‘o se fafine na te tu‘ulafoa‘i i lana tane

ma fānau ai ‘iā te ia se suli mai le toto ‘ese.

33Auā ‘ua muamua ‘ona vaogatā o ia i le tulafono a le Silisili‘ese;

a o lona lua, ‘ua agasala o ia i lana tane; a o lona tolu,

‘ua mulilua lava ia ma ‘ua maua lana tama mai le tane ‘ese.

34E molia lava o ia i le fa‘apotopotoga, e fa‘asalaina fo‘i o ia i lana fānau;

35e lē maua‘a ana fānau, o latou lālā la‘au e lē fua mai ai ni fua.

36E fai lona fa‘amanatuga ma mea e fetu‘u i ai, e lē sōloi‘esea fo‘i lona luma.

37E iloatino ai e i latou e mulimuli ‘iā te ia ‘ua leai se mea e sili lona lelei i lo le mata‘u i le Atua, e leai fo‘i se mea e sili ‘ona malie i lo le to‘aga i poloa‘iga a le Ali‘i.

38O le mamalu tele le mulimuli atu i le Ali‘i; e maua mai ‘iā te ia le ola tulu‘i.