Sirako 27 - Revised Samoan Catholic Bible

O Agasala e ‘Alo ‘ese Ai

1E to‘atele ni isi ‘ua latou agasala ‘ona o le fia maua ni mea fa‘atauva‘a;

‘ai sē fia mau‘oloa, e liliu‘ese lava e ia ona mata.

2E pei ‘ona fa‘aofi le tina la‘au i le vā o ma‘a e lua,

e fa‘apea ‘ona sosolo le agasala i le vā o lē fa‘atau mai ma lē fa‘atau atu.

3E nutimomoia le soligātulafono fa‘atasi ma le tagata agasala.

4‘Āfai ‘ua e lē mautū i le mata‘u i le Ali‘i, e lē pine ‘ona lepetia lou fale.

5A lūlūina le lūlū fa‘amamā, e totoe ai le otaota,

e fa‘apea ‘ona totoe mea leaga a le tagata i ona mānatunatuga.

6E tofotofoina i le ‘ogāumu ipu a le fai ipu ‘omea,

e fa‘apea ‘ona tofotofoina i puapuagā o tagata amiotonu.

7O le fua o le la‘au e iloa ai le uiga o le fanua ‘ua tupu ai,

e fa‘apea ‘ona iloa le loto o le tagata i ana lava ‘upu.

8‘Aua ‘e te vivi‘i atu i se tagata a o le‘i tautala mai o ia;

auā o le ‘upu e tofotofoina ai le tagata.

9‘Āfai ‘ua e tausisi atu i le amiotonu, ‘e te maua lava, e fa‘a‘ofuina i ai oe,

e pei o se ‘ofu talaloa o le mamalu; ‘ona e nofo ai lea fa‘atasi ma ia,

na te puipuia lava oe e o‘o i le fa‘avavau, i le ‘e te maua ai se lagolago malosi i le aso o le fa‘amasinoga.

10O manu felelei ‘ua ta‘itasi ma fa‘atasia ma sē la te tutusa;

e fa‘apea ‘ona toe fo‘i mai le ‘upu moni i ē tausi i ai.

11E lamalama pea le leona i sana mea e saeia;

e fa‘apea le agasala ‘ona lamalama i tagata amio leaga.

12O le tagata amiotonu e tumau o ia i le poto, e pei o le lā;

a o le vale e feliuliua‘i o ia e pei o le masina.

13‘Ia e tāofi a‘u ‘upu mo le itū aso tatau pe a fa‘atasi oe ma ē vālelea;

a ‘ia e nofo mau lava fa‘atasi ma ē mafaufau.

14E ‘inosia le talatalaga a tagata agasala;

‘ua tōtōē i latou i le fiafia i le agasala.

15O tala a lē tautō so‘o e tutū ai le moge,

o lona fa‘alemigao e punitia ai o taliga.

16E mulimuli atu le masa‘a o le toto i femisa‘iga a tagata fa‘amaualuga,

‘ua tigā lava o taliga ‘iā latou ‘upu fāifai.

O le Fa‘ailoa atu o Mea Lilo

17‘Ai se tasi na te fa‘aalia ‘upu fa‘alilo a lana uō, e lē toe fa‘atuatua i ai se tasi,

na te lē toe maua lava se uō e tusa ma lona loto.

18‘Ia e alofa i lē lua te tuā‘oi, ‘ia e fa‘amaoni ‘iā te ia.

19‘Āfai ‘ua e fa‘aalia i ni isi ana ‘upu fa‘alilo, ‘aua lava ‘e te toe tuliloa ‘iā te ia.

20Auā e pei o le tagata ‘ua na fasiotia lana uō,

e fa‘apea lē ‘ua na lepetia la lā fa‘auō ma lē la te tuā‘oi.

21E pei o lē ‘ua na fa‘asola le manulele nai lona lima,

e fa‘apea ‘ona e tu‘ulafoa‘i atu i lē lua te tuā‘oi,

‘e te lē toe maua lava o ia.

22‘Aua ‘e te mulimuli atu ‘iā te ia, auā e tu mamao lava ia;

e sola lava ia e pei o le ‘aila nai le matāsele,

auā ‘ua manu‘a lona lava loto;

23e lē toe mafai ‘iā te oe ‘ona e fusi ‘iā te ia.

E mafai se fa‘aleleiga ma lē ‘ua e ‘upuleagaina;

24‘ae a uma ‘ona fa‘aali i ni tasi o ‘upu fa‘alilo a le uō,

‘ua lē toe ai se fa‘amoemoe o le agaga puapuagātia.

O le Tagata tau Fa‘ase‘e

25O lē ‘ua genogeno ona mata, na te fa‘atupuina mea leaga

ma ‘ua lē aū fa‘ate‘aina o ia e se tasi.

26Na te fa‘asuamalie lona gutu i ou luma ma vivi‘i mai i au ‘upu ‘atoa uma,

‘ae mulimuli ane, e liliu lava lona gutu, na te fa‘auiga leaga lava i au tala.

27E tele mea ‘ua ‘ou ‘ino‘ino i ai,

‘ae sili lava lo‘u ‘ino‘ino ‘iā te ia, e ‘inosia fo‘i o ia e le Ali‘i.

28‘Ai sē togi se ma‘a i ona luga, e lavea ai o lona lava ulu;

e fa‘apea le tu‘i a le fa‘alata, e manu‘a ai le fa‘alata lava ia.

29O lē ‘eli se lua, e pa‘ū i ai lava ia; o lē tu‘u se ma‘a i luma o lē la te tuā‘oi, e pa‘ū ai lava ia;

o lē na te saunia le matāsele mo lona uso, e fano ai lava o ia.

30O lē taupulepule i se mea matuā leaga e fai,

e pa‘ū i ona lava luga lenā leaga, na te lē iloa le mea ‘ua ala mai ai.

31O ‘upu sesē ma ‘upu fa‘atigā a ē fa‘amaualuga,

e lamalama ‘iā te i latou le fa‘asalaga, e pei o se leona.

32O ē fiafia i le pa‘ū o tagata amiotonu, e fano i latou i le mailei;

e fa‘aumatia i latou i le puapuagā, a o le‘i oti i latou.

33O le loto tigā ma le ita, o mea ‘inosia lava ia,

‘ae maua uma ia mea i le tagata agasala.