2 Makapaio 10 - Revised Samoan Catholic Bible

O le Fa‘amamāga o le Malumalu(1 Maka 4.36-61)

1A o Makapaio ma i latou sa fa‘atasi ma ia, ‘ua latou toe maua, i le fesoasoani mai a le Ali‘i, o le malumalu ma le ‘a‘ai.

2‘Ua na lepetia o fatafaitaulaga sa atiina a‘e solo e nu‘u ‘ese i auala, ‘ua na tātu‘u fo‘i i lalo o togāla‘au a tupua;

3ma ‘ua latou fa‘amamāina le malumalu, ‘ona latou ati a‘e lea se fatafaitaulaga fou ma ‘ua latou maua mai le afi i le oloina o ma‘a, ‘ona latou momoli ai lea o taulaga, ‘ina ‘ua mavae atu o tausaga e lua ma ‘ua latou tutu o molī ma momoli le mea manogi, ‘atoa ma areto e laulauina i luma.

4‘Ua uma mea ia, ‘ona latou punonou to‘ele lea, o ‘ai‘oi atu ai i le Ali‘i, ‘ia ‘aua ne‘i toe tu‘uina i latou e pa‘u‘ū i ni mala tetele fa‘apea; ‘ae ‘āfai ‘ua o‘o ‘ina pa‘u‘ū i latou i le agasala, ‘ia fa‘amamā teisi lana a‘oa‘iga ‘iā te i latou, ‘ae ‘aua ne‘i tu‘uina atu i latou i tagata sauā ma le fāifai i le Atua.

5A o le aso lava na fa‘aleagaina ai le malumalu e tagata nu‘u ‘ese, o le aso luasefulu ma le lima o le masina o Kaseleu, o le aso ma le masina fo‘i lea na faia ai le fa‘amamāga o le malumalu.

6Ma ‘ua latou fa‘amamaluina ma le fiafia i aso e valu e pei ‘ona faia i aso o fale apitaga, o manatu e i latou e le‘i leva ni aso talu ‘ona latou fa‘amamalu i le aso o fale apitaga i ana o mauga, e pei lava o manu ‘aivao.

7O le mea fo‘i lea sa latou ‘ave ai ni laula‘au ma ni lauvao ma ni laupama e fa‘aaloalo a‘i i lē ‘ua na ta‘ita‘iina i latou ma le manuia i le fa‘amamāina o lona malumalu.

8Ma ‘ua latou fa‘atonu atu, i se tulafono ma se poloa‘iga fa‘asalalau, i le nu‘u ‘atoa o tagata Iutaia ‘ia fa‘amamaluina o aso lava ia i tausaga ta‘itasi uma.

O le Pule o Tulomaio Makarona i lona lava Ola

9Ma ‘ua fa‘apea lava ‘ona fa‘amavae ma le olaga o Atioko, o lē ta‘ua le Mamalu.

10O le a matou tala atu nei o mea na faia e Eupato, le atali‘i o Atioko le amio leaga, o fai fa‘apu‘upu‘u le tala i mala ‘ua tutupu i tau‘a. 1 Maka 6.6-17

11Auā, na pule o le ali‘i nei i le mālō, ‘ona ia tofia lea ma pule i mea tau le mālō o le tagata ‘ua igoa ‘iā Lusia, o le ta‘ita‘i ‘au o le itūtau‘a o Foinie ma Suria.

12Auā o Tulomaio, o lē ta‘ua o Makarona, sa loto e tausi pea i le mea tonu i le fa‘afeagai ma tagata Iutaia, ‘ae maise ‘ona ‘ua fa‘asauāina fua lava i latou ma ‘ua fia tausi ‘iā te i latou ma le filemū. 2 Maka 8.8

13O le mea lea na molia ai o ia i luma o Eupato e ana uō; ‘ua fa‘alogo so‘o fo‘i o ia ‘ua ta‘ua o ia o le fa‘alata, ‘ona ‘ua tu‘ulafoa‘iina e ia le motu o Kuperu sa tu‘uina mai i lana tausiga e Filometo, ma ‘ua ‘au o ia fa‘atasi ma Atioko Epifano; a ‘ua lē toe lotogatasi fo‘i ma ia, ‘ona fa‘ai‘u lea o lona ola i le inu i se vai ‘o‘ona.

O le Fa‘ato‘ilaloga o Itumaia e Iuta Makapaio(1 Maka 5.1-8)

14A o Korekia, na ‘avea ma pule o itūmālō ia, sa fai lana itūtau‘a o tagata nu‘u ‘ese, sa tau le tau‘a ma tagata Iutaia i aso faiso‘o.

15O tagata Itumaia fo‘i sa nonofo i latou i ‘olo malolosi, sa tali ai e i latou o ē sa tuli‘esea mai Ierusalema ma taumafai pea ‘ona tau ai le tau‘a. 1 Maka 5.1-8

16A o i latou sa fa‘atasi ma Makapaio, na latou fa‘asaga atu i le Ali‘i, o tagi atu ‘ina ‘ia fesoasoani mai ‘iā te i latou ma ‘ua latou fai le oso i ‘olo o tagata Itumaia. 2 Maka 8.23-24

17‘Ua latou feosofi i ai ma le malosi tele, ‘ua latou maua ai o ‘olo ma ‘ua latou fasia o ē sa latou maua ai; ma ‘ua itiiti le luasefulu o afe le aofa‘i o ē na latou fasia.

18A o ni isi ‘ua latou sōsōla i totonu o ‘olo e lua matuā malolosi, sa ‘iā te i latou o mea uma e aogā i le tau‘a.

