Salāmo 39 - Revised Samoan Catholic Bible

O Mafaufauga a Tavita i le Pu‘upu‘u ma le Fa‘atauva‘a o le Olaga NeiMa le usu pese o Iutana. O le salāmo a Tavita

1Na ‘ou fa‘apea,

“‘Ou te fa‘aeteete i lo‘u ala,

‘ina ne‘i ‘ou agasala i lo‘u laulaufaiva;

‘ou te fa‘aeteete i lo‘u gutu,

‘ou te tāofiofi a o i o‘u luma tagata amio leaga.”

2Na ‘ou fa‘alologo, ‘ua ‘ou lē gagana;

na ‘ou lē tautala lava i mea lelei;

‘ona fa‘agae‘etia ai lea o lo‘u tigā.

3Sa vevela lava lo‘u loto i totonu ‘iā te a‘u;

o lo‘u mafaufau fo‘i ‘ua mū a‘i le afi;

‘ona tautala ai lea o lo‘u laulaufaiva.

4“Le ALI‘I e,

‘ia e fa‘ailoa mai ‘iā te a‘u lo‘u i‘uga,

pe se a fo‘i le fua o o‘u aso;

‘ina ‘ia ‘ou iloa pe fia ni aso ‘ua toe ‘iā te a‘u.

5Fa‘auta, ‘ua e faia o‘u aso e pei o le lautele o le alofilima;

o lo‘u olaga fo‘i, ‘ua peiseaī ‘ua leai i ou luma;

e moni, o tagata uma a o malolosi,

e matuā fa‘atauva‘a lava i latou. Selā.

6E moni, o lo‘o sāvavali tagata e peiseaī o se ata;

e moni, ‘ua fa‘aatuatuvaleina fua lava i latou;

‘ua fa‘afaula‘i o ia le ‘oloa,

‘ae lē iloa e ia po o ai e fa‘apotopotoina ai.

7“O lenei, le ALI‘I e,

se a ‘ea se mea ‘ou te fa‘atalitali i ai?

O lo‘o ‘iā te oe lo‘u lava fa‘amoemoe.

8‘Ia e lavea‘i mai ‘iā te a‘u a‘i ‘ou solitulafono uma;

‘aua ne‘i fa‘alumaina a‘u e le vale.

9‘Ou te fa‘alologo lava a‘u, ‘ou te lē gagana;

auā o oe lava na e faia.

10‘Ia e tāofia lau ta ‘iā te a‘u;

‘ua fa‘aumatia a‘u nei i le sasa mai o lou ‘a‘ao.

11“‘Ae sasa i le tagata i a‘oa‘iga ‘ona o le agasala,

‘ona e fa‘aumatia ai lea o lona lelei,

e pei o le mogamoga ‘ona atia o le ‘ofu;

e moni, o tagata uma e fa‘atauva‘a lava i latou. Selā.

12“Le ALI‘I e,

‘ia e fa‘afofoga mai i la‘u tatalo,

ma liliu mai ou fofoga i la‘u ‘alaga;

‘aua ne‘i e lē tali mai i la‘u tagi;

auā ‘ou te se tagata ‘ese a‘u i ou luma ma le āumau,

e pei o o‘u tamā uma lava.

13‘Ia ‘alo ‘ese ou fofoga ‘iā te a‘u,

se‘ia ‘ou mālōlō ane,

manū ‘ou te le‘i alu ‘ese ma ‘ua leai o a‘u.”