1Le ALI‘I e, le Atua o lē taui ma sui,
le Atua e o lē taui ma sui,
‘ia e fa‘aali mai lou pupula.
2‘Ia e tula‘i mai,
o oe le fa‘amasino o le lalolagi;
‘ia e tu‘u atu le taui i ē ‘ua fa‘asausili.
3Le ALI‘I e,
e mitamita se‘ia afea o ē amio leaga;
e mitamita o ē amio leaga se‘ia afea?
4‘Ua latou so‘ona tautala i ‘upu fa‘amaualuga,
‘ua mitamita vale o i latou uma o ē fai amio leaga.
5Le ALI‘I e,
‘ua latou tu‘imomomoina lou nu‘u,
‘ua latou fa‘atigāina fo‘i lou tofi.
6O le fafine ‘ua oti lana tane ‘atoa ma le tagata ‘ese, ‘ua latou fasiotia,
‘ua latou fasiotia fo‘i ma ē mātuaoti;
7ma ‘ua fa‘apea a latou,
“E lē silasila mai le ALI‘I,
e lē manatua fo‘i e le Atua o Iakopo.”
8‘Ia ‘outou iloa, ‘outou ē vālelea i le nu‘u;
o ‘outou vale fo‘i, tou te popoto afea?
9O lē na faia le taliga, e lē lagona ‘ea e ia?
o lē na faia le mata, e lē silasila atu ‘ea o ia.
10O lē sasa i nu‘u ‘ese, e lē a‘oa‘i atu ‘ea e ia?
O lē a‘oa‘o i tagata ‘ia popoto.
11O lo‘o silafia e le ALI‘I o mafaufau o tagata,
e fa‘atauva‘a lava ia.
12Le ALI‘I e, ‘amu‘ia le tagata ‘ua e a‘oa‘iina;
ma e a‘oa‘oina o ia i lau tulafono.
13‘Ina ‘ia e tu‘uina atu se mapu ‘iā te ia i ona po ‘ua puapuagā ai,
se‘ia ‘elia le lua mo lē ‘ua amio leaga.
14Auā e lē tu‘una e le ALI‘I lona nu‘u,
na te lē tu‘ulafoa‘iina fo‘i lona tofi.
15Auā e toe fo‘i atu le fa‘amasinoga i le amiotonu;
e mulimuli atu fo‘i i ai o i latou uma ‘ua loto fa‘amaoni.
16O ai sē tula‘i mai mo a‘u e tete‘e i ē ‘ua amio leaga?
O ai sē tū atu mo a‘u e tete‘e i ē ‘ua fai mea leaga?
17‘Ana le fesoasoani mai ‘iā te a‘u o le ALI‘I,
po ‘ua toe itiiti ‘ona nofo lea o lo‘u agaga i le mea ta‘aligoligoa.
18Na ‘ou fai ane, “O lo‘o mapeva lo‘u vae;”
‘ona tāofi a‘e lea o a‘u e lou alofa, le ALI‘I e.
19O le tele o mānatunatu i lo‘u loto
‘ua fiafia ai lo‘u agaga ‘ona o fa‘amafanafanaga mai ‘iā te oe.
20E fa‘atasi ‘ea ma oe le nofoāli‘i o i ai amio leaga,
o lē ‘ua fai ma tulafono le fa‘atigā?
21‘Ua latou feosofi mai i le agaga o le amiotonu;
‘ua latou fa‘asalaina le tagata e leai sana agasala.
22‘Ae fai le ALI‘I mo‘u ‘olo maualuga;
o lo‘u Atua fo‘i o le papa lea ‘ou te malu ai.
23E taui atu fo‘i e ia ‘iā te i latou a latou agasala,
na te fa‘aumatia fo‘i i latou ‘iā latou amio leaga;
o le ALI‘I lo matou Atua na te fa‘aumatia i latou.
Who We AreWhat We EelieveWhat We Do
2025 by iamachristian.org,Inc All rights reserved.
