Ieremia 50 - Revised Samoan Catholic Bible

O le Malaia e o‘o i Papelonia

1O le afioga na fetalai mai ai le ALI‘I ‘iā Papelonia ma le nu‘u o Kaletaia, na ‘aumaia e le perofeta o Ieremia:

2‘Inā ta‘u atu ia ‘outou i atu nu‘u,

ma fa‘ailoa atu ai;

si‘i i luga fo‘i le tagāvai.

‘Inā fa‘ailoa atu ia, ‘aua le natia;

‘ia ‘outou fa‘apea atu,

‘ua ā‘ea Papelonia, ‘ua fa‘amāina Pele,

‘ua mata‘utuia Merota ‘ua fa‘amāina ona tupua,

‘ua mata‘utuia ana tupua.

3Auā e alu a‘e e tau ma ia le nu‘u a‘i le itū i matū, o lē na te faia lona lau‘ele‘ele ma fa‘atafunaga, e leai fo‘i sē nofo ai; ‘ua sōsōla tagata ‘atoa ma manu, ‘ua latou ō.O le Toe fo‘i mai o Isaraelu

4O na ona po ma lenā tausaga, ‘ua fetalai mai le ALI‘I, e ō mai ai le fānauga a Isaraelu, o i latou ma le fānauga a Iuta fa‘atasi, latou te fētāgisi fano mai; latou te ō ane ma sā‘ili i le ALI‘I lo latou Atua.

5Latou te fesili i le ala i Siona, o fa‘asaga mai ‘i‘inei o latou mata, ‘ua fa‘apea, ‘Inā ō mai ia, se‘i fa‘atasi atu i tatou i le ALI‘I i le feagaiga e fa‘avavau, e lē galo lava.

6O lo‘u nu‘u ‘ua se lafu mamoe ‘ua se i latou; ‘ua fa‘asesēina i latou e o latou leoleo ma latou fa‘aliliuina i latou i le atu mauga; ‘ua latou feoa‘i i lea mauga ma lea mauga, ‘ua galo ‘iā i latou le mea sa latou ta‘o‘oto ai.

7O i latou uma na maua i latou, ‘ua latou ‘aina i latou; na fai ane fo‘i o ē na sauā mai ‘iā te i latou, “Matou te le nofo sala, auā ‘ua latou agasala i le ALI‘I, o le mea e mau ai le amiotonu, o le ALI‘I, o le fa‘amoemoe o latou tamā.”

8‘Inā sōsōla ia a‘i totonu o Papelonia ma ō atu ia nai le lau‘ele‘ele o Kaletaia; ‘ia ‘outou fa‘apei o ‘oti po‘a i luma o le lafu.

12e matuā mā lo ‘outou tinā;

e māsiasi lava lē na fānauina ‘outou;

fa‘auta, e fai le nu‘u aupito mulimuli

ma vao lafulafuā ma nu‘u naumati ma toafa.

13E lē ‘ainā ia ‘ona o le to‘asā o le ALI‘I,

‘ae fa‘atafunaina uma lava;

o i latou uma o ē ui ane i Papelonia

e ta‘itasi ma ofo ma uisa i ona mala uma.

14‘Inā sauniuni ia ‘outou e tau ma Papelonia i ona itū uma;

o ‘outou uma o ē lolo‘u ‘aufana,

‘inā fanafana atu ia ‘iā te ia,

‘aua ne‘i tu‘u ni ū fanafana;

auā ‘ua na agasala i le ALI‘I.

15‘Ia ‘outou ‘alalaga ‘iā te ia i ona itū uma;

“‘Ua na tu‘uina mai lona lima;

‘ua pa‘u‘ū ona fa‘avae, ‘ua sōloia ona pā.”

Auā o le taui ma sui lenei a le ALI‘I;

‘ia ‘outou taui atu ‘iā te ia;

e pei ‘ona faia e ia, ia fa‘apea ‘ona ‘outou faia ‘iā te ia.

