Salāmo 19 - Revised Samoan Catholic Bible

‘Ua Vi‘ia le ALI‘I e ana Galuega. E Silisili‘ese le Aogā o lana AfiogaMa le usu pese. O le salāmo a Tavita

1‘Ua tala mai e le lagi le mamalu o le Atua;

‘ua fa‘aalia fo‘i e le vā nimonimo le galuega a ona ‘a‘ao.

2O lo‘o ta‘u atu le ‘upu e le tasi aso i le tasi aso,

o lo‘o fa‘ailoa fo‘i le poto e le tasi po i le tasi po.

3E leai se gagana, e leai fo‘i ni ‘upu,

e lē lagona o latou leo.

4‘Ua o‘o atu lo latou leo i le lalolagi uma lava,

ma a latou ‘upu i tulu‘iga o le atu laulau.

‘Ua na tu‘u i ai le fale ‘ie mo le lā;

5o ia fo‘i, e fa‘apei o se fa‘ato‘āfaiavā ‘ua sau mai lona afeafe;

e fiafia o ia e pei o se tagata fitafita e tamo‘e i le ala.

6O lona alu atu, mai le tasi tulu‘iga o le lagi lea,

‘ua o‘o fo‘i lana fa‘ata‘amilosaga i le tasi ona tulu‘iga;

e leai fo‘i se mea e lilo i lona vevela.

O le Tulafono a le Ali‘i

7E sa‘o le tulafono a le ALI‘I,

e fa‘afoisia mai ai le agaga;

e fa‘amaoni poloa‘iga a le ALI‘I,

e fa‘apotoina ai lē ‘ua faigofie.

8E tonu fe‘au a le ALI‘I,

e fa‘afiafia ai le loto;

e mamā poloa‘iga a le ALI‘I,

e malamalama ai mata.

9E mamā le mata‘u i le ALI‘I,

e tumau e fa‘avavau;

o fa‘amasinoga fo‘i a le ALI‘I

e moni ia ma tonu uma lava.

10E silisili ‘ona lelei i le auro,

o le auro e sili ‘ona lelei e tele;

e sili fo‘i ‘ona suamalie i lo le meli,

o le meli ‘ua sisina ifo.

11‘Ua apoapoa‘iina mai ai fo‘i lau ‘au‘auna;

e tele fo‘i le taui pe a tausi i ai.

12O ai ‘ea na te iloa amio sesē?

‘ia e fa‘amāgalo ‘iā te a‘u i agasala lilo.

13‘Ia e tāofi fo‘i i lau ‘au‘auna i agasala fa‘amaualuga;

‘aua ne‘i pule ia ‘iā te a‘u;

‘ona sa‘o ai lea o la‘u amio,

‘ou te lē nofo sala fo‘i i le leaga sili.

14‘Ia malie fo‘i ‘iā te oe ‘upu a lo‘u gutu,

ma mafaufauga o lo‘u loto,

le ALI‘I e, lo‘u papa ma lē na te togiolaina a‘u.