Salāmo 52 - Revised Samoan Catholic Bible

O le Amio Leaga a Toeka ma lona MalaiaMa le usu pese. O le salāmo a Tavita e a‘oa‘o ai, ‘ina ‘ua alu Toeka le Etoma ma ta‘u atu ‘iā Saulo, ‘ua fa‘apea atu ‘iā te ia, “‘Ua alu atu Tavita i le fale o Aimeleka.”

1O oe na le toa,

se a le mea ‘e te mitamita ai i le leaga?

o lo‘o agalelei le Atua i aso uma lava.

2‘Ua mafaufau lou laulaufaiva i mea leaga;

e fai le pepelo e pei o se tafi ma‘ai.

3‘Ua sili lou mana‘o i le leaga,

‘ae itiiti i le lelei;

‘ua sili lou mana‘o i le tala pepelo,

‘ae itiiti i le ‘upu tonu. Selā.

4Le laulaufaiva fa‘a‘ole‘ole e,

‘ua e mana‘o i ‘upu uma e fano ai.

5O lea e fa‘aumatia ai oe e fa‘avavau e le Atua;

na te ‘ave‘eseina ma lia‘iina oe a‘i le fale ‘ie;

na te lia‘iina fo‘i oe a‘i le nu‘u o ē ola. Selā.

6E iloa atu ai fo‘i ē ‘ua amiotonu, ma latou matata‘u ai,

latou te featani ai ‘iā te ia;

7o fa‘apea atu, “Fa‘auta, o le tagata lea na na lē faia le Atua mōna malosi,

a ‘ua fa‘atuatua ia i le tele o lona ‘oloa;

na ia fa‘amalosi i lona leaga.”

8A o a‘u, ‘ou te pei o se olive ona tauluulu ola

i le fale o le Atua;

‘ou te fa‘atuatua i le alofa o le Atua,

e fa‘avavau fa‘avavau lava.

9‘Ou te vivi‘i atu ‘iā te oe e fa‘avavau lava,

auā na e faia lenā mea;

‘ou te fa‘atalitali fo‘i i lou suafa,

auā e lelei i luma o ou tagata amio Atua.