1‘Ona ō lea o le fa‘apotopotoga uma lava o le fānauga a Isaraelu nai le vao o Sina, ‘ua sāvavali i latou e tusa ma le afioga a le ALI‘I, ‘ua latou tolauapi i Refiti, ‘ae leai se vai e inu ai le nu‘u.
2‘Ona fīnau mai lea o le nu‘u ‘iā Mose, ‘ua latou fai mai ‘iā te ia, “‘Aumai ia se vai ‘iā te i matou, matou te inu ai.”
‘Ona tali atu lea o Mose ‘iā te i latou, “Se a ‘ea le mea tou te fīnau mai ai ‘iā te a‘u? Se a fo‘i le mea tou te tofotofo ai i le ALI‘I?”
3‘Ona fia inu lea o le nu‘u i lea mea, ‘ua latou muimui fo‘i ‘iā Mose, ‘ua fai mai, “Se a le mea na e ‘ava‘e ai i matou nai Aikupito, e fasioti ai ‘iā te i matou, ma a matou fānau, ‘atoa ma a matou manu i le fia inu.”
4‘Ona ‘alaga lea o Mose i le ALI‘I, ‘ua fa‘apea atu, “Se a se mea ‘ou te faia i lenei nu‘u, e toe ‘ina latou fetogi mai ‘iā te a‘u i ma‘a?”
5‘Ona fetalai mai lea o le ALI‘I ‘iā Mose, “‘Ia e alu atu i luma o le nu‘u, tou te ō ma nisi toeaina o Isaraelu; ‘ia e ‘ave fo‘i i lou lima lou to‘oto‘o na e taia a‘i le vaitafe, ma e alu.
6Fa‘auta, ‘ou te tu ai i ou luma i luga o le papa i Horepa; ‘ou te taia le papa ‘ona puna mai ai lea o le vai, e feinu ai le nu‘u.” ‘Ona fa‘apea lea ‘ona faia e Mose i luma o toeaina o Isaraelu.
7‘Ua ia fa‘aigoa fo‘i lea mea o Mase i le ma Meripa, ‘ona o le fīnau o le fānauga a Isaraelu ma lo latou tofotofo i le ALI‘I, o lo‘o fa‘apea ane, “‘Ua ‘iā i tatou ‘ea le ALI‘I, pe leai?”
O le Tau‘a ma Amaleka8‘Ona ō mai lea o Amaleka e tau ma Isaraelu i Refiti.
9‘Ona fai ane lea o Mose ‘iā Iosua, “‘Inā filifili ia mo i tatou tagata, tou te ō e tau ma Amaleka; o a taeao ‘ou te tu ai i le tumutumu o le mauga ma le to‘oto‘o o le Atua i lo‘u lima.”
10‘Ua fai fo‘i e Iosua fa‘apei ‘ona fai ane o Mose ‘iā te ia e tau ma Amaleka; ‘ua ō a‘e fo‘i o Mose, o Arona, ma Huro i le tumutumu o le mauga.
11A si‘i i luga e Mose lona lima, ‘ona mālō atu ai lea o Isaraelu; a tu‘u fo‘i i lalo lona lima, ‘ona mālō mai ai lea o Amaleka.
12Sa mamafa lima o Mose, ‘ona la ‘ave lea o le ma‘a, ma tu‘u ai i ona lalo, ‘ona ti‘eti‘e ai lea o ia; a o Arona ma Huro na la tāofi i luga ona lima, o le tasi i lea itū ma le tasi i lea itū; ‘ua mau ai ona lima ‘ina se‘ia goto le lā.
13‘Ua lafoia fo‘i Amaleka ma ona tagata e Iosua i le pelu.
14‘Ona fetalai mai lea o le ALI‘I ‘iā Mose, “‘Inā tusi ia lenei mea i le tusi e fai ma fa‘amanatuga ma ‘ia fa‘amatalaina i taliga o Iosua; auā ‘ou te matuā sōloi‘esea le fa‘amanatuga ‘iā Amaleka i le lalolagi.”Teu 25.17-19; 1 Samu 15.2-9
15‘Ona fa‘atū ai lea e Mose le fatafaitaulaga, ma fa‘aigoa ai. O le ALI‘I o lo‘u tagāvai o ia.
16‘Ua ia fai ane fo‘i, “Auā na si‘i lona lima i le nofoāli‘i o le ALI‘I, e tau e le ALI‘I le tau‘a ma Amaleka i lea tupulaga ma lea tupulaga.”
Who We AreWhat We EelieveWhat We Do
2025 by iamachristian.org,Inc All rights reserved.
