Esekielu 28 - Revised Samoan Catholic Bible

O le Malaia o le Tupu o Turo

1‘Ua o‘o mai fo‘i le afioga a le ALI‘I ‘iā te a‘u, ‘ua fa‘apea mai:

2Le atali‘i e o le tagata, ‘ia e fai atu i le ali‘i o Turo, ‘Ua fa‘apea ‘ona fetalai mai o le Ali‘i le ATUA:

‘Ua fa‘amaualuga lou loto

ma ‘ua e fai mai, “O a‘u o le atua,

‘ua ‘ou nofo i le nofoa o le atua i le sami;”

‘ua e fa‘atusa fo‘i lou loto i le finagalo o le Atua,

a o le tagata lava oe, e lē o le Atua.

3Fa‘auta, ‘ua sili lou poto i lo Tanielu;

e leai fo‘i se mea lilo e lilo ‘iā te oe.

4O lou poto ma lou fa‘autauta ‘ua e maua ai ‘oloa;

‘ua e maua auro ma ario i au mea e teu ai ‘oloa.

5O lou poto ‘inā tele ma lou fa‘atauina o mea

‘ua e fa‘ateleina ai au ‘oloa

ma ‘ua fa‘amaualugaina lou loto i au ‘oloa.

6O le mea lea o lo‘o fa‘apea ‘ona fetalai mai ai o le Ali‘i le ATUA:

‘Ua e fa‘atusa lou loto i le finagalo o le Atua;

7fa‘auta, o le mea lea ‘ou te ‘aumai ai tagata ‘ese ‘iā te oe,

o ē ‘ua mata‘utia i nu‘u;

latou te tō a‘e fo‘i a latou pelu ‘ia leaga ai le matagofie o lou poto,

latou te fa‘aleagaina lou matagofie.

8Latou te ‘ave ifo oe i le lua,

‘e te oti oe e pei ‘ona oti o ē ‘ua fasia i totonu o le sami.

9‘E te fai mai pea ‘ea i luma o lē fasioti ‘iā te oe,

“O a‘u o le atua?”

a o le tagata lava oe

i le lima o lē fasi ‘iā te oe, ‘ae lē o le Atua.

10‘E te oti e pei ‘ona oti o ē lē peritomeina i lima o tagata ‘ese;

auā o a‘u nei ‘ua ‘ou fai atu ai,

o lo‘o fetalai mai ai le Ali‘i le ATUA.

O le Fa‘ato‘ilaloga o le Tupu o Turo

11‘Ua o‘o mai fo‘i le afioga a le ALI‘I ‘iā te a‘u, ‘ua fa‘apea mai:

12Le atali‘i e o le tagata, ‘ia e sauni atu se pese e aualofa a‘i i le tupu o Turo ma fai atu ‘iā te ia, O lo‘o fa‘apea ‘ona fetalai mai o le Ali‘i le ATUA:

O oe na, ‘ua e fa‘amau fa‘ailogaina le ‘ato‘atoa;

‘ua tumu oe i le poto, ‘ua ‘ato‘atoa fo‘i lou matagofie.

13Sa i Etena oe i le fa‘ato‘aga a le Atua,

na liloia oe i ma‘a tāua uma,

o le salikea ma le topasi ma le ialoma

ma le tasesa ma le soama ma le iasepi

ma le safaira ma le nofeka ma le pereketa, ‘atoa ma auro;

na fai au topa ma au fagufagu;

na saunia ia i le aso na faia ai oe.

14O oe o le kerupi ‘ua fa‘au‘uina, o lē fa‘amalumalu; na ‘ou tu‘uina oe,

sa e i luga o le mauga pa‘ia o le Atua;

sa e fealualua‘i i le vā o ma‘a o le afi.

15Na ‘ato‘atoa ‘ona lelei o au sauniga

talu le aso na faia oe,

‘ua o‘o i le aso na iloa ai lau amio leaga.

16O lou fa‘atauina o ‘oa ‘inā tele

‘ua fa‘atumuina ai oe i le sauā ma ‘ua e agasala;

o le mea lea ‘ou te fa‘aleagaina ai oe,

‘ia te‘a ‘ese i le mauga o le Atua;

‘ou te fa‘aumatia oe le kerupi fa‘amalumalu

nai le vā o ma‘a o le afi.

17Na fa‘amaualugaina lou loto i lou matagofie;

‘ua e fa‘amaumau lou poto ma lou matagofie;

‘ou te lafoina oe i lalo i le ‘ele‘ele;

‘ou te tu‘uina atu oe i luma o tupu ‘ina ‘ia latou va‘ava‘ai ‘iā te oe.

18O au amio leaga ‘inā tele ma le pepelo i lou fa‘atauina o mea,

‘ua e fa‘aleagaina au mea pa‘ia,

o le mea lea ‘ou te fa‘atupuina ai se afi a‘i totonu ‘iā te oe,

e fa‘aumatia ai oe,

‘ou te ‘avea oe ma lefulefu i le fogā‘ele‘ele

i luma o i latou ‘atoa o ē va‘ava‘ai ‘iā te oe.

19O nu‘u uma e iloa e femēmēa‘i i latou uma ‘ona o oe;

e ‘avea fo‘i oe ma mea e ala ai le mata‘u

e lē toe i ai lava oe e fa‘avavau.O le Valo‘aga e Fa‘asaga ‘iā Saitonu

20‘Ua o‘o mai fo‘i le afioga a le ALI‘I ‘iā te a‘u, ‘ua fa‘apea mai:

23Auā ‘ou te ‘auina atu ‘iā te ia le fa‘ama‘i

ma le toto i ona ala;

o ē ‘ua manunu‘a e oti i latou

i totonu ‘iā te ia i le pelu e fa‘asaga mai i itū uma.

Latou te iloa ai o a‘u lava o le ALI‘I.

O le a Manuia Isaraelu

24E lē toe i ai i le ‘āiga o Isaraelu se la‘au talatala e tigā ai, po o se la‘au matuitui e ogotia ai mai ‘iā te i latou uma o ē vagavagai ‘iā te i latou, o ē ‘ino‘ino ‘iā te i latou; latou te iloa ai fo‘i o a‘u lava o le Ali‘i le ATUA.

25‘Ua fa‘apea ‘ona fetalai mai o le Ali‘i le ATUA: A ‘ou fa‘apotopotoina le ‘āiga o Isaraelu a‘i nu‘u o lo‘o fa‘ata‘ape‘apeina ai i latou ma fa‘apa‘iaina a‘u ‘iā te i latou i luma o nu‘u ‘ese; ‘ona latou nonofo ai lea i lo latou lau‘ele‘ele na ‘ou foa‘i atu ai i la‘u ‘au‘auna o Iakopo.

26Latou te nonofo ai fo‘i ma le filemū, latou te fai fale, latou te fai tōvine fo‘i ma latou nonofo ma le filemū, pe a uma ‘ona ‘ou fa‘ao‘o sala ‘iā te i latou uma o ē ‘ino‘ino ‘iā te i latou i itū uma; ‘ona latou iloa ai lea o a‘u lava o le ALI‘I lo latou Atua.