2 Makapaio 15 - Revised Samoan Catholic Bible

O Fuafuaga leaga a Nikanora

1A ‘ua logo ‘ia Nikanora o lo‘o i ai Iuta i le lau‘ele‘ele o Samaria, ‘ona manatu ai lea o ia e si‘i le tau‘a ‘iā te ia ma lona malosi ‘atoa i le aso sapati.

2A o tagata Iutaia sa mulimuli ‘iā te ia, ‘ona ‘ua fa‘amalosia ai i latou, na latou fai atu ‘iā te ia, “‘Aua ‘e te faia lenā mea fa‘asauā ma le lē taupulea, a ‘ia e fa‘aaloalo i le aso pa‘ia ma ‘ia e migao i lē na te silafia mea uma.”

3‘Ona fesili ai lea o lea tagata ‘ua silimusa le leaga: Po ‘ua mamana i le lagi o lē na poloa‘i ‘ia tausia le aso sapati.

4‘Ua latou tali atu, “O le Ali‘i soifua lava ia, le Pule aoao i le lagi, na ia poloa‘i ‘ia tausia o lona fitu o aso.”

5A ‘ua tali mai o ia, “O a‘u fo‘i o le pule aoao i le lalolagi, ‘ou te poloa‘i atu ‘ia tago i o ‘outou ‘au‘upega ma ‘ia fa‘ataunu‘uina le fe‘au a le tupu.” ‘Ae ui i lea, ‘ua lē o‘o lava ‘ina taulau lona fa‘amoemoe.

O le Tapenaga a Iuta i le Tau‘a

6Sa manatu Nikanora, e fa‘aosofia lava ia i lona fa‘amaualuga tele, o le a fa‘atūina e ia se ma‘a fa‘amanatu i lona manumālō ‘iā Iuta.

7A o Makapaio sa fa‘alagolago pea ma le fa‘atuatua malosi o le a maua mai e ia le fesoasoani a le Atua,

8ma ‘ua apoapoa‘i atu i ona tagata, ‘aua ne‘i matata‘u i latou i le oso mai o nu‘u ‘ese, ‘ae ‘ia manatua pea o le fesoasoani mai le lagi na latou maua ma ‘ia latou fa‘alagolago o le a toe foa‘i mai nei le manumālō ‘iā te i latou e lē ona le mana uma.

9Ma ‘ua fa‘amafanafana ‘iā te i latou i ‘upu o le tulafono ma le ‘au perofeta, o fa‘amanatu fo‘i i tau‘a na latou mua‘i faia ma ‘ua na fa‘amausalīina atili ai i latou.

10‘Ua uma ‘ona fa‘amalosia o latou loto i ana ‘upu, ‘ona ia fa‘aali fo‘i lea ‘iā te i latou o le amio pepelo a nu‘u ‘ese ma le soli o a latou tautoga.

11‘Ua na tu‘u atu ‘iā i latou ta‘ito‘atasi le ‘au‘upega, e lē o le puipui o le talitā ma le tao, a o ‘upu e sili ‘ona lelei ‘atoa ma apoapoa‘iga, ‘ona ia fa‘amatala fo‘i lea ‘iā i latou lana miti ‘ua tatau lava ‘ona matuā talitonu i ai, ‘ua na fa‘afiafia ai o i latou uma.

12O le mea lenei na fa‘aalia ‘iā te ia: O Onia, lē na mua‘i ositaulaga sili, o le tagata amio lelei ma le agamalū ma le fofoga mamalu, o le tagata amiotonu ma le mālie lava ana fa‘amatalaga, na ia fa‘asaga talu lona itiiti i le tausiga o le amiotonu uma, o lenei ‘ua fa‘aloaloa ona lima ma tatalo mo le nu‘u ‘atoa o tagata Iutaia; 2 Maka 3.1

13mulimuli ane ‘ua aliali mai ma le tasi tagata, ‘ua ofoofogia lava lona mamalu ma le tele o ona tausaga, o si‘omia o ia i le mamalu matuā tele.

14‘Ona faia lea e Onia o ‘upu nei: “O le tagata lenei ‘ua alofa tele i le ‘au uso ma le nu‘u o Isaraelu; o le tagata lenei ‘ua saga momoli talosaga e tele mo le nu‘u ma le ‘a‘ai pa‘ia ‘atoa, o Ieremia lenei, le perofeta a le Atua.”

15‘Ae fa‘aloaloa e Ieremia lona lima taumatau ma tu‘u mai ‘iā Iuta se pelu auro, o fa‘apea mai:

16“‘Ia e tali le pelu pa‘ia, o le mea alofa a le Atua, ‘e te fa‘ato‘ilaloina a‘i o ē ‘ua fai ma fili o lo‘u nu‘u o Isaraelu.”

17‘Ua fa‘amafanafanaina i latou i ‘upu matuā mālie a Iuta, ‘ua fa‘aoso ai le loto tele ma fa‘amausalīina ai o loto o taulele‘a, ‘ona tonu lea ‘iā te i latou ‘ia tau le tau‘a ma ‘ia tauivi ma le loto tele, ‘ina ‘ia fa‘ai‘uina loa le mea i lo latou malosi, auā le faigatā ‘ua tupu mo le ‘a‘ai pa‘ia ma le malumalu.

18Auā sa itiiti lo latou popole mo a latou avā, ma latou fānau mo latou fo‘i uso, a o lo latou popole muamua ma le tele, o le pa‘ia o le malumalu ne‘i solia. 1 Maka 4.36

19A o tagata sa i le ‘a‘ai, ‘ua lē itiiti fo‘i lo latou atu mo i latou o le a tau le tau‘a.

