1Na o‘o mai fo‘i le afioga a le ALI‘I ‘iā te a‘u, ‘ua fa‘apea mai:
2‘Inā alu ia oe ma e vala‘au atu i Ierusalema, ‘ia fa‘apea atu i ai, o lo‘o fa‘apea ‘ona fetalai mai o le ALI‘I:
‘Ou te manatua oe, o lou agalelei mai ‘ina o e teine muli
ma lou alofa i ona po sa e faufautane ai,
ma lou mulimuli mai ‘iā te a‘u i le vao,
o le nu‘u e le totōina ai ni mea.
3O Isaraelu sa pa‘ia o ia mo le ALI‘I,
o le fa‘apolopolo o ia o ana mea e tutupu.
E agasala i latou uma o ē ‘a‘ai ai,
e o‘o lava ‘iā te i latou le leaga,
‘ua fetalai mai ai le ALI‘I.
O le Agasala o Isaraelu4Le ‘āiga o Iakopo e, ma itū‘āiga uma o le ‘āiga o Isaraelu, ‘inā fa‘alogologo mai ia ‘outou i le afioga a le ALI‘I.
5O lo‘o fa‘apea ‘ona fetalai mai o le ALI‘I:
Se a ‘ea se amioletonu na iloa ‘iā te a‘u e o ‘outou tamā,
‘ina ‘ua latou mamao ‘iā te a‘u,
ma ‘ua latou mulimuli atu i mea fa‘atauva‘a,
ma ‘ua amio fa‘atauva‘a i latou?
6‘Ua lē fai ane fo‘i i latou,
“Po o fea o i ai le ALI‘I,
o lē na ‘aveina a‘e i tatou nai le nu‘u o Aikupito,
ma na ta‘ita‘i ‘iā te i tatou i le vao,
o le nu‘u naumati e tele ai lua,
o le nu‘u e lailoa ai tagata ‘ua i ai fo‘i le ata o le oti,
o le nu‘u fo‘i e lē uia e tagata,
e leai fo‘i se tagata e mau ai?”
7Na a‘u fa‘ao‘oina mai fo‘i ‘outou i le fanua lafulemū,
‘ina ‘ia ‘outou ‘a‘ai ai i ona fua ma ana mea lelei.
‘Ua ‘outou ō mai fo‘i i lo‘u nu‘u, ‘ona leaga ai i lea ‘iā te ‘outou,
ma ‘outou faia lo‘u tofi ma mea e ‘inosia.
8E le‘i fai ane le ‘au ositaulaga, “Po o fea o i ai le ALI‘I?”
E le‘i iloa fo‘i a‘u e i latou o ē a‘oa‘o i le tulafono.
O le ‘au leoleo mamoe ‘ua latou fōua a‘u,
o perofeta fo‘i ‘ua latou vavalo i le igoa o Paala,
ma latou mulimuli atu i mea e lē aogā.
O le Finauga a le Ali‘i ma ona Tagata9O le mea lea ‘ou te toe finau ai lava ma ‘outou, ‘ua fetalai mai ai le ALI‘I,
‘ou te finau ma le fānau a ‘outou fānau.
10Auā ‘ia ō atu ‘outou i nu‘u tu matāfaga o Kitimo,
ma va‘ava‘ai i ai; ma ‘ia ‘outou ‘a‘auina atu nisi i Kitara,
ma ‘ia ‘outou matuā mafaufau,
ma va‘ava‘ai pe i ai se mea e pei o lenei mea.
11Po ‘ua suia ‘ea e se nu‘u o latou atua,
‘ae lē ni atua ia mea?
A o lo‘u nu‘u ‘ua suia lo latou mamalu i le mea e lē aogā.
12Le lagi e, ‘inā ofo ia i lenei mea, ‘ia gatete lava,
ma ‘ia matuā femēmēa‘i, ‘ua fetalai mai ai le ALI‘I.
13Auā e lua mea leaga ‘ua faia e lo‘u nu‘u;
‘ua latou tu‘ua a‘u le puna o le vai ola,
a ‘ua latou ‘eli mo i latou o vai‘eli,
o vai‘eli māvaevae e lē tali ai ni vai.
O le lē Usita‘i o Isaraelu14O le pologa ‘ea Isaraelu?
Na fānau ‘ea o ia i le ‘āiga?
Se a le mea ‘ua ‘avea ai o ia ma tagata o tau‘a?
15‘Ua fētāgisi atu ‘iā te ia o leona ta‘anoa,
‘ua leo tetele i latou, ma ‘ua latou fa‘atafunaina lona nu‘u;
‘ua susunuina fo‘i ona ‘a‘ai, ‘ua leai sē nofo ai.
16O le fānau a Nafi ma Tapenesa,
o i latou lava latou te ‘aina lou tumua‘i.
17‘Ua e lē faia ‘ea lenei mea ‘iā te oe lava,
‘ina ‘ua e tu‘ua le ALI‘I lou Atua
i ona po na ta‘ita‘iina ai oe e ia i le ala?
18O lenei, se a ‘ea sau mea e fai i le ala o Aikupito,
‘e te inu ai i le vai i Seora?
Se a fo‘i sau mea e fai i le ala o Asuria,
‘e te inu ai i le vai o le vaitafe?
19E a‘oa‘i ‘iā te oe lau lava amio leaga,
e fa‘asala fo‘i ‘iā te oe ou liliu ‘ese.
O lenei, ‘ia e iloa, ma ‘ia e manatu,
auā o le mea leaga ma le ‘o‘ona ‘ina ‘ua e tu‘ua le ALI‘I lou Atua,
ma ‘ua e lē mata‘u ‘iā te a‘u,
‘ua fetalai mai ai le Ali‘i le ATUA o ‘au.
