Isaia 16 - Revised Samoan Catholic Bible

O le Malaia a Moapi

1‘Ia ‘outou avatu le tama‘i mamoe

i le ali‘i e pule i le nu‘u,

o alu atu Sela e ui atu i le vao,

i le mauga o le tama fafine a Siona.

2Auā e pei o le manu ‘ua sola ‘ua tulia i lona ōfaga,

e fa‘apea tama fafine a Moapi i asaga o Arinona.

3“‘Inā fai ia sau pule, ‘inā fa‘atonu mai ia;

‘ia ‘outou fa‘apaolo mai,

peiseaī o le po le aoauli;

‘inā nanā ia i ē ‘ua tulia,

‘aua ne‘i fa‘aalia ē ‘ua sōsōla.

4Se‘i tou mau ia ma ē ‘ua tulia o Moapi;

‘ia fai oe ma lafitaga ‘iā te i latou

i lē na te fa‘aumatia;

auā e mavae atu lē ‘ua fa‘asauā,

e uma fo‘i le malaia,

e fa‘aumatia lē na solia i latou a‘i le lau‘ele‘ele.”

5‘Ona fa‘atumauina lea o le nofoāli‘i i le alofa,

e nofo ai fo‘i ma le fa‘amaoni i le fale ‘ie o Tavita,

o lē na te fa‘amasinoina ma tausisi i le fa‘amasinoga,

e fa‘ata‘alise fo‘i o ia i le amiotonu.

6‘Ua matou fa‘alogo atu i le fa‘amaualuga o Moapi,

‘ua matuā fa‘amaualuga ia,

o lona fa‘amaualuga ma lona fa‘asiasia ma lona fa‘asausili;

e pepelo ana ‘upu fa‘atauva‘a.

7O le mea lea e uiō ai Moapi ‘ona o Moapi,

e uiō i latou uma lava;

tou te feoi ‘ona o fa‘avae o Kiriaresa,

‘ua taia lava i latou.

8Auā ‘ua mamae fanua o Hesepona;

o le vine o Sepema ‘ua gaui‘eseina ‘ona la e ali‘i o nu‘u ‘ese;

na latou o‘o i Iasaru,

na sosolo atu i le vao na salalau ‘ona la,

na sopo‘ia atu le sami.

9O le mea lea ‘ou te tagi ai

ma le tagi o Iasaru ‘ona o le vine o Sepema;

‘ou te fa‘asūsūina oe i o‘u loimata,

Hesepona e ma Eleale e;

auā ‘ua pā atu le ‘alaga ‘iā ‘outou fua otatā

ma la ‘outou seleselegāsaito.

10‘Ua ‘ave‘esea fo‘i le fiafia ma le ‘oli‘oli i le fanua lafulemū,

e leai se ‘alaga fiafia,

e leai fo‘i sē pisa i tōvine;

o lē solia vine na te lē solia ni uaina i soligāvine;

‘ua ‘ou fa‘ai‘uina le ‘alaga fiafia.

11O le mea lea e tagi ai lo‘u manava

pei o le kitara ‘ona o Moapi,

‘atoa ma lo‘u loto ‘ona o Kiriaresa.

12A iloa fo‘i Moapi pe a lailoa o ia i luga o le mea maualuga, ‘ona alu atu ai lea o ia i lona malumalu e tatalo ai, ‘ae lē mafai o ia.

13O le afioga lea a le ALI‘I na ia fetalai mai ai ‘iā Moapi anamua;

14a o ona po nei o lo‘o fetalai mai ai le ALI‘I, o lo‘o fa‘apea mai, O tausaga e tolu, e tusa ma tausaga o lē ‘ua galue i le taui, e ta‘ufa‘atauva‘aina ai le mamalu o Moapi ma le vao tagata uma e to‘atele; o ē ‘ua totoe fo‘i e matuā to‘aitiiti lava i latou, e leai se malosi.