2 Nofoa‘iga a Tupu 27 - Revised Samoan Catholic Bible

O Iotama le Tupu o Iuta(2 Tu 15.32-38)

1E luafulu ma le lima o tausaga o Iotama ‘ina ‘ua fai o ia ma tupu; ‘ua fai fo‘i o ia ma tupu i Ierusalema i tausaga e sefulu ma le ono. O le igoa fo‘i o lona tinā o Ierusa o le afafine o Satoka.

2‘Ua faia e ia le amiotonu i luma o le ALI‘I, e tusa ma mea uma na faia e Usia lona tamā; a ‘ua lē ulufale atu o ia i le malumalu o le ALI‘I. ‘Ua fai pea fo‘i mea leaga e le nu‘u.

3‘Ua faia e ia le faitoto‘a aupito i luga o le fale o le ALI‘I ma ‘ua faia fo‘i galuega e tele i le pā o Ofele.

4‘Ua ia faia fo‘i ‘a‘ai i mauga o Iuta, ‘ua faia fo‘i ‘olo ma fale leoleo i vao matua.