1O lē soifua fa‘avavau ‘ua na faia o mea ‘atoa uma lava.
O le Atua e to‘atasi lava, na o ia e amiotonu,
o ia o le tupu e manumālō pea lava e o‘o i le fa‘avavau.
2O ai sē lavātia tala‘i ana galuega?
3O ai sē sā‘ili‘ili i mea ofoofogia ‘ua faia e ia?
4O ai sē ta‘uta‘u le mamana o lona mamalu?
Po o ai fo‘i na te taumafai ‘ona fa‘amatala lona agaalofa?
5E leai se mea e tasi ‘ua mafai ‘ona fa‘aopoopo i ai, pe tō‘ese ai,
e lē mafai fo‘i ‘ona malamalama i se tasi o galuega ofoofogia a le Atua.
6A māe‘a le su‘esu‘ega a le tagata, o lona fa‘ato‘ā amata lea;
a mānava fo‘i i lana galuega, e lailoa lava ia! E Fa‘atauva‘a le Tagata
7Se ā le tagata? Se ā lona aogā?
Se ā se mea e lelei ‘iā te ia po o se mea e leaga mo ia?
8O le faitau aofa‘i o aso o le tagata, o le selau ‘ea o tausaga,
po ‘ua tele fo‘i lea; e pei o le matāua e tasi ‘ua asu mai i le moana,
e pei o se fatu oneone e tasi, e fa‘apea ona tausaga fa‘atauva‘a pe a fa‘atatau i le fa‘avavau.
9O le mea fo‘i lea ‘ua ‘onosa‘i ai le Atua ‘iā te i latou ma ‘ua liligi mai i o latou luga lona agaalofa.
10‘Ua silafia e ia ‘ua sipa o latou loto i le leaga,
ma ‘ua silasila i le malaia ‘ua o‘o ‘iā te i latou, ‘ua leaga lava.
11O le mea lea ‘ua fa‘a‘ato‘atoa ai e ia lona agaalofa ‘iā te i latou,
ma ‘ua fa‘aali ‘iā te i latou le ala o le amiotonu.
12E agaalofa le tagata i lē la te tuā‘oi;
a o le Atua, e agaalofa lava ia i tagata uma lava.
13O lona lava agaalofa ‘ua ia a‘oa‘o mai ma a‘oa‘i mai ai,
e pei o le leoleo i lana lafu mamoe.
14E alofa lava ia i le tagata ‘ua na talia le a‘oa‘oga o lona agaalofa ma ‘ua tausi ma le filigā i ana poloa‘iga.
O le Agalelei ma le Fai Mea Alofa15Lo‘u atali‘i e, ‘aua ‘e te fai au galuega lelei ma le muimui;
a fai fo‘i sau mea alofa i se tasi, ‘aua le fa‘a‘ono‘ono ‘iā te ia i se ‘upu fa‘atigā.
16E lē fa‘amalūlūina ‘ea le mugālā i le tō ifo o le sau?
E fa‘apea fo‘i ‘ona sili le ‘upu lelei i le mea alofa.
17E lē sili ‘ea i le mea alofa aupito tāua?
‘Ae fa‘aopoopo luaina e le tagata amio lelei.
18O le tagata valea e fai lava e ia ni ‘upu matuitui;
o le mea alofa a le tagata fa‘alemigao e magumagu ai mata. Su‘esu‘ega o le Loto
19‘Aua ‘e te fia fa‘amasino, a o le‘i mua‘ia‘oa‘oina oe i le amiotonu,
‘aua ‘e te tautala, a o le‘i mua‘i maua e oe le poto.
20‘Ia e inu vai a o le‘i pesi mai le ma‘i;
‘ia e su‘esu‘e ifo i lou loto a o le‘i fa‘amasinoina oe,
‘ona e maua ai lea le fa‘amāgaloga i luma o le Atua.
21A tautupu lou ma‘i, ‘ia e fa‘amaulalo lou loto,
a o aso ‘e te vaivai ai, ‘ia aliali mai ‘ua liliu lau aga.
22‘Aua ne‘i fa‘alavelavea oe i lau tatalo e lē aunoa,
‘aua ne‘i e mā i tausi i le amiotonu e o‘o i le oti,
auā o le taui mai le Atua e tumau lava ia e o‘o i le fa‘avavau.
23A e fia tatalo, ‘ia e sauniuni i ai lou agaga,
‘aua le ‘avea oe e pei o sē tofotofo i le Atua.
24‘Ia e manatua le to‘asā o le aso gata‘aga,
o le aso e fa‘asalaina ai le tagata ma ‘alo ‘ese ai ‘iā te ia fofoga o le Atua.
25‘Ia e manatua le mativa i aso o le mau,
ma le puapuagā o le mativa i aso o le tamao‘āiga.
26E lagimāina le aso i le taeao, ‘ae lagilagiā i le afiafi;
e fa‘apea ‘ona vave liua mea uma i le silafaga a le Atua.
27O le tagata poto e fa‘aeteete lava ia i mea uma,
e ‘alo ‘ese fo‘i o ia i le paiē i aso o le soligātulafono.
28E masino le poto o tagata mafaufau uma lava,
ma ‘ua latou fa‘aaloalo i lē ‘ua na maua.
29O ē popoto i fa‘amatalaga, ‘ua latou popoto fo‘i ‘iā latou amioga;
‘ua malamalama ‘iā te i latou le ‘upu moni ma le amiotonu
ma ‘ua latou fa‘atō ifo, e pei o le ua, ni fa‘ata‘oto ma ni ‘upu tāua.
O le Amio Pulea30‘Aua ‘e te mulimuli atu i ou tu‘inanau leaga,
‘ia ‘alo ‘ese fo‘i i ou mana‘oga.
31‘Āfai ‘e te ‘ana‘ana i lou loto mōna tu‘inanau,
e ‘avea ai oe ma tauemuga a ou fili.
32‘Aua ‘e te fiafia i fa‘apotopotoga o tagata,
pe to‘atele pe to‘aitiiti i latou, auā e tupu ai pea lava ni agasala.
33‘Aua ‘e te fa‘amativa ‘iā te oe lava i le nō atu o ni tupe ‘ona o lou fia fa‘alialia,
a ‘ua leai se mea i lau tagatupe, auā o le ‘ino‘ino lea i lou lava ola.
Who We AreWhat We EelieveWhat We Do
2025 by iamachristian.org,Inc All rights reserved.
