Salāmo 53 - Revised Samoan Catholic Bible

‘Ua Fa‘amatalaina le Amioga a Tagata Amio LeagaMa le usu pese i le ma‘alata. O le salāmo a Tavita e a‘oa‘o ai(Sala 14)

1‘Ua fai ifo le tagata valea i lona loto,

“E leai se Atua.”

‘Ua leaga lava i latou,

‘ua ‘inosia a latou amioga,

e leai lava se tasi ‘ua amio lelei.

2Na silasila mai le Atua mai le lagi

i le fānau a tagata,

‘ina ‘ia silafia pe i ai se tasi ‘ua poto,

o sē na te sā‘ilia le Atua.

3‘Ua latou ta‘itasi ma fo‘i i tua,

‘ua leaga fa‘atasi lava i latou;

e leai se tasi ‘ua amio lelei,

e leai lava se tasi.

4E lē o iloa ‘ea o ē fai amioleaga?

‘ua latou ‘a‘ai i lo‘u nu‘u,

e pei ‘ona latou ‘a‘ai i le mea e ‘ai;

‘ua latou lē vala‘au i le Atua.

5‘Ua latou matuā matata‘u

i lea mea sa leai se mea e matata‘u ai.

Auā na fa‘ata‘ape‘apeina e le Atua o ivi,

o lē na tolauapi mai ‘iā te oe;

na fa‘amāina i latou,

auā ‘ua ‘ino‘ino le Atua ‘iā te i latou.

6E! fia iloa sē na te ‘aumaia

le olataga o Isaraelu mai Siona.

Pe a fa‘afoisia mai e le Atua le tāfeaga o lona nu‘u,

‘ona ‘oli‘oli ai lea o Iakopo, e fiafia ai Isaraelu.