O le To‘ilalo ma le Oti o Nikanora

20Sa fa‘atalitali e i latou uma i se fa‘ai‘uga ‘ia vave maua; ‘ua o‘o lava ‘ina fa‘apotopoto le fili ma ‘ua fa‘avasegaina la latou ‘au, o tutū i tulaga lelei o elefane ma ē ti‘eti‘e i solofanua.

21‘Ua iloa atu e Makapaio lea itūtau‘a e to‘atele, ma o latou ‘au‘upega mata ‘ese‘ese ma le mata pāū o elefane, ‘ona ia si‘i a‘e lea ona lima i le lagi ma ‘ua vala‘au atu i le Ali‘i na te faia vāvega, na te lē foa‘iina fo‘i le mālō i le malosi o ‘au‘upega, ‘ae foa‘i lava, e tusa ma lona finagalo malie, ‘iā te i latou e tatau i ai.

22‘Ua fa‘apea ‘ona ia tatalo atu ai, “O oe le Ali‘i, ‘ua e ‘auina mai lau agelu, i aso o Esekia le tupu o Iuta ma ‘ua e fa‘aumatia i le togālauapi o Sanerivi o tagata e selau ma le valugafulu ma le lima o afe; 1 Maka 7.40-42; 2 Maka 8.19; 2 Tu 19.35; Isai 37.36

23o lenei, le Tupu e o le lagi, ‘ia e ‘auina mai lau agelu lelei i o matou luma na te fa‘atupu le mata‘u ma le atu i le mamana o lou ‘a‘ao,

24‘ina ‘ia matata‘u ai o i latou ‘ua ō mai i ni ‘upu fāifai e tau ma lou nu‘u pa‘ia.” Na fa‘apea lava ‘ona ia tatalo.

25O Nikanora ma lana itūtau‘a ‘ua latou oso mai, o pepese ma ili a latou pū. 1 Maka 7.43-50

26A o Iuta ma ona tagata ‘ua latou sagai i le tau‘a, o vala‘au i le Atua ‘iā latou tatalo.

27O latou lima sa tau ai, a o latou loto sa tatalo ai i le Ali‘i ma ‘ua latou fasia o tagata e itiiti le tolu sefulu ma le lima o afe, o fiafia tele i latou ‘ina ‘ua tino mai le afio o le Atua.

28‘Ua uma le tau‘a ma ‘ua latou fo‘i ma le fiafia, ‘ona latou maua lea le tino o Nikanora ma lona ‘ofu tau, ‘ua fasia lava ia.

29‘Ona pā ai lea le ‘alaga ma ‘ua nunununu le ‘au, ma ‘ua latou vivi‘i atu i le Ali‘i mamana i le gagana o o latou tua‘ā.

30A o Iuta, o ia lea sa nofo sauni e tu‘u atu lona tino ma lona agaga e o‘o i le oti mo ona uso Iutaia, ‘ua ia poloa‘i ‘ia vavae‘esea le ulu o Nikanora, fa‘apea fo‘i ma lona lima e o‘o i le tau‘au ma ‘ia ‘auina atu i Ierusalema.

31‘Ua malaga atu fo‘i i ai o ia ma ‘ua na fa‘apotopotoina ai o ona uso Iutaia ma le ‘au ositaulaga i luma o le fatafaitaulaga, ‘ona poloa‘i fo‘i lea ia ‘a‘amia i latou ‘ua i le ‘olo;

32ma ‘ua ia fa‘aali atu ‘iā te i latou le ulu o Nikanora ma le lima agasala na ia si‘i a‘e, i lona fa‘asausili anoanoa‘i, i le afio‘aga pa‘ia o le Atua e ona le mana uma.

33Na poloa‘i ‘ia tipitipi le laulaufaiva o le tagata agasala o Nikanora ma ‘ia fagaina a‘i o manu felelei, a ‘ia fa‘atautau i luma o le malumalu le lima o lea tagata valea.

34‘Ona vivi‘i atu lea o i latou uma i le Ali‘i o le lagi, o fai ane, “‘Ia vi‘ia lē ‘ua na tausimamāina lona afio‘aga!”

35‘Ua fa‘atūina fo‘i le ulu o Nikanora i luga o le ‘olo, ‘ina ‘ia faia ai ma fa‘ailoga malamalama ma le mautinoa o le fesoasoani mai a le Atua. 1 Samu 31.9-10

36‘Ona latou fai lea se i‘ugafono ma le loto gatasitasi, ‘ina ‘ia ‘aua lava le tu‘ua o lea aso e aunoa ma ni sauniga e fa‘ailogaina ai. 1 Maka 7.49

37A ‘ia fa‘amamaluina lava i lona sefulu ma le tolu o aso o le masina ‘ua ta‘ua o Atara i le fa‘a-Suria, o le aso lea e muamua i le aso o Moretekai.

O ‘Upu Fa‘ai‘u

38O mea lava ia na faia e uiga ‘iā Nikanora ma ‘ua pule ai pea o tagata Eperu i le ‘a‘ai talu mai o ia ona po, o lea fo‘i o le a fa‘agata i ai la‘u tala.

39‘Āfai ‘ua lelei ‘ona tusia, e tusa ‘ona tatau i le tusitala, o le mea lava lea sa ‘ou loto i ai; ‘ae peita‘i, ‘āfai e fa‘alēlelei le fa‘amatalaga, ‘ona ‘ua pau o se mea ‘ou te mafaia.

40Auā, e pei ‘ona leaga le saga inu pea i le uaina po o le saga inu pea i le vaiauli; ‘ae malie lava pe a fa‘avasa‘i le inu i le uaina ma le inu i le vai, e fa‘apea fo‘i ma i latou e faitautusi, ‘āfai e alualu sa‘o pea o le tala, e lē malie ai ‘iā i latou. O lenei, o le a fa‘ai‘u lava ‘i‘inei la‘u tala.