Salāmo 71 - Revised Samoan Catholic Bible

O le Fa‘atuatua i le Atua

1Le ALI‘I e,

‘ou te fa‘atuatua ‘iā te oe;

‘aua ne‘i fa‘amāina a‘u e o‘o i le fa‘avavau.

2‘Ia e lavea‘i mai ‘iā te a‘u i lau amiotonu,

ma ‘ia e fa‘aola mai ‘iā te a‘u;

‘ia e fa‘afofoga mai ‘iā te a‘u,

ma ‘ia e fa‘aola mai ‘iā te a‘u.

3‘Ia fai oe ma papa ‘ou te mau ai,

‘ia ‘ou alu atu pea i ai;

‘ua e pule e fa‘aola mai ‘iā te a‘u;

auā o lo‘u papa ma lo‘u ‘olo o oe lava lea.

4Lo‘u Atua e,

‘ia e fa‘aola mai ‘iā te a‘u a‘i le lima o lē amio leaga,

o le lima o lē amio pa‘a‘ā ma le sauā.

5Auā o oe lava o lo‘u fa‘amoemoega, le Ali‘i e,

le ALI‘I, o lo‘u fa‘atuatuaga oe talu ‘ina ‘ou tamaitiiti.

6O oe ‘ua lagolago mai ‘iā te a‘u talu ‘ina fānaua o a‘u;

na e ‘aumaia a‘u mai le manava o lo‘u tinā;

e lē aunoa ‘ona ‘ou vivi‘i atu ‘iā te oe.

7Sa fai a‘u e peiseaī se mea e ofo ai le to‘atele;

a o oe o lo‘u malu malosi oe.

8E tumu lava lo‘u gutu i lou vi‘iga,

ma lou fa‘ane‘ene‘ega i aso uma lava.

9‘Aua ‘e te lafoa‘i ‘iā te a‘u i ona po ‘ou te toeaina ai;

‘aua ‘e te tu‘ulafoa‘i mai ‘iā te a‘u pe a mavae atu lo‘u malosi.

10Auā ‘ua ‘upuia a‘u e i latou ‘ua ita mai ‘iā te a‘u;

‘ua taupulepule fa‘atasi ē ‘ua lamalama ‘ia oti a‘u.

11‘Ua fa‘apea ane,

“‘Ua tu‘ulafoa‘iina o ia e le Atua;

‘ia ‘outou tuliloa ma pu‘e ‘iā te ia,

auā e leai sē na te lavea‘iina o ia.”

12Le Atua e,

‘aua ‘e te mamao ‘iā te a‘u;

lo‘u Atua e,

‘ia vave ‘ona e fesoasoani mai ‘iā te a‘u.

13‘Ia mamā, ia fa‘aumatia i latou o ē fai a‘u mo latou fili,

‘ia liloia i le luma ma le māsiasi o ē sā‘ili‘ili ‘ia leaga ai a‘u.

14A o a‘u, ‘ou te fa‘amoemoe e lē aunoa,

ma a‘u toe fa‘aopoopoina atu i ou vi‘iga uma lava.

15E ta‘uta‘u atu i lo‘u gutu le amiotonu mai ‘iā te oe,

e ta‘uta‘u fo‘i le olataga mai ‘iā te oe i aso uma lava;

auā ‘ua lē masino ‘iā te a‘u lona faitau aofa‘i.

16‘Ou te alu atu i le malosi o le Ali‘i le ATUA;

‘ou te ta‘uta‘u i lau amiotonu, na o lau lava.

17Le Atua e,

na e a‘oa‘o mai ‘iā te a‘u talu ‘ina ‘ou tamaitiiti;

‘ua o‘o mai fo‘i i nei ona po ‘ua ‘ou fa‘aali atu ou vāvega.

18Le Atua e,

‘aua ‘e te tu‘ulafoa‘i mai ‘iā te a‘u

e o‘o ‘ina toeaina ma ulusinā;

se‘ia ‘ou fa‘aali atu lou ‘a‘ao i lenei tupulaga,

ma lou malosi i ē amulī uma lava.

19Le Atua e,

e silisili lava lau amiotonu,

o mea ‘ua e faia o mea mamana ia.

Le Atua e,

o ai ‘ea sē tusa ma oe?

20O lē ‘ua fa‘ailoa mai ‘iā te a‘u o puapuagā e tele ma le leaga,

‘e te toe fa‘aola mai ‘iā te a‘u,

‘e te toe ‘ava‘e ‘iā te a‘u

nai le mea loloto i le ‘ele‘ele.

21‘E te fa‘ateleina lo‘u mamalu;

‘e te liliu mai ma fa‘amafanafana mai ‘iā te a‘u.

22O a‘u fo‘i, ‘ou te vivi‘i atu ‘iā te oe i le napeli,

o lou fa‘amaoni lava, lo‘u Atua e.

‘Ou te fai pesega ‘iā te oe i le kitara,

o oe le Pa‘ia o Isaraelu.

23E ‘alaga fiafia o‘u laugutu

pe a a‘u fai pesega ‘iā te oe,

‘atoa fo‘i ma lo‘u agaga ‘ua e fa‘aolaina.

24E ta‘uta‘u atu fo‘i lo‘u laulaufaiva

i lau amiotonu i aso uma lava;

auā ‘ua fa‘amāina ma ‘ua māsiasi i latou

o ē sā‘ili‘ili ‘ia leaga ai a‘u.