Salāmo 85 - Revised Samoan Catholic Bible

O le Tatalo ‘ina ‘ia Fa‘afoisia mai e le Atua le ManuiaMa le usu pese. O le salāmo mā le fānauga a Koru

1Le ALI‘I e,

‘ua e fiafia lava i lou nu‘u;

‘ua e fa‘afoisia mai le tāfeaga o Iakopo.

2‘Ua e fa‘amāgaloina le amio leaga a lou nu‘u,

‘ua e ufitia a latou agasala uma lava. Selā.

3‘Ua e ‘ave‘esea lou ma‘ema‘eā uma lava;

‘ua e liliu ‘ese lou to‘asā mamafa.

4Le Atua e, o lo matou fa‘aolataga,

‘ia e fa‘afoisia mai i matou;

‘ia e fa‘amavae atu fo‘i lou to‘atama‘i ‘iā te i matou.

5E fa‘avavau ‘ea lou to‘asā ‘iā te i matou?

‘e te fa‘aualoa ‘ea lou ma‘ema‘eā e au tupulaga.

6‘E te lē toe fa‘aolaola mai ‘ea ‘iā te i matou;

‘ina ‘ia fiafia lava lou nu‘u ‘iā te oe?

7Le ALI‘I e, ‘ia e fa‘ailoa mai ‘iā te i matou lou alofa;

‘ia e foa‘iina mai fo‘i ‘iā te i matou le olataga mai ‘iā te oe.

8‘Ou te fa‘alogologo atu i mea e fetalai mai ai le ALI‘I le Atua;

auā na te fetalai mai ia manuia lona nu‘u

‘atoa ma ona tagata amio Atua;

‘ae ‘aua ne‘i latou toe liliu atu i le valea.

9E moni, ‘ua latalata lana olataga i ē ‘ua matata‘u ‘iā te ia;

‘ina ‘ia tumau ai le mamalu i lo tatou nu‘u.

10O le alofa ma le fa‘amaoni ‘ua la fetaia‘i;

o le amiotonu ma le filemū ‘ua la feasogi.

11E tupu a‘e le fa‘amaoni a‘i le lalolagi;

e va‘ava‘ai ifo fo‘i le amiotonu mai le lagi.

12E foa‘iina mai e le ALI‘I lava le manuia;

e fua mai fo‘i e lo tatou lau‘ele‘ele ona lava fua.

13E muamua atu i ona luma le amiotonu;

na te fa‘atumauina fo‘i ona vae i le ala.