‘Ua Liliu ‘ese Isaraelu mai le Ali‘i20Auā talu anamua na ‘ou gauia lau amo,
ma ‘ou motusia ou noanoaga; ‘ona e fai mai ai lea,
“‘Ou te lē ‘au‘auna atu;” i le ‘ua e ta‘oto i luga o mauga maualuluga uma,
ma lalo o la‘au lauolaola uma, ‘ua e mulilua ai.
21O a‘u fo‘i na ‘ou totōina oe o le vine Soreka,
o le fua e matuā moni lava;
‘ua fa‘apefea fo‘i ‘ona liua o oe ‘iā te a‘u
ma lālā leaga o le vine ‘ese?
22Auā e ui lava ‘ina e fufulu ‘iā te oe i le neteri,
ma e avane ai le moli e tele,
‘ua tusia lau agasala i o‘u luma,
‘ua fetalai mai ai le Ali‘i le ATUA.
23Pe fa‘apefea ‘ona e fai mai,
“‘Ou te le‘i leaga, ‘ou te le‘i mulimuli atu ‘iā Paala?”
‘Inā va‘ava‘ai atu ia i lou ala i le vanu,
‘ia iloa le mea na e faia;
o le kamela fafine muli e tele vave ‘ua femo‘ea‘i i ona ala,
24o le asini o le vao ‘ua masani ma le vao,
O le mana‘o o lona loto ‘ua ia sogisogi ai le matagi.
O ai sē na te mafaia ‘ona fa‘afo‘i ‘iā te ia a‘i lona mana‘o?
E le tigāina so latou o ē sā‘ili‘ili ‘iā te ia,
latou te maua o ia i lona masina.
25Tāofi ia ou vae ne‘i le fa‘ase‘evaeina,
ma lou gutu ne‘i fiainu.
A ‘ua e fai mai, “E lē aogā; e leai lava, auā ‘ua ‘ou loto i tane ‘ese,
‘ou te mulimuli fo‘i ‘iā te i latou.”
‘Ua Fa‘asalaina Isaraelu e Tusa ma ana Agasala26E pei ‘ona mā o le gaoi ‘ina ‘ua maua o ia,
e fa‘apea ‘ona fa‘amāina o le ‘āiga o Isaraelu,
o i latou, ma o latou tupu, ma o latou ali‘i,
ma o latou ositaulaga ma o latou perofeta,
27o ē fai atu i le la‘au, “O lo‘u tamā oe;”
ma le ma‘a, “‘Ua e fānaua mai a‘u.”
Auā ‘ua latou u mai ‘iā te a‘u o latou tua,
‘ae lē o latou mata.
A o ona po o lo latou malaia e fai mai ai i latou,
“‘Ia e tula‘i mai ma fa‘aola ‘iā te i matou.”
28A o ifea ‘ea ou atua na e faia mo oe?
‘Inā tula‘i ia o i latou,
pe a mafaia e i latou ‘ona fa‘aola ‘iā te oe i ona po o lou malaia;
auā, Iuta e, o le tau aofa‘i o ou ‘a‘ai
o le tau aofa‘i lea o ou atua.
29Se a le mea tou te finau mai ai ‘iā te a‘u?
‘Ua fouvale ‘outou uma ‘iā te a‘u,
‘ua fetalai mai ai le ALI‘I.
30Na ‘ou sasaina a ‘outou fānau, ‘ae lē aogā;
e le‘i talia e i latou le a‘oa‘iga;
‘ua fa‘aumatia o ‘outou perofeta i la ‘outou lava pelu,
e pei o le leona na te fa‘aumatia.
31Le tupulaga e, ‘inā mafaufau ia ‘outou i le afioga a le ALI‘I.
‘Ua ‘avea ‘ea a‘u ma vao ‘iā Isaraelu?
po o se nu‘u pogisā?
Se a fo‘i le mea ‘ua fai mai ai lo‘u nu‘u,
“‘Ua sa‘oloto i matou, matou te le toe ō atu ‘iā te oe?”
32Pe mafai ‘ea e le taupou ‘ona galo o ana teuga?
pe galo ‘ea i le fa‘ato‘ānofotane o ona fusi?
A o lo‘u nu‘u e lē masino aso ‘ua galo ai a‘u ‘iā te i latou.
33Se a le mea ‘ua e sauniuni ai lau amio
e sā‘ili‘ili ‘ina ‘ia mana‘omia ai oe?
O le a fo‘i ‘ua e a‘oa‘o atu ai ou ala i fafine amio leaga.
34‘Ua iloa i ou lava pito ‘ofu
le toto o le ola o ē matitiva e le sala;
e lē o le matuā sā‘ili na ‘ou iloa ai,
a ‘ua i ai i ia mea uma.
35A ‘ua e fai mai, “E moni, e liliu‘eseina lona to‘asā ‘iā te a‘u,
auā ‘ou te le‘i agasala.”
Fa‘auta, ‘ou te fa‘amasino ‘iā te oe,
‘ina ‘ua e fa‘apea, “‘Ou te le‘i sala.”
36Se a le mea ‘e te fealua‘i so‘o ai e liliu ai lou ala?
E māsiasi fo‘i oe ‘ona o Aikupito,
e pei ‘ona e māsiasi ‘ona o Asuria.
37‘E te alu atu fo‘i nai lea mea
ma ou lima i luga o lou ulu;
auā ‘ua fa‘alēaogāina e le ALI‘I o ou fa‘atuatuaga,
‘e te lē manuia ai lava.
Who We AreWhat We EelieveWhat We Do
2025 by iamachristian.org,Inc All rights reserved.
