Roma Fa‘atomuaga - Revised Samoan Catholic Bible

Fa‘atomuagaO ai lenei tagata o Paulo? O Paulo o le tagata Iutaia sa fānau i le ‘a‘ai o Taso i Kilikia ma o ona mātua o Iutaia. Sa a‘oga o ia i le Faresaio o Kamalielu i Ierusalema i le tulafono (Galu 22.3). O ia o se tagata mai le itū‘āiga o Peniamina (Roma 11.1; Fili 3.5) ma o se tagata e poto i le gagana Eleni ma le gagana Eperu (Galu 21.37-40; 26.14). O Paulo sa sauāina le Ekalesia a Iesu Keriso ‘ona o lona mā‘elegā i le tausi i le tulafono ma talatu‘u a ona tua‘ā (Galu 9.1-3). Na ‘avea o ia ma so‘o o Iesu ‘ina ‘ua vala‘auina o ia i le ala i Tamaseko (Galu 9.4-10). ‘Ina ‘ua ‘avea ma tagata fa‘atuatua sa galue malosi i le fa‘asalalauina o le Tala Lelei e uiga ‘iā Iesu Keriso ‘ua toetū a‘e mai le oti. Sa tusia e Paulo ni tusi se tele e fesoasoani atu ai i le Ekalesia sa ta‘ape solo i le atu Asia.O le tusi a Paulo i tagata fa‘atuatua o lo‘o ola i Roma, o lana sauni malaga atu e tala‘i atu le tala lelei i atunu‘u o le itū i sisifo e pei o Sepania ma Roma. (Roma 1.10-15; 15.22-24) Auā sa tele lana galuega tala‘i sa faia i atunu‘u i sasa‘e ma Palisitina lea sa amata mai lava i Ierusalema. (Roma 15.19) ‘Ae le‘i fa‘ataunu‘uina lenei fuafuaga, sa ia talosaga ai i le Ekalesia i Roma ‘ia latou nofo tatalo se‘i malaga muamua e fa‘afeiloa‘i atu i le Ekalesia i Ierusalema. E le gata e fa‘afeiloa‘i i Ierusalema ‘ae ‘ia fa‘amaonia lana galuega tala‘i i atunu‘u ‘ese e pei ‘ona ia folasia. (Roma 15.31)E tele manatu lelei o lenei tusi ‘ae o se tasi o matā‘upu tāua o lo‘o fa‘amamafaina e Paulo, o le fa‘aolataga e lē o galuega ma le tulafono ‘ae o le fa‘atuatua ‘iā Keriso Iesu le Alo o le Atua, lea sa maliu ma toetū a‘e mai le oti.(Roma 3.21-31; 4.1-25). E ta‘uamiotonuina ma ta‘uleleia le tagata i le Atua e ala i lona fa‘atuatua moni ‘iā Iesu Keriso. E ola tagata uma pe Iutaia pe tagata ‘ese i le iloa ma fa‘atuatua i le Ali‘i o Iesu Keriso. ‘Iā Paulo o le tete‘e ma le lē fa‘atuatua o tagata Isaraelu ‘iā Iesu ‘ua ‘avea o se avanoa lelei lea e tala‘i atu ai Iesu i le lalolagi uma, ma o se vaega lava o fuafuaga a le Atua.O le manatu o nisi o le ‘au popoto i afioga a le Atua, o le Tusi a Paulo ‘iā Roma sa tusia lea i le vaitaimi o le 58 tausaga i le vaitausaga a le Ali‘i(Anno Domini)O le Fa‘asologa o Matā‘upu:O ‘upu fa‘afeiloa‘i ma le manatu ‘autū 1.1-17O le mana‘omia o le fa‘aolataga 1.18—3.20O le fa‘aolataga a le Atua 3.21—4.25O le ola fou ‘iā Keriso 5.1—8.39‘Ua ala mai ‘iā Isaraelu fuafuaga a le Atua 9.1—11.36O amioga ma aga fa‘a-Kerisiano moni 12.1—15.13O ‘upu mulimuli ma fa‘amanuiaga 15.14—16.27