16‘Ia vavae‘eseina i Papelonia lē lūlū saito,

‘atoa fo‘i ma lē tago i le selesaito,

i ona po o le seleselega;

latou te ta‘itasi ma liliu i lona lava nu‘u,

latou te ta‘itasi fo‘i ma sola i lona lava lau‘ele‘ele,

a‘i luma o le pelu sauā.O le Fa‘amasinoga o Papelonia

21‘Inā alu a‘e ia i le nu‘u o Merataimo

e tau ma ia ma ē o nonofo i Pekota;

‘ia e fa‘atafunaina ma matuā fa‘aumatia

o mulimuli atu ‘iā te i latou,

‘ua fetalai mai ai le ALI‘I;

‘ia e faia fo‘i i ai e tusa ma mea uma

na ‘ou fai atu ai ‘iā te oe.

22O lo‘o i le nu‘u le vāvāō o le tau‘a

ma le olopalaina e tele.

23E! ‘ua gauia ma nutilili‘ia le samala o le lalolagi uma.

E! ‘ua ‘avea Papelonia ma mea e ofo ai i atu nu‘u.

24Papelonia e, ‘ua ‘ou tu‘u le mailei mo oe,

‘ua maua ai oe, a ‘ua e lē iloa;

‘ua maua oe, ‘ua pu‘ea fo‘i,

auā na e si‘i le tau‘a i le ALI‘I.

25‘Ua tatalaina e le ALI‘I lana mea e teu ai ‘au‘upega,

‘ua na ‘aumai ai ‘au‘upega o lona to‘asā;

auā o le galuega lenā

‘ua i le Ali‘i le ATUA o ‘au i le nu‘u o Kaletaia.

26‘Inā ō mai ia ‘iā te ia a‘i mea aupito mamao,

‘inā tatalaina ia ona fale e tu‘u ai mea e ‘ai.

‘Ia ‘outou fa‘afaupu‘e ‘iā te ia ‘ia pei o faupuegasaito,

ma matuā fa‘aumatia o ia;

‘aua ne‘i ai se mea e totoe ‘iā te ia.

27‘Inā fa‘aumatia ia o ana povi po‘a ta‘anoa uma,

‘ia latou ō ifo ‘ia fasia;

‘oi talofa ‘iā te i latou!

auā ‘ua o‘o mai lo latou aso,

o ona po e tauia ai i latou.

28O le ‘alaga o ē ‘ua sōsōla ma ‘ua sao a‘i le nu‘u o Papelonia, e ta‘u atu i Siona le taui ma sui a le ALI‘I lo tatou Atua, o le taui ma sui ‘ona o lona malumalu.

29‘Ia fa‘ala‘ei ‘au i ē fanafana u e tau ma Papelonia, o i latou uma o ē lolo‘u le ‘aufana; ‘ia ‘outou tolauapi e vagavagai ‘iā te ia, ‘aua ne‘i i ai sē sao; ‘ia ‘outou taui atu ‘iā te ia e tusa ma ana galuega; e pei o mea uma na ia faia, ‘ia fa‘apea ‘ona ‘outou faia ‘iā te ia; auā ‘ua fa‘amaualuga o ia i le ALI‘I, le Pa‘ia o Isaraelu.

30O le mea lea e pa‘u‘ū ai o ona taulele‘a i ona malae, e fano fo‘i i lea lava aso ona tagata tau uma, ‘ua fetalai mai ai le ALI‘I.

31O oe na lē ‘ua fa‘amaualuga,

fa‘auta, ‘ou te faia oe mo‘u fili,

‘ua fetalai mai ai le Ali‘i le ATUA o ‘au;

auā ‘ua o‘o mai lou aso,

o ona po ‘ou te taui atu ai ‘iā te oe.

32E tausuai ma pa‘ū le ‘ua fa‘amaualuga,

e leai fo‘i sē na te fa‘atula‘i ‘iā te ia;

‘ou te fa‘amūina le afi i ona ‘a‘ai,

e susunuina ai ona itū uma.

