Salāmo 93 - Revised Samoan Catholic Bible

O le Mana ma le Malosi o le ALI‘I i lona Mālō

1O lo‘o fai le ALI‘I ma tupu, e ‘ofu o ia i le mamalu;

e ‘ofu le ALI‘I i le malosi, ‘ua fusia ai o ia e ia;

e fa‘atumauina fo‘i le lalolagi, e le fa‘agae‘etia.

2O tumau lou nofoāli‘i talu anamuā;

talu mai le vavau lava oe.

3Le ALI‘I e,

‘ua ta‘alili mai vaitafe,

o vaitafe ‘ua ta‘alili ‘ae o latou leo;

o vaitafe ‘ua ta‘alili ‘ae o latou gogolo.

4O le ALI‘I o i le mea maualuga,

e sili ‘ona malosi o ia i le ta‘alili o vai e tele,

o peau malolosi o le sami.

5O āu mau e matuā fa‘amaoni ia;

e onomea lava ‘ona pa‘ia o lou fale,

le ALI‘I e, e fa‘avavau lava.