Iopu 37 - Revised Samoan Catholic Bible

O toe ‘Upu i le Lauga a Eliu

1“O le mea fo‘i lenei ‘ua gatete ai lo‘u loto,

‘ua sapotuvale ai fo‘i i le mea o i ai.

2‘Inā matuā fa‘alogologo atu ia i le ta‘alili o lona si‘ufofoga,

ma le gogolo ‘ua o‘o atu nai lona fofoga.

3‘Ua ia ta‘ita‘iina ai i lalo o le lagi ‘atoa uma,

ma lona uila fo‘i e o‘o i tulu‘iga o le lalolagi.

4E mulimuli ane ai, ‘ona ta‘alili mai ai lea o le leo;

‘ua ia fa‘apā mai le faititili i lona si‘ufofoga silisili;

‘ua ia lē tāofi fo‘i i ai pe a lagona lona si‘ufofoga.

5‘Ua fa‘apā mai, e le Atua le faititili silisili ‘ese i lona si‘ufofoga;

e faia e ia mea tetele e lē mailoa e i tatou.

6Auā e fetalai ane o ia i le kiona,

‘‘Inā tō ia oe i le lau‘ele‘ele;’

‘ua fa‘apea fo‘i i le timu ma ona timuga e matuā tetele.

7Na te tāofi lima o tagata uma,

‘ina ‘ia iloa e tagata uma lana galuega.

8‘Ona ō ai lea o manu fe‘ai i mea latou te fale ai,

ma ta‘o‘oto i o latou ana.

9E sau le asiosio mai le itū i saute,

ma le ma‘alili mai le itū i matū.

10O le mānava mai o le Atua e ‘aumai ai le vaito‘a;

e fa‘aitiitiina ai fo‘i le lautele o vai.

11O lona pupula fo‘i e tō ifo ai le ao uliuli;

o lona malamalama e ta‘ape‘ape ai ao.

12E fe‘avea‘iina ai e ia fa‘ata‘amilomilo i lana pule,

‘ina ‘ia fai ai mea uma ‘ua ia finagalo i ai i luga o le atu laulau uma lava.

13Na te fa‘ao‘oina mai ai, po o le a‘oa‘iga,

po o lona lau‘ele‘ele po o le alofa.

14“Iopu e, fa‘afofoga mai ia i lenei mea;

‘inā tula‘i mai ia, ma mafaufau i vāvega o le Atua.

15‘Ua e iloa ‘ea pe fa‘apefea ‘ona saunia o ia mea e le Atua,

ma fa‘a‘emoina mai e ia le uila o lona ao?

16‘Ua e iloa ‘ea le fuatia o le mamafa o ao uliuli,

o vāvega o Lē e ona le poto ‘ato‘atoa?

17Pe fa‘apefea fo‘i ‘ona vevela ai ou ‘ofu

‘ina ‘ua fa‘amāninoaina e ia le lalolagi i le matagi mai le itū i saute?

18Na ‘oulua fofola fa‘atasi ‘ea ma ia le lagi,

‘ua mālōlō e pei o se fa‘aata ‘apamemea?

19‘Inā e fa‘ailoa mai ia pe se a se ‘upu matou te fai atu ai ‘iā te ia;

matou te lē mafai ‘ona sauni atu ai ‘ona o le pouliuli.

20E ta‘uina atu ‘ea ‘iā te ia ‘ua ‘ou tautala?

‘Āfai e tautala atu se tasi, e fano ai lava o ia.

21O lenei, e lē va‘aia le malamalama pupula o lo‘o i ao o le lagi;

‘ae agi mai le matagi, ‘ona matafitafi ai lea.

22E sau le pupula fa‘aauro mai le itū i matū

o lo‘o i le Atua le mamalu mata‘utia.

23A o Lē e ona le malosi uma lava,

tatou te lē mafai ‘ona iloa o ia;

e silisili ‘ese lona malosi ma lona fa‘amasinoga,

e sili fo‘i lana amiotonu, na te lē agaleaga.

24O le mea lea e matata‘u ai tagata ‘iā te ia;

na te lē silasila i se tasi o ē o popoto o latou loto.”