33O lo‘o fa‘apea ‘ona fetalai mai o le ALI‘I o ‘au, Na sauāina fa‘atasi le fānauga a Isaraelu ma le fānauga a Iuta; o i latou uma ē na ‘avea i latou o tagata o tau‘a na latou tāofi mau ‘iā te i latou; ‘ua latou lē mafafai ‘ona tu‘uina i latou ‘ia ō.

34E malosi lē na te togiolaina i latou, o le ALI‘I o ‘au o lona suafa lea; e matuā faia e ia la latou finauga, ‘ina ‘ia fa‘anofofilemūina e ia le lalolagi, ‘ia fa‘agateteina fo‘i ē o nonofo i Papelonia.

35‘Ua fetalai mai le ALI‘I,

E o‘o le pelu ‘iā Kaletaia ma ē nonofo i Papelonia,

ma ona ali‘i ma ona tagata popoto.

36O le pelu i ē pepelo,

e fa‘avalea fo‘i i latou;

o le pelu i ona toa e matata‘u ai fo‘i i latou.

37O le pelu i ana solofanua ma ona kariota,

ma tagata ‘ese‘ese uma ‘ua i totonu ‘iā te ia.

E ‘avea fo‘i i latou ma fafine;

o le pelu i ana ‘oloa, e vetea fo‘i ia.

38E o‘o le vevela i lona vai, ‘ona mate ai lea;

auā o le nu‘u lava lea o tupua ‘ua ta,

‘ua latou mitamita vale fo‘i i mea mata‘utia.

39O le mea lea e nonofo ai manu fe‘ai o le vao, fa‘atasi ma aie, e mau ai fo‘i iaena; e lē toe ‘ainā e fa‘avavau; e lē mau ai lava se tasi i lea tupulaga ma lea tupulaga.

40E pei o le fa‘aumatia e le Atua o Sotoma ma Komoro ma ē na latou tuā‘oi, o lo‘o fetalai mai ai le ALI‘I, e lē nofo ai se tasi, e lē mau ai fo‘i se atali‘i o se tagata.

41Fa‘auta,

e ō mai le nu‘u a‘i le itū i matū, o le nu‘u tele;

e fa‘aosoina fo‘i tupu e to‘atele a‘i tulu‘iga o le lalolagi.

42Latou te u‘u le ‘aufana ma le tao;

‘ua sauā i latou ma latou le alolofa;

E ta‘alili o latou leo e pei o le sami,

‘ua latou ti‘eti‘e i solofanua,

e sauniuni e pei o tagata e ō i le tau‘a,

‘ina ‘ia tau ma oe, le tama fafine a Papelonia.

43‘Ua fa‘alogo le tupu o Papelonia i le tala ‘iā te i latou,

‘ona vaivai ai lea o ona lima;

‘ua maua fo‘i o ia i le puapuagā,

o le tigā fo‘i e pei o se fafine o le a fānau.

44Fa‘auta, e alu a‘e o ia e pei o le leona a‘i le matagofie o Ioritana, i le mea malosi e mau ai; ‘ae ‘ou te fa‘aoso ‘iā te i latou ‘ia fa‘avave ‘ona ō ‘ese ‘iā te ia, e pei o le ‘emo o le mata; O ai fo‘i le tagata filifilia ‘ou te tofia e tau ma ia? auā po o ai ‘ea e tusa ma a‘u? O ai fo‘i e ‘atofa ni aso ‘iā te a‘u? O ai fo‘i lenā leoleo mamoe e mafai ‘ona tu i o‘u luma?Isai 14.24; Iere 49.19-21; 51.11-12, 29

45O le mea lea ‘ia ‘outou fa‘alogologo mai ai i le pule a le ALI‘I ‘ua ia pule ai ‘iā Papelonia ma ona mafaufauga ‘ua ia mafaufau ai ‘ia leaga ai le nu‘u o Kaletaia, E moni, e tōsina i latou e le aupito itiiti o le lafu mamoe; e moni na te fa‘atafunaina i o latou luga le mea e mau ai.

46O le ta‘alili ‘ina ‘ua maua Papelonia, ‘ua lūlūina ai le lalolagi, ‘ua lagona fo‘i le ‘alaga i nu‘u ‘ese.