19‘Ua tu‘ua e Makapaio e tau ma i latou ia o Simona ma Iosefa, fa‘apea ma Sakaio ma tagata e to‘atele sa fa‘atasi ma i latou, a o ia ‘ua fa‘asaga atu e tau ma le fili i mea sa i ai le fa‘alavelave.

20A o fitafita a Simona, ‘ua tōsina i latou e le manumanu, ‘ua ‘ole‘olegia i latou i ni tupe e tagata sa i totonu o ‘olo, ‘ua latou talia mai le fitugafulu o afe o tupe ario ma ‘ua latou tu‘ua ni isi e sōsōla ‘ese.

21‘Ua tala‘iina ‘iā Makapaio le mea ‘ua faia, ‘ona fa‘apotopoto ai lea o ta‘imua o le nu‘u ma ‘ua na molia ai o ia tagata ‘ona ‘ua latou fa‘atau i tupe o latou lava uso i le fa‘asola o latou fili.

22‘Ona ia fasioti lea i tagata ia ‘ua ‘avea ma fa‘alata, ma ‘ua pu‘e loa e ia o ‘olo e lua.

23‘Ua fa‘amanuiaina i mea uma o lana taumafai ma lana ‘au‘upega ma ‘ua na fasia o tagata e itiiti le luafulu afe i totonu o ‘olo e lua.

‘Ua Fasia e Iuta ma lana ‘au o Timoteo

24A o Timoteo, sa mua‘i faia‘ina o ia e Iuta, ‘ua na fa‘apotopotoina se itūtau‘a e to‘atele o tagata nu‘u ‘ese, ‘atoa ma le ‘au o tagata Asia ‘ua ti‘eti‘e i solofanua, na sau o ia i le fia maua fa‘amalosi le ‘ele‘ele o Iuta.

25A o Makapaio ma i latou sa fa‘atasi ma ia, ‘ina ‘ua latou iloa ‘ua lata mai o ia, na latou tagi atu i le Ali‘i, o lu‘ulu‘u le ‘ele‘ele i luga o latou ulu, o fusi o latou sulugātiti i ‘ie talatala;

26ma punonou to‘ele i luma o le fatafaitaulaga, ‘ia alofa mai o ia ‘iā te i latou, ‘ia ‘avea fo‘i mōna fili o o latou fili, ma ‘ia tete‘e atu i ē ‘ua oso mai ‘iā te i latou, e pei ‘ona folafola mai i le tulafono. Eso 23.22

27‘Ua uma la latou tatalo, ‘ona latou tago lea i o latou ‘au‘upega, ‘ua latou fa‘amamao atu ma le ‘a‘ai, ‘ua latou fa‘alata atu i le fili, ‘ona tutū ai lea i latou.

28‘Ua tafa mai o ata, ‘ona tau ai lea o itūtau‘a e lua; o le tasi itū sa i ai le moni o le manumālō ma le manuia, o le Ali‘i lea fa‘atasi ma lo latou loto tele; a o le tasi itū sa lagolago tasi i lea tau‘a i lo latou lava fia mālō.

29A ‘ua velavela le tau‘a, ‘ona aliali lea i mata o le fili o tagata e to‘alima mai le lagi o ti‘eti‘e i solofanua ‘ua teuina i ni fa‘agutu auro, sa fai i latou ma ta‘ita‘i o tagata Iutaia. 2 Maka 5.4

30Sa i ai o Makapaio i le vā o le to‘alua o i latou, sa la puipui ‘iā te ia ‘iā la ‘au‘upega ‘ina ne‘i manu‘a o ia; ‘ae sa latou fana atu ni u ma ni uila i le fili, sa fa‘atauasoina ‘iā i latou, ma nunuvale ai i le mata‘u, ma ‘ua latou pa‘u‘ū ai.

31‘Ua fasia ai le luafulu afe ma le lima selau, ‘atoa fo‘i ma le ono selau o le ‘au e ti‘eti‘e i solofanua.

32A o Timoteo ‘ua sola ia i Karasa, o le ‘olo malosi lea sa pule i ai o Kairea. 1 Maka 13.43-48

33A o Makapaio mōna tagata ‘ua latou ō ma le fiafia e vagavagai i le ‘olo i aso e fa.

34A o ē sa i totonu, ‘ua fa‘alagolago i latou i le malosi o le ‘olo ma ‘ua latou lafo ni ‘upu fāifai e tele ma ni ‘upu leaga.

35A ‘ua tafa mai ata o lona lima o aso, ‘ona feosofi lea ma le loto tele i le pavali o taulele‘a e to‘aluasefulu o le ‘au a Makapaio, sa tigā tele o latou loto ‘ona o ia ‘upu fāifai ma ‘ua latou fe‘ā‘ei i luga ma le loto toa.

36A ‘ua fa‘apea fo‘i ni isi ‘ona latou fe‘ā‘ei ai ma latou fa‘asaga e susunu o ‘olo ma faitoto‘a o le ‘a‘ai, ma ‘ua latou susunuolaina tagata fāifai lava ia.

37‘Ua latou vetea le ‘a‘ai i aso ‘ato‘atoa e lua ma ‘ua fasiotia ai o Timoteo ‘ua latou maua o lafi i se mea lilo; ‘ua latou fasioti fo‘i ‘iā Kairea, lona uso ma Apolofane.

38‘Ua māe‘a o mea ia, ‘ona latou fa‘amanū atu ai lea i le Ali‘i, i ni pese ma ni vi‘iga, ‘ona ‘ua faia e ia mea tetele ‘iā Isaraelu ma ‘ua ia foa‘i mai ‘iā te i latou le manumālō.