Salāmo 143 - Revised Samoan Catholic Bible

O le Tatalo i le Atua ‘ina ‘ia Fesoasoani mai pe a PuapuagātiaO le Salāmo a Tavita

1Le ALI‘I e, ‘ia e fa‘afofoga mai i la‘u tatalo;

‘ia liliu mai ou fofoga i la‘u ‘ai‘oi atu;

‘ia e tali mai ‘iā te a‘u i lou fa‘amaoni ma lau amiotonu.

2‘Aua fo‘i ‘e te fa‘ao‘o le fa‘amasinoga i lau ‘au‘auna;

auā e leai se tagata ola e amiotonu i ou luma.

3Auā ‘ua tuliloa mai o lē ita mai ‘iā te a‘u;

‘ua na fasia a‘u ‘ia pa‘ū i le ‘ele‘ele;

‘ua na fa‘anofo a‘u i le pouliuli, pei o ē ‘ua leva ‘ona oti.

4I le ‘ua lailoa lo‘u loto i totonu ‘iā te a‘u;

‘ua femēmēa‘i lava lo‘u loto i totonu ‘iā te a‘u.

5‘Ou te manatu i aso anamua;

‘ou te mānatunatu i mea uma na e faia;

‘ou te mafaufau i galuega a ou ‘a‘ao.

6‘Ou te fa‘aloaloa o‘u lima ‘iā te oe,

‘ou te mana‘o lava ‘iā te oe,

fa‘apei o se nu‘u naumati. Selā.

7Le ALI‘I e, ‘ia e vave tali mai ‘iā te a‘u,

o le a fa‘auma lo‘u nei ola;

‘aua le ‘alo ou fofoga ‘iā te a‘u,

ne‘i tusa a‘u ma tagata e ō ifo i le lua.

8‘Ia ‘ou fa‘alogologo i lou alofa i le taeao;

auā ‘ou te fa‘atuatua ‘iā te oe;

‘ia e fa‘asino mai le ala ‘ou te savali ai;

auā o lo‘o naunau atu lo‘u loto ‘iā te oe.

9Le ALI‘I e,

‘ia e lavea‘iina mai a‘u i ē ita mai;

‘ou te lafi atu ‘iā te oe.

10‘Ia e a‘oa‘o mai ‘iā te a‘u e fai lou finagalo;

auā o oe lava lo‘u Atua; ‘ia ta‘ita‘iina atu a‘u

e lou Agaga lelei i le lau‘ele‘ele laulelei.

11Le ALI‘I e,

‘ia e fa‘aolaola mai ‘iā te a‘u ‘ona o lou suafa;

‘ia e ‘ave‘eseina a‘u i le puapuagā ‘ona o lau amiotonu.

12O lou alofa ‘ia fano ai ‘iā te oe o ē ita mai ‘iā te a‘u;

‘ia e fa‘aumatia fo‘i ē ‘ua fa‘asauā mai ‘iā te a‘u uma lava;

auā o lau ‘au‘auna lava a‘u nei.