Salāmo 27 - Revised Samoan Catholic Bible

O le Fa‘atuatua o Tavita i le Atua i le Aso ValeO le salāmo a Tavita

1O le ALI‘I, o lo‘u malamalama ia ma lo‘u olataga:

o ai ‘ea se ‘ou te fefe ai?

O le ALI‘I, o le malosi ia o lo‘u ola;

‘ou te mata‘u ‘ea ‘iā te ai?

2Na si‘i tau‘a mai ‘iā te a‘u tagata amio leaga,

‘ina ‘ia ‘ai lo‘u tino

o ē sauā mai ma ē ita mai ‘iā te a‘u;

‘ona tausuai lea o i latou ma latou pa‘u‘ū.

3E ui lava ‘ina tolauapi se itūtau‘a e tau ma a‘u,

e lē fefe ai lo‘u loto;

e ui ‘ina si‘itia se tau‘a ‘iā te a‘u,

‘ou te loto tele lava i lea mea.

4E tasi le mea ‘ua ‘ou ole atu ai i le ALI‘I,

o le mea lava lea ‘ou te sā‘ili atu ai;

‘ia ‘ou nofo i le fale o le ALI‘I i aso uma o lo‘u ola,

‘ina ‘ia ‘ou iloa atu ai le matagofie o le ALI‘I,

ma ‘ou sā‘ili i lona malumalu.

5Auā na te fa‘alilo ‘iā te a‘u i lona fale apitaga i le aso vale;

na te natia a‘u i le mea lilo i lona fale fetāfa‘i;

na te fa‘ae‘etia a‘u i le papa.

6O lenei, e fa‘aeaina lo‘u ulu i luga o ē ‘ua ita mai ‘iā te a‘u,

o ē si‘osi‘o ‘iā te a‘u;

‘ou te osia ai taulaga i lona fale fetāfa‘i ma le ‘alaga fiafia;

‘ou te pese ma ‘ou fai pesega i le ALI‘I.

7Le ALI‘I e,

‘ia e fa‘afofoga mai i lo‘u leo,

‘ou te vala‘au;

‘ia e alofa mai ma ‘ia e tali mai ‘iā te a‘u.

8Na fai atu lo‘u loto ‘iā te oe i lau na e fetalai mai,

“‘Ia ‘outou sā‘ili‘ili mai ‘iā te a‘u;

le ALI‘I e, ‘ou te sā‘ili‘ili atu i lau afio,

9‘aua ‘e te liliu ‘ese ou fofoga ‘iā te a‘u.”

‘Aua ‘e te tuli i lau ‘au‘auna i lou to‘atama‘i;

na fai oe mo‘u fesoasoani;

‘aua le tu‘ulafoa‘iina a‘u,

‘aua fo‘i ‘e te tu‘ua a‘u,

le Atua e, lo‘u fa‘aolataga.

10E ui lava ‘ina tu‘ua a‘u e lo‘u tamā ma lo‘u tinā,

‘ae talia a‘u e le ALI‘I.

11Le ALI‘I e,

‘ia e a‘oa‘o mai ‘iā te a‘u i lou ala,

ma ta‘ita‘i ‘iā te a‘u i le ala laulelei,

‘ona o ē ita mai ‘iā te a‘u.

12‘Aua ‘e te tu‘uina a‘u i le mana‘o o ē sauā mai ‘iā te a‘u;

auā ‘ua laga mai ‘iā te a‘u o ē molimau pepelo

ma latou tautalatala i le fa‘asauā.

13‘Ana ‘ou lē fa‘atuatua,

‘ou te iloa le agalelei o le ALI‘I

i le nu‘u o tagata ola,

po ‘ua ‘ou fa‘avaivai, lava.

14‘Inā fa‘alagolago atu ia i le ALI‘I,

‘inā loto tele ia,

e fa‘amalosia fo‘i e ia lou loto;

‘inā fa‘alagolago ia i le ALI‘I.